ខេត្តបាត់ដំបង ៖ អព្ភូតហេតុកម្រប្រទះឃើញមួយនៅលើលំហមេឃ បានធ្វើឱ្យមានការភ្ញាក់ផ្អើលគួរឱ្យកត់សម្គាល់ នៅក្រុងបាត់ដំបង កាលពីវេលាម៉ោង៧និង៤៥នាទីព្រឹក ថ្ងៃទី១ មេសា ដោយប្រជាពលរដ្ឋ បន្ទាប់ពីបានឃើញព្រះអាទិត្យបានរះឡើងបំភ្លឺដែនពសុធានោះ បែរជាមានពន្លឺផ្សេងៗ ប្រៀបដូចជាព្រះអាទិត្យបែងភាគ ។ អ្នកតាមដានពីអព្ភូតហេតុនេះ និយាយថា នៅពេលទើបតែរះឡើងនោះ អាចមើលឃើញព្រះអាទិត្យ៣ ដ៏ចម្លែក ។ លុះរះឡើងខ្ពស់នៅម៉ោងជាង៨ព្រឹក ក៏បានឃើញពន្លឺពេញវង់ មានទាំង៥ ។
គ្មានការបញ្ជាក់ណាមួយពីអ្នកជំនាញបច្ចេកទេស ឬពីអ្នកវិទ្យាសាស្ត្រណាមួយដើម្បីឱ្យដឹងពីមូលហេតុនេះបានឡើយ ។ គ្រាន់តែអ្នកខ្លះ បានគិតទៅតាមអបិយជំនឿថា ប្រាកដជាមានប្រផ្នូលអ្វីមួយកើតឡើងនៅថ្ងៃណាមួយមិនខាន ។
អ្នកខ្លះបានគិតតាមបែបវិទ្យាសាស្ត្រថា នេះជាចំណាំងផ្លាតរវាងពន្លឺព្រះអាទិត្យ និងផ្ទៃទឹកភ្លៀង ឬទឹកកក ដែលមាននៅលើលំហអាកាសដែលនៅជុំវិញព្រះអាទិត្យ បណ្តាលឱ្យមានការចែងចាំងជះមកលើភពផែនដីតែប៉ុណ្ណោះ ។ តាមអព្ភូតហេតុនេះដែរ តាមភាសាវិទ្យាសាស្ត្រហៅថា Parhelion គឺជាបាតុភូតសម្ពាធបរិយាកាស ដែលកើតឡើងដោយសារចំណាំងផ្លាតរវាងព្រះអាទិត្យ និងគ្រីស្តាល់ទឹកកក ។ អព្ភូតហេតុបែបនេះ មិនមែនកើតមានតែនៅកម្ពុជាទេ ប្រទេសមួយចំនួនក៏ធ្លាប់ឃើញធម្មជាតិចម្លែកបែបនេះដែរ ។
នៅវេលាម៉ោង៨គត់ ព្រះអាទិត្យដែលបានចែងចាំងឃើញចំនួន៣នោះ បានប្រែប្រួលទៅជាចំនួន៥នៅវេលាម៉ោង៨និង៣០នាទី តាមរង្វង់មូល ដែលភាគច្រើនគេហៅថាឥន្ធនូ ដែលនៅខាងកើតមានចំនួន៣ និងខាងជើងមាន១ និងខាងត្បូងមានមួយ ។ ក្នុងរង្វង់មូលនោះហើយមានពន្លឺបែកជា៥នោះ បានបាត់ទៅវិញនៅវេលាម៉ោង៩ព្រឹក ។
តាមបែបវិទ្យាសាស្ត្រ អ្នកខ្លះអះអាងថា ជាដំណើររបស់ព្រះអាទិត្យ ដែលដើរមកផុតពន្លឺចំណាំងផ្លាតនៃផ្ទៃទឹក ។ បន្ទាប់ពីបាត់ពន្លឺទាំង៥ហើយ នៅសល់តែពន្លឺព្រះអាទិត្យមួយប៉ុណ្ណោះ ដែលបានបញ្ចេញរស្មីមកក្តៅហែងដូចថ្ងៃធម្មតា ។
ទោះបីជាបែបនេះក្តី នៅវេលារសៀលម៉ោង៣ក្នុងថ្ងៃដដែលនោះ មេឃចាប់ផ្តើមស្រទំ ងងឹតជុំវិញក្រុងបាត់ដំបង តែគ្មានភ្លៀងធ្លាក់ទេ គឺមានតែខ្យល់បក់ រកកលចង់ភ្លៀងប៉ុណ្ណោះ តាមស្ថានភាពនេះ ត្រូវបានរំពឹងថា ភ្លៀងកក់ខែ នឹងបង្អុរមកនាប៉ុន្មានថ្ងៃខាងមុខមិនខាន ៕
ចែករំលែកព័តមាននេះ