ខេត្តបន្ទាយមានជ័យ ៖ រមណីយដ្ឋានអាងទឹកត្រពាំងថ្ម ស្ថិតនៅទិសឦសាននៃខេត្តបន្ទាយមានជ័យ គ្របដណ្តប់ដោយភូមិចំនួន៣ គឺភូមិត្រពាំងថ្មខាងជើង ភូមិសំបូរ និងភូមិពង្រ ក្នុងឃុំប៉ោយចារ
ខេត្តបន្ទាយមានជ័យ ៖ រមណីយដ្ឋានអាងទឹកត្រពាំងថ្ម ស្ថិតនៅទិសឦសាននៃខេត្តបន្ទាយមានជ័យ គ្របដណ្តប់ដោយភូមិចំនួន៣ គឺភូមិត្រពាំងថ្មខាងជើង ភូមិសំបូរ និងភូមិពង្រ ក្នុងឃុំប៉ោយចារ ស្រុកភ្នំស្រុក ជាប់ខេត្តសៀមរាប និងឧត្តរមានជ័យ ។ អាងត្រពាំងថ្មមានវិសាលភាពធំ ផ្ទៃទឹកល្ហល្ហេវដាច់កន្ទុយភ្នែក និងជាដែនជម្រកសត្វច្រើនប្រភេទ ។
ផ្លូវចូលទៅរមណីយដ្ឋានអាងត្រពាំងថ្មតភ្ជាប់ពីផ្លូវជាតិលេខ៦ បន្ទាយមានជ័យ-សៀមរាបត្រង់ភូមិព្រៃមាន់ ឃុំរហាល ស្រុកព្រះនេត្រព្រះ ជាផ្លូវក្រាលកៅស៊ូបើកបរងាយស្រួលមានប្រវែង២៣គីឡូម៉ែត្រ ។
អាជ្ញាធរមូលដ្ឋាន និងប្រជាពលរដ្ឋឱ្យដឹងថា អាងត្រពាំងថ្មជាស្នាដៃបន្សល់ទុកពីសម័យប៉ុល ពត ប៉ុន្តែមានផ្លូវបុរាណបន្សល់តាំងពីសម័យដើមដែលតភ្ជាប់តាំងពីប្រាសាទបន្ទាយឆ្មារ ក្នុងស្រុកថ្មពួក ខេត្តបន្ទាយមានជ័យឆ្ពោះទៅកាន់ប្រាសាទអង្គរវត្តចំទំនប់បារាយណ៍ប៉ែកខាងជើងនៅខេត្តសៀមរាប ។
អាងត្រពាំងថ្មពីអតីតកាលជាដីស្រែ ប៉ុន្តែក្នុងរបបប៉ុលពតពួកខ្មែរក្រហមបានកេណ្ឌប្រជាពលរដ្ឋលើកដីបន្ថែមលើផ្លូវបុរាណទើបក្លាយជាអាងស្តុកទឹក និងហៅថាអាងត្រពាំងថ្ម ។
លោកប៉េង ប៊ុនថារ៉ា មេឃុំប៉ោយចារឱ្យដឹងកាលពីពេល ថ្មីៗនេះថា អាងត្រពាំងថ្មមានទទឹង១០គីឡូម៉ែត្រ និងបណ្ដាយ១៣គីឡូម៉ែត្រ ។ នៅជាប់អាងត្រពាំងថ្មមានសហគមន៍ទេសចរណ៍ធម្មជាតិ និងតំបន់អភិរក្សសត្វក្រៀលដើម្បីឲ្យអ្នកទេសចរជាតិ និងអន្តរជាតិទស្សនា ។ សត្វចម្រុះជាច្រើនប្រភេទបានបណ្ដែតខ្លួនលើផ្ទៃទឹក និងខ្លះនៅតាមមាត់ទឹកដើររកចំណី ឯខ្លះហោះហើរលើអាកាសគួរឲ្យគយគន់គាប់ភ្នែកក្រៃលែង ។
លោកសុខ ឫទ្ធី ប្រធានក្រុមអភិរក្សសត្វក្រៀលអាងត្រពាំងថ្មរបស់ក្រសួងកសិកម្មប្រាប់កោះសន្តិភាពតាមទូរស័ព្ទថាតំបន់អភិរក្សសត្វក្រៀលអាងត្រពាំងថ្មបង្កើតឡើងរយៈពេល១៥ឆ្នាំមកហើយ ។ ចំណែកសហគមន៍ទេសចរណ៍ធម្មជាតិទើបតែបង្កើតឡើង៣ឆ្នាំប៉ុណ្ណោះ ។
