រាជធានីភ្នំពេញ ៖ នារីវ័យក្មេងជាជនជាតិចិនម្នាក់ ត្រូវបានគេប្រទះឃើញនាងដើរមកឈរជក់បារីនៅម្តុំមាត់ទន្លេបានបន្តិច ក៏ស្រាប់តែដើរសំដៅចុះទៅក្នុងទឹកទន្លេ ត្រូវបានប្រជាពលរដ្ឋនាំគ្នាស្រែកឃាត់ដែរ តែនាងមិនស្តាប់ហើយក៏បានលិចបាត់ស្រមោលតែម្តង ភ្លាមៗនោះក៏មាននារីវ័យក្មេងម្នាក់ទៀតដែលជាមិត្តភក្តិបានរត់មកតាមឃាត់នារីរងគ្រោះដែរ តែមិនទាន់ឡើយ ។…
រាជធានីភ្នំពេញ ៖ នារីវ័យក្មេងជាជនជាតិចិនម្នាក់ ត្រូវបានគេប្រទះឃើញនាងដើរមកឈរជក់បារីនៅម្តុំមាត់ទន្លេបានបន្តិច ក៏ស្រាប់តែដើរសំដៅចុះទៅក្នុងទឹកទន្លេ ត្រូវបានប្រជាពលរដ្ឋនាំគ្នាស្រែកឃាត់ដែរ តែនាងមិនស្តាប់ហើយក៏បានលិចបាត់ស្រមោលតែម្តង ភ្លាមៗនោះក៏មាននារីវ័យក្មេងម្នាក់ទៀតដែលជាមិត្តភក្តិបានរត់មកតាមឃាត់នារីរងគ្រោះដែរ តែមិនទាន់ឡើយ ។ ពាក់ព័ន្ធនឹងករណីនេះ មិនមាននរណាម្នាក់បានដឹងថា នារីរងគ្រោះរូបនោះមានវិបត្តិអ្វីនោះទេ ទើបបានជាមកបញ្ចប់ជីវិត ដោយលោតចូលទឹកទន្លេបែបនេះ ។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៧និង ៣០នាទីព្រឹកថ្ងៃទី១៩ ខែតុលា ឆ្នាំ ២០២០ នៅចំណុចមាត់ទន្លេក្បែរម្តុំព្រះអង្គដងកើ តាមផ្លូវព្រះស៊ីសុវត្ថិ ស្ថិតក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីនគរបាលបានប្រាប់ឱ្យដឹងថា នារីរងគ្រោះឈ្មោះ HUA WEIZHU អាយុ២០ឆ្នាំ ជាជនជាតិចិន ជាអ្នកទេសចរណ៍ ស្នាក់នៅអគារខុនដូរមួយកន្លែង មានទីតាំងស្ថិតនៅផ្លូវលេខ២៧៨ ក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ។
តាមប្រភពដដែលបានបន្តថា មុនពេលកើតហេតុ កាលពីវេលាប្រមាណជាម៉ោង៤និង ៣០នាទីទៀបភ្លឺថ្ងៃទី១៩ ខែតុលា ឆ្នាំ២០២០ នេះ គេឃើញនារីរងគ្រោះមិនដឹងជាមកពីទីណាទេ បានដើរមកឈរជក់បារីនៅមាត់ទន្លេក្បែរព្រះអង្គដងកើ លុះបានបន្តិច ក៏ស្រាប់តែនាងដើរចុះទៅក្នុងទឹកទន្លេ ហើយអ្នកនៅក្បែរខាងឃើញបែបនេះ ក៏នាំគ្នាស្រែកឃាត់ដែរ តែនាងមិនស្តាប់ និងមិនឡើងមកលើវិញឡើយ ហើយក៏លិចចូលទៅក្នុងទឹកបាត់ស្រមោលតែម្តង។
តាមប្រភពព័ត៌មានដដែលបានប្រាប់បន្តថា បន្ទាប់ពីឃើញនារីរងគ្រោះម្នាក់ខាងលើដើរចុះទៅក្នុងទឹកទន្លេនិងលិចបាត់បែបនេះ បានធ្វើអោយមានការភ្ញាក់ផ្អើល កើតឡើងទៅដល់អ្នកនៅក្បែរខាងជាច្រើននាក់នាំគ្នាមកចោមរោមមើល និងកម្លាំងសមត្ថកិច្ចមូលដ្ឋានបានចុះមកដល់កន្លែងកើតហេតុ ។
តាមប្រភពព័ត៌មានដដែលបានប្រាប់បន្តទៀតថា ពេលនោះក៏មាននារីវ័យក្មេងម្នាក់ទៀតជាជនជាតិចិននិងជាមិត្តភក្តិរបស់នារីរងគ្រោះបានរត់ទាំងត្រហេបត្រហបមកតាមផងដែរ ប៉ុន្តែតាមមិនទាន់ឡើយ ដោយនារីរងគ្រោះបានលិចចូលទៅក្នុងទឹកទន្លេបាត់ស្រមោលទៅហើយ បន្ទាប់មកនារីជាមិត្តភក្តិ និងសមត្ថកិច្ចក៏បានជួលទូកនេសាទរបស់ប្រជានេសាទនៅក្បែរនោះជួយរាវរកអស់រយៈពេលជាច្រើនម៉ោង ទើបរកសពនារីរងគ្រោះឃើញ និងស្រង់មកដាក់លើមាត់ច្រាំងទន្លេ ។ ពាក់ព័ន្ធនឹងករណីនេះ មិនមាននរណាម្នាក់បានដឹងថា នារីរងគ្រោះមានវិបត្តិអ្វីឡើយ ទើបនាងដើរចុះទៅក្នុងទឹកទន្លេ បណ្តាលអោយបាត់បង់ជីវិតបែបនេះ ។
ក្រោយពេលកើតហេតុ បន្ទាប់ពីរាវរកឃើញសពនារីវ័យក្មេងជាជនជាតិចិនម្នាក់ខាងលើរួចហើយ ក៏បានដឹកសពយកទៅតម្កល់ទុកនៅសាលតម្កល់សពវត្តស្ទឹងមានជ័យ ដើម្បីធ្វើកោសល្យវិច្ច័យ និងបញ្ជាក់ថា នារីរងគ្រោះបានបាត់បង់ជីវិត ដោយសារតែលង់ទឹក និងរង់ចាំក្រុមគ្រួសារមកទទួលយកសពទៅកាន់ប្រទេសកំណើតវិញផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