ខេត្តកំពង់ចាម ៖ បុរសអ្នករត់កាណូតដរម្នាក់បានខឹងប្រពន្ធស្ដីបន្ទោសឱ្យក៏កើតទៅជារឿងក្តៅក្រហាយ ណាមួយដោយសារតែអំណាចស្រាចូលផងនោះ ក៏បានយកសាំងចាក់ដុតកាណូតឲ្យឆេះខ្ទេចខ្ទីអស់តែម្តង។ ប៉ុន្តែសំណាងល្អ ត្រូវបានប្រជាពលរដ្ឋរស់នៅក្បែរមាត់ទន្លេក្នុងភូមិព្រែកលីវទី៤ ឃុំរកាអារ ស្រុកកងមាស រួមនឹងសមត្ថកិច្ចឃើញក៏នាំគ្នាអន្តរាគមន៍ជួយពន្លត់ទាន់ពេល តែរងការខូចខាតអស់មួយផ្នែក ដោយទ្រាំទ្រនឹងទង្វើរបស់ប្ដីមិនបានស្ត្រីជាប្រពន្ធប្ដឹងសុំលែងលះដែលគ្រោងឲ្យធ្វើឡើងនៅថ្ងៃទី២១ កញ្ញា នេះតែម្តង។
លោកឡាយ តាំងហ៊ី មេឃុំរកាអា មានប្រសាសន៍ឱ្យដឹងនៅព្រឹកថ្ងៃទី២០ ខែកញ្ញា ឆ្នាំ២០២០នេះថា ពេលដែលរត់កាណូតដរទទឹងទន្លេមេគង្គបណ្ដើរ បុរសជាម្ចាស់កាណូតឈ្មោះជួន ចាន់ថន ហៅម៉ិច អាយុ៣៦ឆ្នាំ បាននាំគ្នាផឹកស្រាបៀរបណ្ដើរ ចាប់តាំងពីវេលាម៉ោង១០ព្រឹកម្ល៉េះ ដោយបានចម្លងអ្នកដំណើរពីស្រុកកងមាស ទៅកាន់ស្រុកស្រីសន្ធរ។ លុះរហូតមកដល់ពេលល្ងាចថ្ងៃដដែល (១៧ កញ្ញា) ពេលដែលចតកាណូតនៅមាត់ច្រាំងទន្លេ បុរសនេះក៏បានបន្តផឹកជាមួយមនុស្សចំនួន៤នាក់ទៀត ដែលជាមិត្តភក្កិរបស់ខ្លួន។
លោកមេឃុំរកាអារ មានបន្តឲ្យដឹងទៀតថា ស្របពេលដែលប្ដីកំពុងតែផឹកបន្តនៅលើកាណូតនោះ ស្ត្រីជាប្រពន្ធឈ្មោះបៅ ម៉េងទី អាយុ២៦ឆ្នាំ បានមកដល់ក៏ឃើញប្ដីផឹកបែបនេះ ក៏ស្ដីបន្ទោស រហូតដល់មានការឈ្លោះប្រកែកពាក្យសម្ដីគ្នាទៅវិញទៅមក ធ្វើឱ្យបុរសជាប្ដីទ្រាំមិនបាន ក៏យកប្រេងសាំងចាក់ដុតកាណូតចម្លងនៅផ្នែកខាងក្រោយតែម្តង ជាហេតុបណ្ដាលឲ្យភ្លើងឆាបឆេះសន្ធោរសន្ធៅ និងមានផ្សែងខ្មួលខ្មាញ់ហ៊ុយទៅលើអាកាស។
លោកមេឃុំបន្តថា ក្នុងពេលនោះដែរ មានប្រជាពលរដ្ឋដែលមានលំនៅដ្ឋានតាមដងផ្លូវមាត់ទន្លេឃើញបែបនេះ ក៏នាំគ្នាចេញមកមើល តែដំបូងឡើយមិនមានអ្នកណាហ៊ានចូលជួយនោះទេ។ ទាល់តែកម្លាំងប៉ុស្តិ៍រដ្ឋបាលឃុំរកការចុះមកដល់ ទើបនាំគ្នាជួយពន្លត់ភ្លើងដែលឆេះមិនដល់កន្លះម៉ោង បណ្ដាលឲ្យរលត់ទៅវិញ ហើយកាណូតនេះបានរងការខូចខាតមួយផ្នែកផងដែរ។ ក្នុងពេលដែលភ្លើងកំពុងតែឆេះនោះ បុរសជាប្ដី និងជាម្ចាស់កាណូតមិនបានជួយពន្លត់ជាមួយនឹងប្រជាពលរដ្ឋឡើយ គឺបានត្រឹមតែឈរមើល ហើយថែមទាំងប្រលយពាក្យថា «អញរង់ចាំឱកាសនេះយូរហើយ…» ។
ក្រោយពេលកើតហេតុ ស្ត្រីជាប្រពន្ធបានប្ដឹងមកសមត្ថកិច្ចដោយសុំលែងលះគ្នា ដែលនឹងធ្វើឡើងនៅថ្ងៃទី២១ ខែកញ្ញា ២០២០ ហើយការសម្រេចចិត្តរបស់ប្រពន្ធមិនដឹងថា តើលែងលះគ្នាធម្មតា ឬមួយក៏ឱ្យសមត្ថកិច្ចចាត់វិធានការណ៍លើបុរសជាប្ដីតាមច្បាប់ដែរឬមួយក៏យ៉ាងណានោះទេ?
លោកមេឃុំរកាអា បានបញ្ជាក់បន្ថែមថា នាពេលកន្លងមក បុរសជាប្ដីរូបនេះធ្លាប់ត្រូវបានសមត្ថកិច្ចធ្វើការអប់រំម្ដងរួចមកហើយ។ តាំងពីចាប់ដៃគ្នាជាប្ដីប្រពន្ធមកដល់សព្វថ្ងៃនេះ បុរសរួបនេះមានកូនតូចម្នាក់អាយុមិនទាន់បានមួយខួបនៅឡើយទេ។ លុះមកដល់លើកក្រោយ ដោយសារតែទង្វើរបស់ប្ដីដុតបំផ្លាញកាណូត ដែលជាហេតុធ្វើឲ្យប្រពន្ធទ្រាំទ្រមិនបាន ទើបសម្រេចចិត្តប្ដឹងលែងលះតែម្តង។ ហើយនៅថ្ងៃកើតហេតុនោះ កាណូតសម្រាប់ឆ្លងដរទទឹងទន្លេមេគង្គ បើសិនជាមិនមានប្រជាពលរដ្ឋចូលរួមជួយពន្លត់ទាន់ពេល ម្ល៉េះកាណូតនេះនឹងត្រូវឆេះហ្នត់តែម្ដង៕
ចែករំលែកព័តមាននេះ