សត្វដែលកំពុងស្ថិតក្រោមការអភិរក្សបច្ចុប្បន្នមានចំនួន១៨៦ប្រភេទ ក្នុងនោះសត្វកម្រមាន១៩ប្រភេទ មានសត្វស្លាប១៨ប្រភេទ និងសត្វរមាំង១ប្រភេទ ។ សត្វកម្រជាប្រភេទសត្វស្លាប រួមមានសត្វក្រៀល,ត្រដក់ធំ, ត្រដក់តូច, មង្គត់ខ្មៅ, ត្រយងចង្កំកស, ត្រយងខ្មៅរលោង, ទុងប្រផេះ, ខ្សឹប (អូត
មហាចោរ), អកខ្មៅដីសើម, អកត្រីកម្រ, ត្មាតភ្លើង, រនាលពណ៌, រនាលស និង ក្ងចំពុះស្លាបព្រាជាដើម។ លោកសុខ ឫទ្ធីបញ្ជាក់ថា ក្នុងចំណោមសត្វស្លាបទាំង១៨ប្រភេទនោះមានសត្វ១ប្រភេទឈ្មោះ «ក្ងចំពុះស្លាបព្រា» ជាសត្វកម្រនៅលើពិភពលោក ហើយនៅប្រទេសកម្ពុជាយើងទើបតែប្រទះឃើញតែ១ក្បាលគត់នៅតំបន់អភិរក្សអាងត្រពាំងថ្ម ។
ទំនប់អាងត្រពាំងថ្មពេលនេះកែលម្អក្រាលកាប៊ីយ៉ុងរាយសំណាញ់ដែកពីលើទទឹង៨ម៉ែត្រនិងមានបណ្ដោយ៣១០០ម៉ែត្រ និងកំពុងអភិវឌ្ឍន៍បន្តដែលតាមមន្ត្រីមួយរូបតំណាងឲ្យក្រសួងធនធានទឹកប្រាប់ថាជាប្រាក់របស់ធនាគារអភិវឌ្ឍន៍អាស៊ី (ADB)តាមរយៈក្រសួងធនធានទឹក។
លោកប៉េង ប៊ុនថារ៉ា មេឃុំប៉ោយចារបញ្ជាក់ថា រមណីយដ្ឋានទេសចរណ៍អាងត្រពាំងថ្មមុនឆ្នាំ១៩៩៨ពុំមានអ្នកទេសចរទៅលេងទេ ប៉ុន្តែចាប់ពីក្រោយឆ្នាំ១៩៩៨មក អាងត្រពាំងថ្មចាប់ផ្ដើមមានអ្នកទេសចរទៅទស្សនាកើនឡើងជាបន្តបន្ទាប់ ។ កាលពីមុនការធ្វើដំណើររបស់អ្នកទេសចរទៅកាន់រមណីយដ្ឋានអាងត្រពាំងថ្មប្រើប្រាស់ពេលវេលារហូតដល់ទៅ១ម៉ោងកន្លះ ឬជិត២ម៉ោង ប៉ុន្តែក្រោយពីផ្លូវក្រាលកៅស៊ូរួចការធ្វើដំណើរទៅកាន់រមណីយដ្ឋានទេសចរណ៍អាងត្រពាំងថ្មប្រើប្រាស់ពេលត្រឹមតែ២០នាទី ឬកន្លះម៉ោងប៉ុណ្ណោះ ។
ពេលមានពិធីបុណ្យជាតិ ម្ដងៗរមណីយដ្ឋានអាងត្រពាំងថ្មមានអ្នកទេសចរទៅកម្សាន្តរាប់ពាន់នាក់ ។ អាងទឹកមួយនេះធ្វើឲ្យអ្នករស់នៅទីនោះមានជីវភាពល្អប្រសើរឡើង ព្រោះអាចធ្វើស្រែប្រាំង និងវស្សាមួយឆ្នាំ២ទៅ៣ដង ព្រមទាំងដាំដំណាំឪឡឹកសរុបប្រហែល៣០០ហិកតាសម្រាប់ប្រជាពលរដ្ឋប្រហែល២០០គ្រួសារក្នុងឃុំ ។ លើសពីនេះ អ្នកភូមិប្រកបរបរផ្នែកទេសចរណ៍នៅអាងប្រពាំងថ្មថែមទៀត ៕
ចែករំលែកព័តមាននេះ