នាយករដ្ឋមន្ត្រីអីុស្រាអែល លោកបេនចាមីន នេតាន់យ៉ាហ៊ូ កាលពីថ្ងៃទី៣ មីនា បានអំពាវនាវឱ្យបដិសេធកិច្ចព្រមព្រៀងអាក្រក់មួយស្តីពីនុយក្លេអ៊ែរជាមួយអីុរ៉ង់ ដោយគូសបញ្ជាក់ថា
នាយករដ្ឋមន្ត្រីអីុស្រាអែល លោកបេនចាមីន នេតាន់យ៉ាហ៊ូ កាលពីថ្ងៃទី៣ មីនា បានអំពាវនាវឱ្យបដិសេធកិច្ចព្រមព្រៀងអាក្រក់មួយស្តីពីនុយក្លេអ៊ែរជាមួយអីុរ៉ង់ ដោយគូសបញ្ជាក់ថា កិច្ចព្រមព្រៀងបែបនេះនឹងអនុញ្ញាតឱ្យអីុរ៉ង់ផលិតគ្រាប់បែកនុយក្លេអ៊ែរ ។
នៅមុខសភាអាមេរិក មេដឹកនាំអីុស្រាអែលដែលប្រកាន់ជំហររឹងបំផុតចំពោះអីុរ៉ង់ថ្លែងថា យើងពិតជាប្រកាន់ជំហរល្អ បើគ្មានកិច្ចព្រម ព្រៀងអាក្រក់មួយជាមួយអីុរ៉ង់ ។ នៅមុខសភាអាមេរិកលោកបេនចាមីន នេតាន់យ៉ាហ៊ូ បានថ្លែងសុន្ទរកថាមួយអំពីរឿងនេះដែលបង្ហាញពីភាពតានតឹងថ្មីនៃទំនាក់ទំនងរវាងអីុស្រាអែល និងអាមេរិក ។
នាយករដ្ឋមន្ត្រីអីុស្រាអែលអះអាងថា ប្រសិនបើការចរចាឈានទៅដល់កិច្ចព្រមព្រៀងចុងក្រោយមួយ ប្រការនេះនឹងមានន័យថា ជាការធ្វើសម្បទានចម្បងនានាចំពោះអីុរ៉ង់ដែលនឹងអនុញ្ញាតឱ្យប្រទេសនេះមានហេដ្ឋារចនាសម្ព័ន្ធនុយក្លេអ៊ែរដ៏ទូលំទូលាយ រួចអាចឱ្យអីុរ៉ង់មានគ្រាប់បែកនុយក្លេអ៊ែរក្នុងរយៈពេលដ៏ខ្លីមួយ រួមទាំងការលុបចោលរាល់ការរិតត្បិតលើកម្មវិធីនុយក្លេអ៊ែរអីុរ៉ង់រយៈពេល១០ឆ្នាំទៀត ។
លោកនេតាន់យ៉ាហ៊ូ ថ្លែងសុន្ទរកថាជាប្រវត្តិសាស្ត្រនេះនៅសភាអាមេរិក របៀបជាការប្រឈមមុខមួយជាមួយប្រធានាធិបតីអាមេរិកលោកបារ៉ាក់ អូបាម៉ា ពេលដែលក្រុងវ៉ាស៊ីនតោន និងក្រុងតេហេរ៉ង់ធ្វើការចរចាគ្នានៅប្រទេសស្វ៊ីស ដើម្បីស្វែងរកដំណោះស្រាយជាស្ថាពរមួយនាចុងខែមីនា ចំពោះបញ្ហានុយក្លេអ៊ែរអីុរ៉ង់ ។
ប្រធានាធិបតីអាមេរិកដែលមានទំនាក់ទំនងពុំសូវស៊ីខ្សែគ្នាជាមួយនាយករដ្ឋមន្ត្រីអីុស្រាអែលនោះ បានបដិសេធមិនជួបជាមួយលោកនេតាន់យ៉ាហ៊ូ ឡើយ ដោយចាត់ទុកសុន្ទរកថារបស់មេដឹកនាំអីុស្រាអែលក្នុងសភាអាមេរិកថា គ្មានអ្វីថ្មី ហើយនឹងពុំផ្តល់ច្រកចេញគួរឱ្យជឿជាក់ណាមួយដែរ ។ កាលពីថ្ងៃទី២ មីនា លោកអូបាម៉ា ដែលមិនខ្ចីរវល់នឹងសុន្ទរកថារបស់លោកនេតាន់យ៉ាហ៊ូ បានចោទប្រកាន់មេដឹកនាំអីុស្រាអែលរូបនេះថា តាំងតែពីមុនមកយល់ច្រឡំលើភាពត្រឹមត្រូវនៃដំណោះស្រាយមួយរវាងក្រុមប្រទេសមហាអំណាច និងអីុរ៉ង់ ។
ចំណែកអ្នកនាំពាក្យក្រសួងការបរទេសអីុរ៉ង់វិញថ្លែងថា សុន្ទរកថារបស់លោកនេតាន់យ៉ាហ៊ូនោះពោរពេញដោយពាក្យបោកបញ្ឆោត។ អ្នកនាំពាក្យរូបនេះបន្តថា សុន្ទរកថារបស់ប្រមុខរដ្ឋាភិបាលអីុិស្រាអែល ជាសញ្ញានៃភាពទន់ខ្សោយ និងភាពឯកោរបស់ពួករ៉ាឌីកាល់នៅអីុស្រាអែល ព្រមទាំងការពិតពីការខំប្រឹងប្រែងរបស់ពួកគេសំដៅបង្កើនឥទ្ធិពលលើនយោបាយអន្តរជាតិ ៕
ចែករំលែកព័តមាននេះ