រាជធានីភ្នំពេញ ៖ បុរសម្នាក់សង្ស័យមានវិបត្តិរឿងប្រពន្ធសុំលែងលះ ហើយកូនទើបតែចែកឋានចោលទៀត ធ្វើឱ្យគាត់គិតខ្លី រហូតសម្រេចចិត្តលោតពីលើផ្ទះជាន់ទី២ ធ្លាក់ទើរលើដំបូលផ្ទះជាន់ទី១រមៀលធ្លាក់ដល់ជាន់ផ្ទាល់ដី បណ្តាលឱ្យរងរបួសធ្ងន់ ។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោង៧និង៣០នាទីយប់ថ្ងៃទី២០ ខែកញ្ញា ឆ្នាំ២០២០ នៅចំណុចផ្ទះល្វែងមួយកន្លែង តាមបណ្តោយផ្លូវបេតុង ស្ថិតក្នុងសង្កាត់ទួលសង្កែ1 ខណ្ឌឬស្សីកែវ រាជធានីភ្នំពេញ ។
ជនរងគ្រោះឈ្មោះម៉ាត យ៉ាលីន ភេទប្រុស អាយុ៣១ឆ្នាំ ស្នាក់នៅផ្ទះកើតហេតុខាងលើ ។
តាមប្រភពព័ត៌មានពីបុរសម្នាក់ឈ្មោះសៀវ ពិសិដ្ឋ អាយុ៤០ឆ្នាំ ស្នាក់នៅក្បែរផ្ទះកើតហេតុខាងលើបានអោយដឹងថា មុនពេលកើតហេតុ គាត់បានឮសំឡេងប្រាវនៅលើដំបូលហើយធ្លាក់ចុះមកដល់ដី លុះគាត់ចេញទៅមើល ស្រាប់តែឃើញបុរសរងគ្រោះដួលដេកនៅលើដីសន្លប់ និងរងរបួសបាក់ចង្កេះយ៉ាងធ្ងន់ធ្ងរ ។ ភ្លាមៗនោះ គាត់ក៏បានទំនាក់ទំនងហៅសមត្ថកិច្ចប៉ុស្តិ៍ទួលសង្កែ១អោយចុះមកជួយអន្តរាគមន៍ និងទំនាក់ទំនងហៅរថយន្តសង្គ្រោះរបស់មន្ទីរពេទ្យឱ្យដឹកយកជនរងគ្រោះយកទៅសង្គ្រោះ ។
តាមប្រភពដដែលបានបន្តទៀតថា នៅពេលជនរងគ្រោះធ្លាក់ចុះមកដល់ដីភ្លាមៗមិនទាន់សន្លប់នៅឡើយទេ ខណៈនោះគាត់ក៏បានសួរនាំជនរងគ្រោះថា «ហេតុអីបានលោតពីលើផ្ទះបែបនេះ?» ហើយបុរសរងគ្រោះបាននិយាយថា «មកពីពិបាកចិត្តពេក ព្រោះប្រពន្ធនៅខេត្តបាត់ដំបងបានសុំលែងលះ ហើយកូនទើបតែចែកឋានចោលទៀត» ។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះដឹកយកទៅសង្គ្រោះនៅមន្ទីរពេទ្យកាលម៉ែត្រ ។
សូមបញ្ជាក់ថា កន្លងមក បុរសរងគ្រោះប្រើប្រាស់ថ្នាំញៀនរហូតម្តាយចាប់យកទៅដាក់នៅមណ្ឌលកែប្រែដែរ តែដោយសារមិនមានលទ្ធភាពបង់ប្រាក់ក៏យកចេញមកវិញ រួចហើយអោយមកនៅផ្ទះវិញជាមួយម្តាយ និងប្អូនស្រីម្នាក់ទៀត លុះមកដល់វេលាកើតហេតុខាងលើ ស្រាប់តែបុរសរងគ្រោះសម្រេចចិត្តគិតខ្លីលោតចុះពីលើផ្ទះជាន់ទី២ បណ្តាលឱ្យរបួសធ្ងន់តែម្តង ។ ថ្វីដ្បិតតែជនរងគ្រោះប្រើប្រាស់ថ្នាំញៀនពិតមែន ប៉ុន្តែមិនដែលរករឿងអ្នកណានោះទេ នៅពេលមានវិបត្តិផ្លូវចិត្ត មិនមានអ្នកណាជួយដោះស្រាយ ទើបបុរសរងគ្រោះសម្រេចចិត្តគិតខ្លីលោតពីលើផ្ទះតែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