រាជធានីភ្នំពេញ ៖ ចូលមកដល់ខែតុលា ឆ្នាំ២០២០នេះ នៅតាមបណ្តាខេត្តមួយចំនួន និងក្រុងភ្នំពេញបាន និងកំពុងទទួលរងគ្រោះទឹកជំនន់ទឹកភ្លៀងធ្វើឱ្យទីតាំងបុរីផ្ទះល្វែងមួយចំនួនត្រូវបានលិចទឹកបង្កជាផលវិបាកទៅដល់អ្នកស្នាក់នៅ ។
ផ្នែកលើបទពិសោធន៍មេរៀននៃជំនន់ទឹកភ្លៀងពេលនេះ តើការវិនិយោគនៅលើវិស័យដីធ្លី សម្រាប់សាងសង់បុរី ផ្ទះល្វែងនៅជំហានបន្ទាប់ អាចនឹងប្តូរទិស ឬងាកទៅរកតំបន់មិនប្រឈម និងទឹកលិចដើម្បីផ្តល់ភាពងាយស្រួលទៅដល់អ្នកទិញសម្រាប់រស់នៅដែរឬទេ? ពាក់ព័ន្ធ និងបញ្ហាខាងលើនេះ បើតាមអ្នកជំនាញម្ចាស់អភិវឌ្ឍន៍គម្រោងនឹងចាប់ផ្តើមគិតពិចារណាលើការទុកទីកន្លែងសាធាណៈឱ្យបានច្រើន ដើម្បីជួយសម្រួលនៅពេលជួបបញ្ហា ។
លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាមានប្រសាសន៍ថា បញ្ហាទឹកជំនន់នេះខ្ញុំបានឃើញរាជរដ្ឋាភិបាលបានគិតគូយូរមកហើយ តាមគោលការណ៍រំដោះប្រព័ន្ធទឹកចេញ តាមរយៈក្រសួងធនធានទឹក ឬជាប្រភេទទីតាំងដី ឬជារបស់អង្គភាពណាមួយដែលគាត់មើលឃើញអំពីសក្តានុពលនៃការវិនិយោគទៅកាន់តំបន់ទាំងនោះ ។ លោកលើកឡើងថា «ពាក់ព័ន្ធ និងទឹកជំនន់ ខ្ញុំគិតថា វាកើតឡើងនៅក្នុងរយៈពេលខ្លី ហើយវាជាបទពិសោធន៍មួយធ្វើឱ្យម្ចាស់គម្រោងមួយចំនួនគាត់ចាប់ផ្តើមពិចារណា ពិសេសគាត់អាចផ្តល់នៅទីធ្លាសាធារណឱ្យច្រើនជាងនេះ ដើម្បីជួយសម្រួលនៅផ្នែកខ្លះនៃទឹកជំនន់។ តែទោះជាយ៉ាងណាទឹកជំនន់នៅពេលនេះវាមានទំហំធំ ទោះបីមានកន្លែងសាធារណៈច្រើនក៏ដោយវាក៏ពិបាកទាញយកទឹកឱ្យអស់ដែរ» ។
បើតាមប្រធានសមាគមរូបនេះ ទោះបីជំនន់ទឹកភ្លៀងធ្វើឱ្យបុរី ផ្ទះល្វែងមួយចំនួនប្រឈមនឹងទឹកលិចក៏ដោយ សម្រាប់ម្ចាស់អភិវឌ្ឍន៍អាចនិងនៅបន្តអភិវឌ្ឍន៍ស្របទៅតាមផែនការមេរបស់រាជរដ្ឋាភិបាល ។
លោក ច្រឹកសុខនីម មានប្រសាសន៍ថា«នៅតាមបុរីឬគម្រោងធំៗមួយចំនួនគាត់នៅតែបន្តសកម្មភាពរបស់ពួកគាត់តាមផែនការមេរបស់ពួកគាត់ឱ្យស្របទៅតាមគោលនយោបាយរបស់រាជរដ្ឋាភិបាលដដែល ព្រោះអីយើងមើលឃើញថានេះជាបញ្ហាប្រឈមនៅក្នុងរយៈពេលខ្លីប៉ុណ្ណោះទេ ព្រោះទឹកជំនន់នេះវាមានត្រឹមតែជះឥទ្ធិពលនៅកម្ពុជាទេ»។ ទន្ទឹមនឹងអ្នកជំនាញក្នុងវិស័យសំណង់និងអចលនទ្រព្យយល់ឃើញថាម្ចាស់អភិវឌ្ឍន៍គម្រោងបុរី ផ្ទះល្វែងអាចនឹងបន្តអភិវឌ្ឍន៍ដើរតាមផែនការមេរបស់រាជរដ្ឋាភិបាលមិនប្តូរទិសអភិវឌ្ឍន៍ តែសម្រាប់អ្នកស្រាវជ្រាវសេដ្ឋកិច្ចយល់ថារាជរដ្ឋាភិបាលគួរមានការកំណត់ទីតាំងណាអាចធ្វើបុរីឬផ្ទះល្វែងបានវាពាក់ព័ន្ធតំបន់លិចទឹក។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាមានប្រសាសន៍ថា «ខ្ញុំគិតថាវាមិនមែនអាស្រ័យតែលើការងាកទិសរកកន្លែងផ្សេងទេ។តាមពិតទៅរាជរដ្ឋាភិបាលត្រូវកំណត់ថាទីតាំងណាអាចធ្វើបុរីបាន ព្រោះវាពាក់ព័ន្ធទៅនិងតំបន់លិចទឹក បឹង និងស្រះដែលធ្វើឱ្យជនលិចត្រូវលុប ព្រោះបឹងនិងស្រះទាំងនោះជាកន្លែងរំដោះទឹកភ្លៀងឬទឹកជំនន់»។
