ខេត្តបន្ទាយមានជ័យ ៖ បញ្ជូនពិរុទ្ធជននិងទណ្ឌិតជាង៨០០នាក់ទៅផ្ញើនៅពន្ធនាគារខេត្តសៀមរាបនៅថ្ងៃទី១៤ តុលា នេះ ហើយនិងបញ្ជូនអ្នកទោស២០០នាក់ទៀតទៅផ្ញើនៅពន្ធនាគារខេត្តកំពង់ធំផងដែរ ។ គួរបញ្ជាក់ថា ស្ថានភាពទឹកជំនន់កំពុងបន្តឡើងរហូតដែលនៅក្នុងបរិវេណពន្ធនាគារខេត្ត កាលពីព្រឹកថ្ងៃទី១៣ តុលា ទឹកមានកម្ពស់ជិតកន្លះម៉ែត្រ និងនៅជុំវិញបរិវេណខាងក្រៅកម្ពស់ទឹកជិត១ម៉ែត្រ។ នេះជាការព្រួយបារម្ភ ដែលត្រូវតែជម្លៀសអ្នកទោសចេញពីពន្ធនាគារ យកទៅផ្ញើនៅតាមពន្ធនាគារផ្សេងទៀត ។
សូមបញ្ជាក់ទៀតថា ជំនន់ទឹកភ្លៀងបានជន់លិចពន្ធនាគារខេត្ត ធ្វើឲ្យប៉ះពាល់ដល់អ្នកទោសចំនួន១.៦០០នាក់ ក្នុងនោះ ស្រី្តចំនួន១០០នាក់ដែលកំពុងជាប់ឃុំ និងតម្រូវឲ្យមានការជម្លៀសអ្នកទោសចេញ ។ នេះមិនមែនជាលើកទី១ទេដែលទឹកជំនន់បានជន់លិចពន្ធនាគារខេត្តនេះ ។
មន្ត្រីពន្ធនាគារបានបង្ហើបឲ្យដឹងថា ជាជំហានដំបូងអ្នកទោសចំនួន៨០០នាក់ ត្រូវជម្លៀសទៅដាក់នៅពន្ធនាគាខេត្តសៀមរាប នៅរសៀលថ្ងៃទី១៣ ខែតុលាម្សិលមិញ ។
លោក អ៊ុង ស៊ីផាន ប្រធានពន្ធនាគារខេត្តបានឲ្យដឹងថា រយៈពេលតែ១យប់ទឹកជំនន់បានលិចពន្ធនាគារខេត្ត ហើយនេះជាលើកទី៣ហើយដែលពន្ធនាគារខេត្តត្រូវទឹកជន់លិច ។ លោកថា កាលពីឆ្នាំ២០១០ត្រូវទឹកជន់លិចម្តង និងកាលពីថ្ងៃទី១៣ ខែតុលា ឆ្នាំ២០១៣ ក៏លិចម្តងទៀត ហើយអ្នកទោសទាំងអស់កាលនោះត្រូវបានជម្លៀសទៅដាក់នៅពន្ធនាគារនៅខេត្តបាត់ដំបងនិងខេត្តឧត្តរមានជ័យ ។
លោកបញ្ជាក់ថា នៅថ្ងៃទី១៣ តុលា ឆ្នាំ២០២០ ពន្ធនាគារខេត្តក៏ត្រូវទឹកជន់លិចម្តង
ទៀត ។ លោកថា ជំហានដំបូងគឺអ្នកទោសចំនួន៨១១នាក់ ក្នុងនោះមានស្ត្រី៨៥នាក់ត្រូវជម្លៀសដោយដឹកតាមរថយន្តចំនួន២០គ្រឿងនៅរសៀលថ្ងៃទី១៣ ខែតុលា ម្សិលមិញ ទៅដាក់នៅពន្ធនាគារខេត្តសៀមរាប ។
ចំពោះការដឹកជញ្ជូន គឺមានកម្លាំងអនុរក្សពន្ធនាគារខេត្តបន្ទាយមានជ័យ និងកម្លាំងកងរាជអាវុធហត្ថខេត្ត កម្លាំងស្នងការដ្ឋាននគរបាលខេត្ត ដោយមានរថយន្តស៊ឺរ៉ែនការពារសុវត្ថិភាពអ្នកទោសរហូតដល់ទិសទី ។ លោក អ៊ុង ស៊ីផាន បញ្ជាក់ថា នៅថ្ងៃទី១៣ ខែតុលាម្សិលមិញនេះដែរ ក៏បានដោះលែងអ្នកទោសចំនួន៤នាក់ ក្នុងនោះស្រី្តម្នាក់ដែលបានផុតកំណត់ទោសក្នុងពន្ធនាគារ ។
ចែករំលែកព័តមាននេះ