ផ្នត់គំនិតពិសេសដែលជួយបង្កើនប្រសិទ្ធភាពការងាររបស់អ្នក
យោងទៅតាមសាស្ត្រាចារ្យ អេមី អេដម៉ុនសាន់ (Amy Edmondson) ដែលជាសាស្ត្រាចារ្យផ្នែកភាពជាអ្នកដឹកនាំ និងគ្រប់គ្រងនៅ Harvard Business School…
យោងទៅតាមសាស្ត្រាចារ្យ អេមី អេដម៉ុនសាន់ (Amy Edmondson) ដែលជាសាស្ត្រាចារ្យផ្នែកភាពជាអ្នកដឹកនាំ និងគ្រប់គ្រងនៅ Harvard Business School បានប្រាប់មកថា សុវត្ថិភាពផ្នែកសតិមានសារៈសំខាន់ណាស់សម្រាប់ភាពជោគជ័យក្នុងក្រុម។
សុវត្ថិភាពផ្នែកសតិមានន័យថាជាកន្លែងការងារដែលមនុស្សម្នាក់មានអារម្មណ៍ថាខ្លួនអាចបញ្ចេញមតិបានគ្រប់ពេលមិនថាទាក់ទិននឹងព័ត៌មានមិនល្អ សំណួរ កង្វល់ គំនិតដែលមិនទាន់មានរូបរាងច្បាស់លាស់ ឬកំហុសឆ្គងណាមួយ។ហើយខាងក្រោមនេះគឺជាវិធីសាស្ត្រដែលអាចជួយជំរុញឲ្យមានសុវត្ថិភាពផ្នែកសតិនេះ៖
១. ទទួលស្គាល់អ្វីដែលខ្លួនមិនចេះ
ការបញ្ចេញមតិតម្រូវឲ្យអ្នកបង្ហាញភាពទន់ខ្សោយ ដែលជាចំណុចមួយធ្វើឲ្យមនុស្សភាគច្រើនព្យាយាមជៀសវាង ជាពិសេសអ្នកដែលទើបតែចាប់ផ្តើមអាជីពថ្មី។ នេះជាហេតុដែលអ្នកចូលធ្វើការថ្មីភាគច្រើនជ្រើសរើសរក្សាភាពស្ងៀមស្ងាត់ទោះជាខ្លួនមានមតិចង់បញ្ចេញពិតមែនក្តី ។ ប៉ុន្តែសាស្ត្រាចារ្យខាងលើបានផ្តល់យោបល់មកថា អ្នកមិនចាំបាច់ធ្វើពុតថាខ្លួនចេះអ្វីៗគ្រប់បែបយ៉ាងទេ។ ពេលដែលអ្នកដឹកនាំបើកទូលាយពីចំណុចខ្វះខាត ឬកំហុសឆ្គងរបស់ខ្លួននោះ អ្នកដទៃអាចនឹងចាប់ផ្តើមបើកទូលាយផងដែរ។
២. ឆ្លើយតបទៅនឹងបញ្ហាឲ្យបានល្អ
ពេលដែលអ្នកជួបប្រទះនឹងបញ្ហាអ្វីមួយ អ្នកត្រូវតែតាមដានការឆ្លើយតបរបស់ខ្លួន និងព្យាយាមរកចម្លើយដែលល្អសម្រាប់មនុស្សគ្រប់គ្នា។ អ្នកមិនចាំបាច់កុហកថាវាមិនមែនជាបញ្ហាធំទេ ប៉ុន្តែអ្នកត្រូវតែចេះទទួលស្គាល់ និងគោរពមនុស្សដែលបាននិយាយការពិត។
៣. រៀបប្រៀបច្ចេកវិទ្យា
ប្រសិនបើកន្លែងការងាររបស់អ្នកធ្វើការទាក់ទងគ្នាច្រើនតាមប្រព័ន្ធអេឡិចត្រូណិចនោះ អ្នកត្រូវចាំថាការទាក់ទងគ្នាបែបនេះគឺមិនដូចការទាក់ទងគ្នាផ្ទាល់ទេ ហើយអ្នកត្រូវតែបង្កើតឱកាសថ្មីៗដើម្បីឲ្យមនុស្សពង្រឹងទំនាក់ទំនងជាមួយគ្នា។ ការធ្វើដូច្នេះអាចជំរុញឲ្យបុគ្គលិកចូលរួម និងគិតឃើញគំនិតល្អៗ ៕
ចែករំលែកព័តមាននេះ