ខេត្តកណ្តាល ៖ ជនសង្ស័យ២នាក់តែងតែធ្វើសកម្មភាពឆក់កាបូបពីអ្នកធ្វើដំណើរតែងតែបានសម្រេចនោះ ពេលនេះអស់លក្ខហើយ ដោយត្រូវបាននគរបាលស្រុកខ្សាច់កណ្តាលឃាត់ខ្លួនបាន ។ ហេតុការណ៍នេះបានកើតឡើងនៅថ្ងៃទី១៩ ខែកញ្ញា ឆ្នាំ២០២០ វេលាម៉ោង៥និង៣០នាទីល្ងាច នៅចំណុចភូមិភូមិព្រះប្រសប់ ឃុំព្រះប្រសប់ ស្រុកខ្សាច់កណ្តាល ខេត្តកណ្ដាល។
ជនសង្ស័យខាងលើ ១-ឈ្មោះ ហួត មករា ហៅប៊ី ភេទប្រុស អាយុ១៧ឆ្នាំ មុខរបរមិនពិតប្រាកដ ទីលំនៅភូមិបឹងជន្លេន ឃុំឫស្សីជ្រោយ ស្រុកមុខកំពូលខេត្តកណ្ដាល និង២-ឈ្មោះមិត្ត និមល ភេទប្រុស អាយុ១៨ឆ្នាំ មុខរបរមិនពិតប្រាកដ ទីលំនៅភូមិឈើទាលឃុំព្រែកអញ្ចាញ ស្រុកមុខកំពូលខេត្តកណ្ដាល។ ចំណែកជនរងគ្រោះឈ្មោះ ពេជ្រ ដាឡែន ភេទស្រី អាយុ១៩ឆ្នាំ មុខរបរលក់បាយ មានទីលំនៅភូមិប៉េប៉េសេ សង្កាត់ទឹកថ្លា ខណ្ឌសែនសុខ។
បើតាមនគរបាលស្រុកខ្សាច់កណ្ដាលបានអោយដឹងថា ៖ មុនពេលកើតហេតុ នៅថ្ងៃទី១៩ ខែកញ្ញា វេលាម៉ោង៤រសៀល បុរសម្នាក់ឈ្មោះ ខេង មករា ដែលត្រូវជាប្តីជនរងគ្រោះបានឌុបជនរងគ្រោះចេញពីផ្ទះបងប្អូននៅឃុំកំពុងពពិល ស្រុកពារាំង ខេត្តព្រៃវែង ក្នុងគោលបំណងត្រលប់មកផ្ទះឪពុកម្តាយខ្លួនវិញ នៅភូមិកណ្ដាល ឃុំស្វាយរមៀត ស្រុកខ្សាច់កណ្តាល ខណៈពេលនោះជនរងគ្រោះយួរកាបូបចំនួន១ ដែលមានប្រាក់ចំនួន៤០០ ០០០រៀល ទូរស័ព្ទ១គ្រឿង ម៉ាក IPhone7plus និងផោរើលប៊េងចំនួន១ផងដែរ។
នគរបាលបន្តថា លុះដល់ម៉ោង៥និង៣០នាទីល្ងាចថ្ងៃដដែល ខណៈពេលជនរងគ្រោះជិះម៉ូតូមកដល់មុខខ្លោងទ្វារវត្តបុទុមរង្សី ឬហៅវត្តតាមើម ក្នុងភូមិព្រះប្រសប់ ឃុំព្រះប្រសប់ ស្រាប់តែលេចមុខជនសង្ស័យឈ្មោះ ហួត មករា ជិះម៉ូតូម៉ាក SUZUKI NEX2 ឌុបជនសង្ស័យម្នាក់ទៀតឈ្មោះ មិត្ត និមល មកតាមក្រោយជនរងគ្រោះ រួចក៏ឆក់យកកាបូបយួរពីជនរងគ្រោះតែម្តង រួចក៏ជិះម៉ូតូគេចខ្លួនចូលទៅក្នុងវត្តព្រះប្រសប់បាត់ ។
ប្រភពដដែលបនត្ថា ពេលនោះជនរងគ្រោះបានស្រែកឆោឡោ និងជិះម៉ូតូដេញតាម ទើបសមត្ថកិច្ចនគរបាលប៉ុស្តិ៍ព្រះប្រសប់ ជួយអន្តរាគមន៍ឃាត់ខ្លួនជនសង្ស័យទាំងពីរនាក់នោះបាន រួមនឹងដកហូតវត្ថុតាង បន្ទាប់ក៏បញ្ជូនជនសង្ស័យទាំង២នាក់មកកាន់អធិការដ្ឋាននគរបាលស្រុកខ្សាច់កណ្តាល ដើម្បីបន្តអនុវត្តតាមនីតិវិធីច្បាប់ ។
ចែករំលែកព័តមាននេះ