រាជធានីភ្នំពេញ ៖ រដ្ឋបាលរាជធានីភ្នំពេញអំពាវនាវឱ្យកម្មករប្រមូលសំរាមចូលធ្វើការងារជាធម្មតាវិញដោយក្រសួងការងារ និងបណ្តុះបណ្តាលវិជ្ជាជីវៈ នឹងផ្តល់ប្រាក់អតីតភាពការងារទៅតាមដំណាក់កាល ហើយកម្មករនៅតែទទួលបានឱកាសការងារថ្មី នៅពេលក្រុមហ៊ុនចំនួន៣បើកប្រតិបត្តិការប្រមូលសំរាម។
នៅក្នុងពិធីសម្ពោធដាក់អោយប្រើប្រាស់អគារទីចាត់ការបឋមសិក្សា សន្ធម៉ុក នៅព្រឹកថ្ងៃទី៦ ខែតុលានេះ លោក ឃួង ស្រេង អភិបាលរាជធានីភ្នំពេញ បានមានប្រសាសន៍ថា នៅប៉ុន្មានថ្ងៃនេះមានការកកស្ទះសំរាម ដោយសារកម្មករក្រុមហ៊ុនស៊ីនទ្រី បានធ្វើកូដកម្មទាមទារប្រាក់អតីតភាព ដែលចំណុចនេះក្រសួងការងារ បានជម្រាបជូនថា ប្រាក់អតីតភាពក្រសួងនឹងផ្តល់ជូនតាមដំណាក់កាល ខណៈដែលកម្មករទាំងអស់នោះ សុំបើកប្រាក់នោះផ្តាច់តែម្តងហើយឈប់ធ្វើការ ។
លោកបន្តថា ការទាមទារបែបនេះដោយសារពួកគាត់យល់ថា នៅថ្ងៃអនាគតដ៏ខ្លីនេះរដ្ឋបាលរាធានីភ្នំពេញ នឹងធ្វើការដេញថ្លៃយកក្រុមហ៊ុនចំនួន៣មកប្រតិបត្តិការប្រមូលសំរាម ហើយគាត់គិតថាគាត់មិនបានចូលវធ្វើការងារបន្ត ។
លោក ឃួង ស្រេង បានផ្ញើរសារជូនកម្មករ កម្មការិនីទាំងអស់ថា ការបង្កើតឱ្យមានក្រុមហ៊ុនប្រមូលសំរាមចំនួនបីតំបន់នេះ គឺដើម្បីធ្វើយ៉ាងណាឱ្យការសំរាមក្នុងរាជធានីភ្នំពេញ មានភាពលឿនរហ័សបញ្ចៀសការកកស្ទះ ខណៈដែលក្រុមហ៊ុនទាំងអស់នោះ នឹងយកកម្មកររបស់ក្រុមហ៊ុនស៊ីនទ្រីដែលមានការជួយពីរដ្ឋបាលរាជធានីភ្នំពេញមកបំរើការងារដ៏ដែរ ។
លោក ឃួង ស្រេង បញ្ជាក់ថា «ខ្ញុំសូមផ្ញើរសារជូនកម្មករ កម្មការិនី អ្នកប្រមូលសំរាមនៅក្នុងរាជធានីភ្នំពេញថា មិនដូចការគិតរបស់គាត់ទេ កិច្ចការងារយកសំរាម ក្រុមហ៊ុនថ្មីមកក៏ត្រូវការកម្មករហើយកម្មករនឹងបន្តអតីតភាពដោះស្រាយនៅដដែល ឧទាហរណ៍ក្រុមហ៊ុនស៊ីនទ្រីដេញបានតំបន់ណាមួយនោះក្រុមហ៊ុនប្រតិបត្តិនៅតំបន់នោះ បើកម្មករលើសអាចដាក់ពាក្យទៅក្រុមហ៊ុនថ្មីមួយទៀតដែលមានការជួយជ្រុមជ្រែងពីរដ្ឋបាលរាជធានីភ្នំពេញ ហើយប្រាក់អតីតភាពគឺមិនឱ្យគាត់មានការបាត់បង់ទេ សូមឱ្យគាត់ចូលធ្វើការ វិញ» ។
លោកបន្តថា ដើម្បីដោះស្រាយបញ្ហាចំពោះមុខនេះ អាជ្ញាធររាជធានីភ្នំពេញបានបញ្ចេញរថយន្តប្រមូលសំរាមដែលទើបនឹងទិញថ្មីចំនួន៧០គ្រឿង រួមជាមួយកំលាំងសន្តិសុខ និង ប្រជាការពារ រាប់សិបនាក់ ដើម្បីចេញប្រតិបត្តការប្រមូលសំរាមក្នុងរាជធានីភ្នំពេញ។
លោក ឃួង ស្រេង អំពាវនាវឱ្យប្រជាពលរដ្ឋទាំងអស់ វេចខ្ចប់ ទុកដាក់ និងបញ្ចេញសំរាមរបស់ខ្លួនឱ្យបានត្រឹមត្រូវ ដើម្បីបញ្ចៀសការកកស្ទះសំរាម សំណល់រឹង ខណៈដែលរដ្ឋបាលរាជធានីភ្នំពេញ កំពុងតែឱ្យអាជ្ញាធរខណ្ឌទាំង១៤ ប្រមូលតាមខណ្ឌរៀងៗខ្លួន ។
សូមបញ្ជាក់ថា ចាប់តាំងពីល្ងាចថ្ងៃទី២ ខែ តុលា ឆ្នាំ ២០២០ រហូតមកដល់ពេលនេះ កម្មករប្រមូលសំរាមរបស់ក្រុមហ៊ុន ស៊ីនទ្រី បាននឹងកំពុងធ្វើកូដកម្ម ដោយមិនចេញប្រមូលសំរាម ដែលធ្វើឱ្យមានសំរាមកកស្ទះនៅតាមដងផ្លូវនានាក្នុងរាជធានីភ្នំពេញ ៕ (កែសម្រួលដោយ ៖ ធីតា)
ចែករំលែកព័តមាននេះ