ខេត្តកំពង់ចាម ៖ កំពុងជិះម៉ូតូម្នាក់ឯងយ៉ាងរំភើយលើផ្លូវបេតុងក្នុងក្រុង ស្រាប់តែចៃដន្យ ហេតុការណ៍ដ៏រន្ធត់មួយបានកើតឡើង ដោយសារការបាក់ស្រុតបេតុងសួនច្បារក្បែរលូធំបង្ហូរទឹកចូលទៅក្នុងទន្លេមេគង្គ ជិតស្ពានគីហ្សុ៊ណាក្រុងកំពង់ចាម ធ្លាក់ទាំងមនុស្សនិងម៉ូតូ តែសំណាងល្អមិនបណ្ដាលឱ្យមានគ្រោះថ្នាក់ដល់អាយុជីវិតទេប៉ុន្តែម៉ូតូម៉ាកវ៉េវ ១គ្រឿង ត្រូវបានស្រូបចូលទៅក្នុងដីលិចបាត់ ។ ចំណែកអាជ្ញាធរវិញបានហ៊ុមខ្សែព័ទ្ធនិងហាមមិនឲ្យមនុស្សម្នាចូលទៅកន្លែងបាក់ស្រុតបេតុងនោះទេ ព្រមទាំងរៀបចំជួសជុលឡើងវិញយ៉ាងប្រញាប់ផងដែរ ។
លោកនេន សុខឃីន អាយុ៤៤ឆ្នាំ អ្នកលក់បបរស ដែលមានផ្ទះជួលនៅក្នុងសង្កាត់វាលវង់ មានចម្ងាយប្រមាណ៣០០ម៉ែត្រ ពីកន្លែងកើតហេតុបានរៀបរាប់ទាំងការតក់ស្លុតឲ្យដឹងថា នៅវេលាកណ្ដាលអធ្រាត្រយប់ថ្ងៃទី១២ កញ្ញា ២០២០ លោកបានជិះម៉ូតូម៉ាកវ៉េវមួយគ្រឿងតែម្នាក់ឯងនៅលើខឿនបេតុងសួនច្បារមាត់ទន្លេ ក្រោមស្ពានគីហ្សុ៊ណា ។ កំពុងតែជិះម៉ូតូយ៉ាងរំភើយនោះ ស្រាប់តែផ្លូវបេតុងបាក់ស្រុតដោយចៃដន្យដូចព្រះធរណីស្រូប ក្រោយពីមេឃបានបង្អុរភ្លៀង១មេ ជាហេតុធ្វើឲ្យគាត់និងម៉ូតូ បានធ្លាក់ចូលក្នុងរណ្ដៅដីដែលមានទំហំប្រមាណ៥ម៉ែត្របួនជ្រុងក្នុងជម្រៅរណ្តៅប្រមាណជាង២ម៉ែត្រ ។ ពេលនោះគាត់បានប្រឹងស្រវារឡើងលើគោកវិញ ទាំងត្រហេបត្រហបយ៉ាងរន្ធត់និងមានការភិតភ័យជាខ្លាំង ស្ទើរតែគាំងបេះដូង។
បុរសម្ចាស់ម៉ូតូបានរៀបរាប់បន្តថា ក្នុងពេលកើតហេតុបាក់ស្រុតបេតុងនោះ មិនមានមនុស្សណាម្នាក់នៅកន្លែងកើតហេតុនោះទេ គឺមានតែរូបគាត់ម្នាក់ប៉ុណ្ណោះ ។ បន្ទាប់មកក៏បានទូរស័ព្ទហៅប្អូនថ្លៃដែលនៅផ្ទះឲ្យជិះម៉ូតូមកឌុបត្រឡប់ទៅកន្លែងលក់បបរសវិញ ។ រហូតមកដល់ព្រឹកថ្ងៃទី១៣កញ្ញា គាត់បានព្យាយាមរកម៉ូតូដែលធ្លាក់បាត់ក្នុងលូធំនោះ តែមិនអាចរកម៉ូតូឃើញឡើយ ។ បុរសរូបនេះបាននិយាយថា ក្រោយពេលទំនេរពីការលក់បបរស ជារឿយៗ គាត់តែងតែឌុបកូនដាក់នៅពីខាងមុខ ជិះដើរលេងលំហែកាយតាមផ្លូវមាត់ទន្លេ ។ តែលើកនេះសំណាងល្អដែលការបាក់ស្រុតបេតុងសួនច្បារមាត់ទន្លេ គឺមានតែគាត់ម្នាក់ប៉ុណ្ណោះ បើសិនជាកូនតូចមកជាមួយដូចរាល់ដងអាចនឹងមានគ្រោះថ្នាក់ជាក់ជាមិនខាន ។
លោក ចាន់ ផល្លី អភិបាលក្រុងកំពង់ចាម ប្រាប់ឱ្យដឹងដែលថា ហេតុការណ៍បាក់ស្រុតបេតុងសួនច្បារមាត់ទន្លេក្រុងកំពង់ចាម បានកើតមាននៅវេលាម៉ោងជាង១២រំលងអធ្រាត្រឈានចូលព្រឹកថ្ងៃទី១៣ កញ្ញា ២០២០ ដែលមានមុខកាត់ប្រមាណ៥ម៉ែត្របួនជ្រុង និងបានស្រូបយកម៉ូតូវ៉េវមួយគ្រឿងទៅបាត់ ។ ជាមួយនោះរូបលោកបានជួលកម្មករដាក់ខ្សែពួរឲ្យចុះរកម៉ូតូ តែមិនទាន់ឃើញនៅឡើយ ។ ដោយឡែកឯកឧត្តមអភិបាលខេត្ត បានយកចិត្តទុកដាក់ដោយឲ្យក្រុមបច្ចេកទេសចុះទៅត្រួតពិនិត្យនឹងធ្វើការជួសជុលឡើងវិញជាបន្ទាន់ផងដែរ ៕
ចែករំលែកព័តមាននេះ