ជិះទូក​កម្សាន្ត​សុខ​ៗ បុរស​ម្នាក់​រអិល​ជើង​​ធ្លាក់​ចូល​ទន្លេ​ឆោឡោ​ពេញ​លើ​ទូក


រាជធានី​ភ្នំពេញ ៖ បុរស​ជា​ជនជាតិ​ចិន​មួយ​ក្រុម​បាន​នាំ​គ្នា​ទៅ​ជិះទូក​ទេសចរណ៍ ដើម្បី​កម្សាន្ត​តាម​ដង​ទន្លេ និង​បាន​ផឹកស៊ី​ស្រវឹង​ផង​ដែរ ដោយ​មិន​បាន​ប្រយ័ត្ន បណ្តាល​ឲ្យ​បុរស​ជនជាតិ​ចិន​ម្នាក់​រអិល​ជើង​ធ្លាក់​ចូល​ក្នុង​ទន្លេ​បាត់​ស្រមោល​តែ​ម្តង បង្ក​ឲ្យ​មានការ​ភ្ញាក់ផ្អើល​ដល់​សមត្ថកិច្ច​ចុះ​ទៅ​ធ្វើការ​ស្រាវជ្រាវ​រុករក​កាលពី​ម៉ោង​11​និង​15​នាទី​យប់ ថ្ងៃ​ទី​20 ខែកញ្ញា ឆ្នាំ​2020 តាម​បណ្តោយ​ផ្លូវ​ព្រះ​ស៊ី​សុវត្ថិ នៅ​ចំណុច​មាត់ទន្លេ​ទល់មុខ​ព្រះ​បរមរាជវាំង ស្ថិត​ក្នុង​សង្កាត់​ជ័យ​ជំនះ ខណ្ឌដូនពេញ ។

បើ​តាម​សាក្សី​ដែល​ឃើញ​ហេតុការណ៍​បានឱ្យ​ដឹង​ថា មុន​ពេល​កើតហេតុ​ខាងលើ​នេះ គេ​បាន​ឃើញ​ជនជាតិ​ចិន​មួយ​ក្រុម​មាន​គ្នា​4​ទៅ​5​នាក់​បាន​នាំ​គ្នា​ឡើង​ទៅ​ជិះទូក​ទេសចរណ៍​កម្សាន្ត​លេង​តាម​ដង​ទន្លេ ដោយ​មានការ​ផឹកស៊ី​ស្រវឹងស្រា​ផង​ដែរ ។

សាក្សី​បន្ត​ថា គ្រានោះ មាន​ប្រុស​ជនជាតិ​ចិន​ម្នាក់​មិន​បាន​ប្រុង​ប្រយ័ត្ន ក៏​ស្រាប់តែ​រអិល​ជើង​ធ្លាក់​ចូល​ក្នុង​ទន្លេ​បាត់​ស្រមោល​តែ​ម្តង ភ្លាម​ៗ​នោះ​ផង​ដែរ មិត្តភក្តិ​ផ្សេង​ទៀត​រប​ស់បុរសជន​ជាតិចិន​ដែល​ជា​ជន​រង​គ្រោះ​បាន​នាំ​គ្នា​ផ្អើល​ឆោឡោ​ពេញ​លើ​ទូក និង​បាន​ជួល​ទូក​អ្នកនេសាទ ថែម​ទាំង​កាណូត​របស់​សមត្ថកិច្ច​ផ្នែក​ចរាចរណ៍​ផ្លូវទឹក ដើម្បី​រុករក​ជន​រង​គ្រោះ ប៉ុន្តែ​ដើរ​រក​យ៉ាង​ក៏​រក​មិន​ឃើញ​ដែរ ដោយសារ​តែ​នៅ​មាត់ទន្លេ​មាន​ខ្យល់​ផង និង​រលក​ទឹកទន្លេ​ខ្លាំង​ផង​នោះ ទើប​ធ្វើ​ឱ្យ​ការ​រុករក​ជាង​មួយ​ម៉ោង​ទៅ​ហើយ មិនដឹង​ថា ជន​រង​គ្រោះរ​សាត់អណ្តែត​ទៅ​ដល់​ទីណា​នោះ​ទេ ។

ក្រោយ​ពេល​កើតហេតុ​ខាងលើ​នេះ សមត្ថកិច្ច​នឹង​ធ្វើការ​ស្រាវជ្រាវ​ជា​បន្ត​ទៅ​ទៀត​នៅ​ព្រឹកស្អែក គឺ​ថ្ងៃ​ទី​២១ ខែកញ្ញា​នេះ​ផង​ដែរ ៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




    សូម​អរគុណ