រាជធានីភ្នំពេញ ៖ លោកឧត្ដមសេនីយ៍ ត្រីទូច ណារ៉ុថ ស្នងការនគរបាលរាជធានីភ្នំពេញ បានប្រកាសព្រមានជាសាធារណៈថា មិនថាយុវជន ឬប្រជាពលរដ្ឋណាទេ ដែលមានរូបអាសអាភាសទាំងឡាយដែលបាន មកពីអន្ទិតកំហូចវត្ដស្រះចក ដែលបានលួចថតស្ដ្រីងូតទឹកមន្ដនោះ បើឆែករកឃើញជនទាំងនោះនឹងអាចប្រឈមមុខនឹងផ្លូវច្បាប់ ។ លោកស្នងការនគរបាលរាជធានីបានធ្វើការប្រកាសហាមឃាត់បែបនេះ ខណៈ ពេលដែលលោកកែវ ធា ប្រធានការិយាល័យ ប្រឆាំងការជួញដូរមនុស្ស និងការពារអនីតិជនបានធ្វើការឃាត់ខ្លួនយុវជនម្នាក់ឈ្មោះ សឿន សុភ័ក្ដ្រ អាយុ២៤ឆ្នាំ កាលពីព្រឹកថ្ងៃទី៨ កក្កដា នៅចំណុចមុខសណ្ឋាគារមាន ហួរ ដែលយុវជនរូបនេះបាននិងកំពុងបញ្ចូលរូបអាសអាភាសនេះបន្ដឱ្យអតិថិជនរបស់ខ្លួនតាមកុំព្យូទ័រ ។ លោកឧត្ដមសេនីយ៍ទូច ណារ៉ុថ មានប្រសាសន៍ថា វាជាការធ្វើឱ្យប៉ះពាល់ធ្ងន់ធ្ងរដល់តំលៃស្ដ្រីខ្មែរ ដែលរងគ្រោះ ដោយការលួចថតយ៉ាងអគតិ ។
ដូច្នេះបើយុវជន ឬជនណាមានរូបអាសអាភាសបែបនោះ សុំឱ្យលុបចោលពីក្នុងទូរស័ព្ទ ឬពីឧបករណ៍ណាមួយដែលអាចចាក់មើលឃើញរូបភាពទាំងនោះ ។ បើមិនដូច្នោះទេ សមត្ថកិច្ចរក ឃើញនឹងចាត់ការតាមផ្លូវច្បាប់ ។ ជាក់ស្ដែង ដូចយុវជនខាងលើនេះ គេនឹងត្រូវរងនូវការ បញ្ជូនទៅកាន់តុលាការតាមផ្លូវច្បាប់ ។ តាមប្រភពព័ត៌មានបានឱ្យដឹងថា បញ្ហារំជើបរំជួលពីរូបស្រីស្អាតងូតទឹកមន្ដច្រើនជាង៤០នាក់ ត្រូវបានគេចម្លងឱ្យគ្នាមើលតាមទូរស័ព្ទដៃ មិនមែនតែក្នុងរាជធានីភ្នំពេញនោះទេ តែបានធ្លាយទៅដល់ខេត្ដមួយចំនួនរួចទៅហើយ ។ ចំពោះការអំពាវនាវរបស់លោកស្នងការប៉ូលិសនេះ គប្បីគ្រប់គ្នាទទួលយក និងបញ្ឈប់ការត្រេកត្រអាល លើរូបភាពគួរឱ្យឈឺចាប់របស់ស្ដ្រីភេទដែលរងគ្រោះនោះទៅដោយគិតថា បើប្រពន្ធ យើងប្អូនស្រីយើង ឬម្ដាយយើង បងស្រីយើង តើគ្រប់គ្នាមានអារម្មណ៍បែបណា ?
ចែករំលែកព័តមាននេះ