ឥណ្ឌា ៖ រឿងរ៉ាវជុំវិញការស្លាប់របស់តារាសម្តែងបូលីវូដលោក Sushant Singh Rajput កំពុងក្លាយជាប្រធានបទដ៏ក្តៅសម្រាប់ប្រជាជនឥណ្ឌាទាំងមូល បន្ទាប់ពីមានការចាប់ខ្លួនមិត្តស្រីរបស់លោក ដែលជាតារាសម្តែងដូចគ្នា គឺនាង Rhea Chakraborty។ គួររំលឹកថា ចាប់ខ្លួនតារាស្រីម្នាក់ ជាប់ពាក់ព័ន្ធនឹងការស្លាប់តួឯកប្រុសក្នុងរឿងជីវិតស្ត្រីមេផ្ទះ
មានការបន្តជជែកវែកញែកគ្នាជាច្រើន ក្រោយពីមានការបែកធ្លាយវីដេអូ ចេញផ្សាយដោយសារព័ត៌មាន Zeenews របស់ឥណ្ឌា ដែលបង្ហាញពីសកម្មភាពរបស់ Rajput និង Rhea កំពុងជក់បារី និងច្រៀងយ៉ាងសប្បាយរីករាយជាមួយគ្នា។ ក្រោយវីដេអូនេះ ត្រូវបានចេញផ្សាយ មានការចែករំលែកបន្តពាសពេញបណ្តាញសង្គម និងសារព័ត៌មានក្នុងស្រុកជាច្រើនផងដែរ។
សូមរំលឹកជូនថា តារាស្រីនាង Rhea Chakraborty ត្រូវបានចាប់ខ្លួនដោយអាជ្ញាធរត្រួតពិនិត្យគ្រឿងញៀនរបស់ឥណ្ឌា កាលពីថ្ងៃអង្គារ ទី ៨ ខែ កញ្ញា កន្លងទៅ ដោយរងការចោទប្រកាន់ថា បានទិញកញ្ឆា (Cannabis) សម្រាប់ផ្តល់ឲ្យមិត្តប្រុសគឺលោក Sushant Singh Rajput។ ហើយវាក៏ជាប់ពាក់ព័ន្ធទៅនឹងដំណើរការស៊ើបអង្កេត ជុំវិញការធ្វើអត្តឃាតរបស់តារាប្រុសរូបនេះ ក្នុងគេហដ្ឋានរបស់គេនៅទីក្រុងម៉ុមបៃ កាលពីថ្ងៃទី១៤ ខែ មិថុនា កន្លងទៅផងដែរ។
សូមបញ្ជាក់ថា ចៅក្រមក៏បានសម្រេចច្រានចោលការសុំធានានៅក្រៅឃុំរបស់នាង និងបានបន្តនាំខ្លួននាងទៅកាន់មន្ទីរឃុំឃាំងរបស់តុលាការ រហូតដល់ថ្ងៃទី ២២ ខែកញ្ញា ដើម្បីបន្តដំណើរការស៊ើបអង្កេត។
រឿងរ៉ាវនេះ បានធ្វើឲ្យមានការខឹងសម្បារយ៉ាងខ្លាំង ពីសំណាក់ប្រជាជនទាំងមូលនៅក្នុងរដ្ឋបឹងហ្គាល់ខាងលិច ដែលជាទីកន្លែងកំណើតរបស់ Rhea Chakraborty ដោយផ្ទុះមានការធ្វើបាតុកម្មដើម្បីបង្ហាញការគាំទ្រដល់នាង ប្រឆាំងនឹងករណីចោទប្រកាន់នេះ។
សូមជម្រាបជូនថា សង្គ្រាមលើបណ្តាញសង្គមបានផ្ទុះឡើងយ៉ាងខ្លាំង បន្ទាប់ពីមានការចាប់ខ្លួនតារាស្រីខាងលើ គេសង្កេតឃើញមានតារាបូលីវូដប្រុសស្រីល្បីៗមួយចំនួនធំ បានធ្វើការបង្ហោះសារគាំទ្រនាង Rhea Chakraborty ដោយបានសរសេរភ្ជាប់នឹងពាក្យ #JusticeForRhea ដែលមានន័យថា «យុត្តិធម៌សម្រាប់ Rhea» ហើយក្នុងនោះរាល់ការបង្ហោះទាំងអស់ សុទ្ធតែទទួលរងការរិះគន់យ៉ាងចាស់ដៃ ពីសំណាក់ប្រជាជនឥណ្ឌាភាគច្រើន ដែលស្អប់តារាស្រីរូបនេះ៕
ចែករំលែកព័តមាននេះ