ខេត្តសៀមរាប ៖ វត្តរាជបូព៌ នៅក្រុងសៀមរាបនាពេលបច្ចុប្បន្នកំពុងបញ្ចេញសម្រស់ដ៏ល្អសមជាវត្តដ៏ល្បីមួយ ។ សម្រស់នេះខុសគ្នាឆ្ងាយពីពេលមុនដែលមិនទាន់ជួសជុល ។
គម្រោងជួសជុល និងអភិរក្សព្រះវិហារបុរាណវត្តរាជបូព៌ បើតាមផេកអាជ្ញាធរជាតិអប្សរាផ្សាយថា ទទួលបានប្រាក់ទាំងស្រុងពីអាជ្ញាធរជាតិអប្សរា បានបញ្ចប់ដោយជោគជ័យ កាលពីថ្ងៃទី៤ ខែកញ្ញា ឆ្នាំ២០២០ ក្រោមកិច្ចខិតខំប្រឹងប្រែង ដឹកនាំ និងត្រួតពិនិត្យលក្ខណៈបច្ចេកទេសពីមន្ត្រីជំនាញរបស់អាជ្ញាធរនេះ ។
ការជួសជុលគឺដើម្បីរួមចំណែកថែរក្សាមត៌កវប្បធម៌ខ្មែរលើវិស័យព្រះពុទ្ធសាសនា ព្រមទាំងជួយអភិរក្ស និងលើកតម្លៃវប្បធម៌នៃសិល្បៈរបស់ខ្មែរពីបុរាណកាលឱ្យរស់រវើកឡើងវិញ។
ក្រុមការងារបច្ចេកទេស បានផ្តោតលើការជួសជុលក្បាច់ជញ្ជាំង ជើងជញ្ជាំង បាំងសាច កាំជណ្តើរ ការ៉ូ ក្បាច់លើទ្វារ-បង្អួច និងខឿនព្រះវិហារ និងបញ្ហាប្រឈមមួយចំនួនទៀតឱ្យផុតពីហានីភ័យរហូតធ្វើឱ្យព្រះវិហារវ័យចំណាស់នេះលេចរូបរាងដ៏ស្រស់ត្រកាលជាថ្មីម្តងទៀតលើទឹកដីអង្គរ ក្នុងក្រុងសៀមរាប ។
អាជ្ញាធរជាតិអប្សរា បានថ្លែងអំណរព្រះគុណ និងអរគុណចំពោះព្រះមហាវិមលធម្ម សិរីសុវណ្ណោពិន សែម ព្រះរាជាគណៈថ្នាក់ទោ សមាជិកថេរសភាសង្ឃ ជាឧត្តមទីប្រឹក្សាគណៈសង្ឃនាយក និងជាព្រះគ្រូចៅអធិការវត្តរាជបូព៌ ព្រមទាំងព្រះសង្ឃ ពុទ្ធបរិស័ទ ថ្នាក់ដឹកនាំ មន្ត្រី-បុគ្គលិក អាជ្ញាធរជាតិអប្សរាទាំងអស់ ដែលបាននិមន្ត និងចូលរួមសហការយ៉ាងជិតស្និទ្ធក្នុងការថែរក្សាសម្បត្តិវប្បធម៌ជាតិឱ្យបានគង់វង្សតរៀងទៅ ៕
ចែករំលែកព័តមាននេះ