រាជធានីភ្នំពេញ ៖ ជនជាមុខសញ្ញាប្រព្រឹត្តអំពើចោរកម្មគាស់ឃ្លាំងលួចទ្រព្យសម្បត្តិចំនួន៥នាក់ បានត្រូវនគរបាលខណ្ឌដង្កោនិងប៉ុស្តិ៍ដង្កោ ចាប់ឃាត់ខ្លួនបាន ក្នុងពេលក្រុមជននេះជិះម៉ូតូសណ្ដោងរ៉ឺម៉ក២គ្រឿងចេញទៅធ្វើសកម្មភាពគាស់ឃ្លាំងមួយកន្លែងលួចយកទ្រព្យសម្បត្តិ ។
ប៉ុន្តែខណៈជនទាំងនោះកំពុងធ្វើសកម្មភាពជាក់ស្ដែង កម្លាំងនគរបាលខណ្ឌនិងប៉ុស្តិ៍ខាងលើក៏ល្បាតទៅដល់ដែរ ហើយធ្វើការឡោមព័ទ្ធចាប់ក្របួចបានទាំងសម្បុកបែបនេះតែម្ដង ។ហេតុការណ៍នេះ កើតឡើងកាលពីវេលាម៉ោងប្រមាណ១និង៣០នាទីរំលងអធ្រាត្រឈានចូលថ្ងៃទី៩ ខែតុលា ឆ្នាំ២០២០ នៅចំណុចឃ្លាំងគ្មានលេខមួយកន្លែង ស្ថិតនៅតាមផ្លូវលេខ២១៧ ក្នុងភូមិខ្វា សង្កាត់ដង្កោ ខណ្ឌដង្កោ ។
នគរបាលឲ្យដឹងថា ជនសង្ស័យទាំង៥នាក់នេះមាន ៖ ១-ឈ្មោះ តុង ឡៃ ភេទប្រុស អាយុ២៩ឆ្នាំ
មុខរបរមិនពិតប្រាកដ ស្នាក់នៅផ្ទះជួលក្នុងភូមិដំណាក់ធំ សង្កាត់ស្ទឹងមានជ័យទី៣ ខណ្ឌមាន
ជ័យ, ២-ឈ្មោះ ព្រុំ វណ្ណរិទ្ធ ភេទប្រុស អាយុ១៩ឆ្នាំ, ៣-ឈ្មោះ បូ ភារ៉ា ភេទប្រុស អាយុ២៤ឆ្នាំ, ៤-ឈ្មោះ មាស ស្នា ភេទប្រុស អាយុ១៨ឆ្នាំ និង៥-ឈ្មោះ ផាន់ សុផា ភេទប្រុស អាយុ១៨ឆ្នាំ ។ទាំង៤នាក់ក្រោយនេះ ស្នាក់នៅផ្ទះជួលក្នុងភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ ។
ប្រភពដដែលបន្តថា នៅពេលចាប់ខ្លួន សមត្ថកិច្ចបានដកហូតវត្ថុតាងមួយចំនួនមានដូចជា ដាវកែច្នៃចំនួន២ដើម សោចិញ្ចៀនចំនួន៣ រណារអារដែក១ ដង្កាប់១ ឧបករណ៍សម្រាប់កាត់ខ្សែភ្លើង១ ទួរណឺវីស១ កន្ត្រៃ១ ម៉ូតូគ្មានផ្លាកលេខ១គ្រឿងមានសណ្តោងកន្ទុយរ៉ឺម៉ក ម៉ូតូហុងដាសេ១០០កូរ៉េ១គ្រឿង ពណ៌ក្រហម គ្មានផ្លាកលេខសណ្តោងរ៉ឺម៉កដែរ ដែករនាំងបង្អួច១ផ្ទាំង និងដែកចម្រឹងបង្អួចបាក់ជាកំណាត់ៗមួយចំនួនទៀត ។
នគរបាលឲ្យដឹងទៀតថា ឃ្លាំងខាងលើនោះត្រូវបានម្ចាស់បិទទ្វារចោលពុំមានអ្នកយាមនោះទេ ហើយនៅវេលារំលងអធ្រាត្រឈានចូលថ្ងៃទី៩ ខែតុលា ឆ្នាំ២០២០ ជនសង្ស័យទាំង៥នាក់បានជិះម៉ូតូសណ្តោងរ៉ឺម៉កទាំង២គ្រឿងទៅឈប់ជិតនោះ រួចលោតផ្លោះរបងចូលទៅធ្វើសកម្មភាពគាស់ទម្លុះទម្លាយឃ្លាំងខាងលើដោយប្រើសោចិញ្ចៀនគាស់បំបែកមេសោរចាក់ទ្វារឃ្លាំងចូលលួចយកទ្រព្យសម្បត្តិនៅខាងក្នុង ។ គាប់ជួនពេលនោះ កម្លាំងនគរបាលប៉ុស្តិ៍ដង្កោ និងនគរបាលខណ្ឌដង្កោ ដែលកំពុងល្បាតតាមផ្លូវលេខ២១៧ឃើញ ក៏ធ្វើការឡោមព័ទ្ធឃាត់ខ្លួនបានទាំង៥នាក់ រួមជាមួយវត្ថុតាង រួចនាំយកទៅសាកសួរនិងចាត់ការតាមច្បាប់ ៕
ចែករំលែកព័តមាននេះ