អ្នកមិនចាំបាច់ត្រូវឆ្លតកាត់មហាវិទ្យាល័យដើម្បីមានផ្នត់គំនិតបែបសហគ្រិនទេ។ មនុស្សមួយចំនួនមានវាពីកំណើត។ ផ្នត់គំនិតទាំងនេះជំរុញឲ្យមនុស្សចាប់ផ្តើមធ្វើអ្វីដែលថ្មី ដោះស្រាយបញ្ហាដែលពួកគេមើលឃើញ និងចេញសកម្មភាពដោយខ្លួនឯង។ មនុស្សមួយចំនួនទៀតត្រូវខិតខំប្រឹងប្រែងដើម្បីបណ្តុះវាបាន។
មិនថាអ្នកកំពុងតែមានគម្រោងចង់ចាប់ផ្តើមអាជីវកម្មមួយដោយខ្លួនឯងក្នុងពេលខាងមុខ ឬកំពុងតែគ្រប់គ្រងអាជីវកម្មរួចជាស្ត្រេចទេ ការពង្រឹងផ្នត់គំនិតនេះនឹងផ្តល់នូវអត្ថប្រយោជន៍ជាច្រើនដល់អ្នក ។ ខាងក្រោមគឺជាគន្លឹះងាយៗដែលនឹងជួយឲ្យអ្នកបណ្តុះ និងពង្រឹងផ្នត់គំនិតនេះ៖
១. ផ្តល់អាទិភាពលើការរៀនសូត្រ និងការលូតលាស់
វាងាយស្រួលណាស់ក្នុងការមើលទៅកាន់សហគ្រិនម្នាក់និងគិតថាពួកគេបានជោគជ័យនិងមានគម្រោងការច្បាស់លាស់អស់ហើយ។ ប៉ុន្តែសហគ្រិនដែលជោគជ័យពិតប្រាកដជាមនុស្សដែលទទួលស្គាល់ថាពួកគេមិនអាចដឹងពីអ្វីៗគ្រប់សព្វបែបយ៉ាងបានឡើយ។ ពួកគេតែងតែព្យាយាមរៀនដើម្បីទទួលបានចំណេះដឹង និងគំនិតថ្មីៗជានិច្ច។
សហគ្រិនត្រូវតែទុកការរៀនសូត្រជាមផ្នែកមួយសំខាន់នៃការរស់នៅប្រចាំថ្ងៃ។ ជារៀងរាល់ថ្ងៃ អ្នកត្រូវតែចំណាយពេលក្នុងការអានអត្ថបទ ឬសៀវភៅដែលនឹងជួយបង្កើនចំណេះដឹង ពង្រឹងជំនាញ និងជំរុញទឹកចិត្តរបស់អ្នក។
២. ទទួលយកហានិភ័យ
រាល់ពេលដែលអ្នកធ្វើអ្វីដែលមានហានិភ័យ អ្នកអាចទទួលបានលទ្ធផលពីរ គឺអ្នកអាចនឹងឈ្នះ ឬអ្នកនឹងរៀនសូត្រ។ រាល់ការបរាជ័យគឺជាមេរៀនល្អបំផុតសម្រាប់មនុស្សគ្រប់គ្នា។ វាជាឱកាសក្នុងការលូតលាស់ សម្របខ្លួន និងរៀនពីយុទ្ធសាស្ត្រថ្មីៗដែលអាចជួយឲ្យអ្នកជោគជ័យនៅថ្ងៃមុខ។ អ្នកមិនគួរជៀសវាងការបរាជ័យទេ ហើយប្រសិនបើអ្នកបរាជ័យ អ្នកត្រូវតែរៀនក្រោកឡើងវិញឲ្យបានលឿន។
៣. ចំណាយពេលជាមួយសហគ្រិនដទៃ
កត្តាដែលសំខាន់ជាងគេក្នុងជីវិតរបស់អ្នកគឺមនុស្សដែលនៅជុំវិញខ្លួនរបស់អ្នក។ ប្រសិនបើមនុស្សជុំវិញខ្លួនអ្នកជាមនុស្សដែលអវិជ្ជមាន ដែលតែងតែរអ៊ូរទាំថាពួកគេមិនអាចធ្វើអ្វីដើម្បីផ្លាស់ប្តូរស្ថានការខ្លួននោះ អ្នកនឹងចាប់ផ្តើមមានអារម្មណ៍ដូចគ្នាដែរ។ ប៉ុន្តែប្រសិនបើអ្នកនៅជិតមនុស្សដែលមានកម្លាំង និងវិជ្ជមាន កត្តាល្អៗទាំងនេះនឹងជ្រាបដល់អ្នកដែរ។
អ្នកគួរតែបង្កើតទំនាក់ទំនងជាមួយសហគ្រិនដែលយល់ពីស្ថានការរបស់អ្នកដើម្បីឲ្យអ្នកអាចរៀនពីការជោគជ័យ និងការបរាជ័យរបស់ពួកគេ។ រកអ្នកណែនាំ ឬអ្នកជំនាញដទៃដែលអ្នកអាចរៀនសូត្រតាមបាន។ ការធ្វើដូច្នេះអាចបង្កើនឱកាសឲ្យអ្នកជួបដៃគូអាជីវកម្មបានថែមទៀតផង ៕
ចែករំលែកព័តមាននេះ