លោកបណ្ដិតលើកឡើងថា បើយើងធ្វើបុរី ឬផ្ទះល្វែង យើងចាក់ដីលុបបឹងទាំងនោះ វាជាកត្តាធ្វើឱ្យប៉ះពាល់ហើយវានឹងជួបនៅបញ្ហារយៈពេលវែង។លើសពីនេះ វារីអគ្គិសនីនៅបណ្តាប្រទេសនៃទន្លេមេគង្គខាងលើក៏ផ្តល់ផលប៉ះពាល់មកដល់ការលិចជន់ជោដល់ទីក្រុង អីចឹងហើយរាជរដ្ឋាភិបាលត្រូវរៀបចំប្រព័ន្ធរំដោះទឹកឱ្យបានត្រឹមត្រូវដើម្បីបង្កានៅឆ្នាំក្រោយៗទៀត កុំឱ្យមានបទពិសោធន៍បែបនេះ។
លោកបណ្ឌិត លើកឡើងថា «កន្លងមកការសាងសង់យើងមិនមានច្បាប់ បទបញ្ញាតិនានាពាក់ព័ន្ធនិងការកំណត់ទីតាំងសាងសង់ ទើបធ្វើឱ្យអ្នកមានលុយមួយចំនួនគាត់ទៅទិញដីបឹង ដីទំនាបអាចចាក់ដីបាន ដោយសារតែគ្មានច្បាប់, ដោយសារមានទំនាក់ទំនងជិតស្និទរវាងអ្នកជំនួញនិងអ្នកអនុវត្តច្បាប់តាមក្រសួងពាក់ព័ន្ធនានាអនុញ្ញាតឱ្យគាត់អាចចាក់ដីលុបបឹងនេះបាន ហើយកែរបឹងធម្មជាតិរបស់រាជរដ្ឋាភិបាលឱ្យទៅជាបឹងឯកជនអាចវិនិយោគបាន។កត្តាទាំងនេះបានលើកកម្ពស់ប្រជាពលរដ្ឋមករស់នៅក្រុងភ្នំពេញច្រើន ហើយគ្មានបឹងសម្រាប់រំដោះទឹក គ្មានលក្ខណៈជីវសាស្ត្រធម្មជាតិគ្រប់គ្រាន់ សម្រាប់ឱ្យការរស់នៅប្រកបដោយសុខភាពនោះទេ»។
បើតាមអ្នកស្រាវជ្រាវសេដ្ឋកិច្ចរូបនេះ ថាពាក់ព័ន្ធនឹងតម្លៃនៅតាមតំបន់ទឹកលិច អាចនឹងនៅមានតម្លៃដូចដើមបើទោះបី ទឹកជន់លិចក៏ដោយ តំបន់លិចទឹកគេអាចចាក់ដីឡើងមកវិញបាន(ចាក់ដីបន្ថែម) សំខាន់អាស្រ័យទៅលើច្បាប់ថាដីនេះរាជរដ្ឋាភិបាលមិនអនុញ្ញាតឱ្យសាងសង់នោះទេ មិនអាចរស់នៅបានទេ នោះទើបធ្វើឱ្យដីនោះគ្មានហាងឆេង ។តែបើដីនោះគ្មានច្បាប់ហាមឃាត់ទេតម្លៃដីនៅតែខ្ពស់ដដែល។ លោកបណ្ឌិតលើកឡើងថា សម្រាប់ប្រជាពលរដ្ឋឆ្លងកាត់បទពិសោធន៍ជំនន់ទឹកភ្លៀងនេះ គាត់ប្រាកដជាត្រូវស្វែងរកមុនចាប់ផ្តើមទិញដី ឬផ្ទះនេះគាត់នឹងគិតពិចារណាទៅលើការលិចទឹកនេះហើយ ។
ពាក់ព័ន្ធនិងសំនួរសួថាតើម្ចាស់គម្រោងអភិវឌ្ឍន៍បុរី ផ្អះល្វែងអាចនិងប្តូរទិសឬងាកទៅរកកន្លែងផ្សេងមិនប្រឈមទឹកលិចដែរឬទេនៅគម្រោងបន្ទាប់? លោកបណ្ឌិតសង្កត់ធ្ងន់ថា«ខ្ញុំគិតថាក្រុមហ៊ុនមិនអាចទៅសាងសង់កន្លែងផ្សេងទេ ព្រោះចំណាយទិញដីអស់លុយយ៉ាងច្រើន បើគាត់ងាកចេញ ដីនេះទុកចោលប្រាកដដីនេះគ្មានហាងឆេង ដូច្នេះគាត់ត្រូវសាងសង់ហើយ ដោយចាក់ដីបន្ថែមកុំទឹកលិច»៕
ចែករំលែកព័តមាននេះ