តាមប្រភព AFP បានឱ្យដឹងថា ក្រុមអនុរក្សសត្វរបស់ប្រទេសវៀតណាមបានធ្វើការដកហូតខ្លាឃ្មុំចំនួន១៩ក្បាល ដែលត្រូវគេដាក់ក្នុងទ្រុងនៅឯកសិដ្ឋានមួយសំរាប់ចិញ្ចឹមវាដើម្បីបូមចំរាញ់យកទឹកប្រមាត់ធ្វើឱសថខុសច្បាប់ ។
មូលនិធិសត្វអាស៊ីបានថ្លែងថា ខ្លាឃ្មុំទាំងអស់នឹងត្រូវយកទៅថែរក្សានៅមជ្ឈមណ្ឌលជួយសង្គ្រោះខ្លាឃ្មុំខ្មៅអាស៊ី (Asian Black Bear) ដែលមានទីតាំងនៅក្បែរទីក្រុងហាណូយ ។ មុនពេលធ្វើការដកហូតយកទៅសង្គ្រោះ ខ្លាឃ្មុំទាំងនេះត្រូវបានគេឃុំឃាំងក្នុងទ្រុងប្រវែង១២ម៉ែត្រ នៅខេត្ដប៊ិញដួង (Binh Duong) ក្បែរទីក្រុងហូជីមិញ។ លោកទួនបេនឌិក សេន (Tuan Bendixsen) នាយកមូលនិធិសត្វអាស៊ីសាខាក្នុងប្រទេសវៀតណាមបាន ឱ្យដឹងថា ទ្រុងធំនេះត្រូវបានចែកចេញជា៦-៧ប្រឡោះសំរាប់ឃុំឃាំងខ្លាឃ្មុំនីមួយៗ ហើយក៏ជាលើកដំបូងផងដែរ ដែលយើងប្រទះឃើញខ្លាឃ្មុំក្នុងស្ថានភាពខាងលើ ។
ក្រុមអ្នកជួយសង្គ្រោះសត្វបានបញ្ជាក់ថា ស្ថាប័នព្រៃឈើខេត្ដបានស្នើសុំឱ្យមូលនិធិ របស់លោកទួន បេនឌិកសេន ជួយសង្គ្រោះខ្លាឃ្មុំទាំងនេះកាលពី២-៣សបា្ដហ៍មុន បន្ទាប់ពីអាជ្ញាធរបានសំរេចបិទកសិដ្ឋានខ្លាឃ្មុំ ព្រោះតែអ្នកចិញ្ចឹមអនុវត្ដមិនស្របតាមក្បួនខ្នាតដែលបានកំណត់ទុក ។
មុនការដកហូតអ្នកជំនួញជនជាតិតៃវ៉ាន់ ដែលជាម្ចាស់ខ្លាឃ្ម្មុំបានយកខ្លាឃ្មុំទៅលាក់ទុកនៅក្នុងកុងតឺន័រកាលពីខែមុន ខណៈដែលក្រុមសកម្មជន (មូលនិធិសត្វអាស៊ី) បញ្ជាក់ថា ប្រមាត់ខ្លាឃ្មុំត្រូវបូមចំរាញ់ដោយម្ជុល គឺជាទង្វើដ៏គ្រោះថ្នាក់បំផុត ។
ក្នុងក្បួនតម្រាថ្នាំបុរាណចិន គឺទឹកប្រមាត់ខ្លាឃ្មុំទាំងនេះចាត់ទុកថាជាថ្នាំប៉ូវសុខភាព ការពារអាការៈរលាក, ព្យាបាលថ្លើម និងជួយបំប៉នបេះដូង រួមទាំងជាឱសថ ឬសារធាតុជំរុញតំរូវការផ្លូវភេទផងដែរ ។ ជួនកាលគេបានស្រាវជ្រាវរកឃើញទឹកប្រមាត់ខ្លាឃ្មុំ មានផ្សំនៅក្នុងសាប៊ូកក់សក់ ថ្នាំដុសធ្មេញ និងភេសជ្ជៈទឹកក្រូចផងដែរ។ កសិដ្ឋានបូមចំរាញ់ទឹកប្រមាត់ខ្លាឃ្មុំ គឺជាជំនួញខុសច្បាប់មួយនៅក្នុងប្រទេសវៀតណាម ប៉ុន្ដែបណ្ដាម្ចាស់ កសិដ្ឋានដែលបានទទួលច្បាប់អនុញាតឱ្យចិញ្ចឹមខ្លាឃ្មុំនេះ គឺពួកគេសុំសិទ្ធិត្រឹមតែអាជីវកម្មនាំចេញតែប៉ុណ្ណោះ ។ ក្នុងឆ្នាំ២០០៥ មានខ្លាឃ្មុំជាច្រើនពាន់ក្បាលត្រូវបានបង្កប់ឧបករណ៍ “មីក្រូឈីប” ដើម្បីតាមដាន និងគ្រប់គ្រងចំនួនខ្លាឃ្មុំដែលត្រូវចិញ្ចឹម ៕
ចែករំលែកព័តមាននេះ