រាជធានីភ្នំពេញ ៖ ទោះបីជាមិនបានបញ្ជាក់ពេលវេលាជាក់លាក់ក្តី អតីតមេបក្សប្រឆាំងលោក សម រង្ស៊ីបានប្រកាសជាថ្មីថា ខ្លួននឹងវិលមកស្រុកខ្មែរវិញឲ្យទាល់តែបាន នាពេលខាងមុខ ទោះបីជាមានការរារាំងយ៉ាងណាក្តី ។…
រាជធានីភ្នំពេញ ៖ ទោះបីជាមិនបានបញ្ជាក់ពេលវេលាជាក់លាក់ក្តី អតីតមេបក្សប្រឆាំងលោក សម រង្ស៊ីបានប្រកាសជាថ្មីថា ខ្លួននឹងវិលមកស្រុកខ្មែរវិញឲ្យទាល់តែបាន នាពេលខាងមុខ ទោះបីជាមានការរារាំងយ៉ាងណាក្តី ។
យ៉ាងណាក្តី វាហាក់មិនមែនជារឿងចម្លែកនោះទេ ចំពោះការប្រកាសថា នឹងវិលចូលប្រទេសកម្ពុជាវិញនោះព្រោះលោក សម រង្ស៊ី ធ្លាប់អះអាងបែបនេះច្រើនលើកច្រើនសារមកហើយ តែមិនដែលបានវិលចូលស្រុកដូចពាក្យលោកអះអាងនោះទេ ។
យោងតាមវីដេអូឃ្លីបប្រមាណជាង៤នាទី កាលពីថ្ងៃទី២០ ខែកញ្ញា ឆ្នាំ២០២០ លោក សម រង្ស៊ីបានលើកឡើងយ៉ាងដូច្នេះថា «ខ្ញុំចង់និយាយការធ្វើនិវត្តន៍មាតុភូមិរបស់ខ្ញុំ បន្ទាប់ពីឃើញសាររបស់បងប្អូនថា ចាំតែសម រង្ស៊ី ចាំតែលោកប្រធានមកទេ ប្រជារាស្ត្រនឹងមកហើយ ព្រោះថា ចង់ងើបយូរហើយ តែចាំឱកាសចាំតែមេមកដល់» ។
លោក សម រង្ស៊ី ដែលកំពុងជាប់បណ្តឹងជាច្រើនជាមួយមន្ត្រីជាន់ខ្ពស់រាជរដ្ឋាភិបាល ហើយក៏មានដីការចាប់ខ្លួនផងដែរ បានអះអាងថា យ៉ាងដូច្នេះថា «ខ្ញុំនឹងវិលមកប្រទេសកម្ពុជាក្នុងពេលឆាប់ៗខាងមុខនេះ ប៉ុន្តែខ្ញុំមិនប្រាប់មុនទេ ។ ទៅដល់ គឺទៅដល់ភ្លាម ហើយសូមបងប្អូនត្រៀមខ្លួនត្រៀមលក្ខណៈបងប្អូនរួមកំលាំងគ្នា» ។
ប្រាកដណាស់នេះ មិនមែនជាលើកទី១ ទេដែលអតីតមេបក្សប្រឆាំង លោក សម រង្ស៊ី និយាយថា វិលចូលស្រុកនោះ លោកធ្លាប់បានអះអាងម្តងហើយម្តងទៀតថា នឹងមកកម្ពុជាយ៉ាងណាក្តី តែថ្នាក់ដឹកនាំគណបក្សប្រជាជនកម្ពុជាធ្លាប់បានបញ្ជាក់ហើយថា មិនរារាំងលោក សម រង្ស៊ី ឡើយ គឺស្វាគមន៍ឲ្យចូលស្រុកជានិច្ច ដើម្បីឲ្យលោក សម រង្ស៊ី អនុវត្តទោសនៅពន្ធនាគារ សម្រាប់ការរកឃើញថាបានប្រព្រឹត្តបទល្មើសជាច្រើននោះ ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងប្រាប់សារព័ត៌មានកោះសន្តិភាព កាលពេលកន្លងមកថា ស្វាគមន៍ជានិច្ចចំពោះការវិលស្រុកវិញនេះ ប៉ុន្តែលោក សម រង្ស៊ី នឹងត្រូវចាប់ខ្លួនបញ្ជូនចូលពន្ធនាគារ ដោយសារតែអតីតមេបក្សប្រឆាំងនេះត្រូវបានតុលាការចេញការចាប់ខ្លួនរួចហើយ ។
សូមរម្លឹកថាតុលការបានកាត់ទោសលោក សម រង្ស៊ី ជាច្រើនករណី ជុំវិញបណ្តឹងជាច្រើននៅកម្ពុជាពាក់ព័ន្ធនឹងបទល្មើសញុះញង់ និងបទល្មើសផ្សេងទៀតផងដែរ ។ លោក សុខ ឥសានក៏បានធ្លាប់លើកឡើងថាលោក សម រង្ស៊ី បានភូតកុហកអ្នកគាំទ្រជាច្រើនលើកច្រើនសាររហូតមានអ្នកគាំទ្រខ្លះអស់ជំនឿ ហើយអ្នកគាំទ្រខ្លះបានសម្រេចចិត្តទៅបង្កើតគណបក្សនយោបាយថ្មី និងមកចុះចូលជាមួយគណបក្សកាន់អំណាចក៏មានផងដែរ ។
សូមរម្លឹកថា លោក សម រង្ស៊ី ធ្លាប់បានប្រកាសចូលស្រុកវិញកាលពីថ្ងៃទី ៩ ខែវិច្ឆិកា ឆ្នាំ២០១៩ម្តងមកហើយថាចូលស្រុក ប៉ុន្តែទណ្ឌិតរូបនេះមិនបានវិលស្រុក តាមការសន្យានោះទេ ៕
ចែករំលែកព័តមាននេះ