រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យ២នាក់ធ្វើសកម្មភាពឆក់យកទូរស័ព្ទដៃពីនារីជាកម្មការិនីរោងចក្រម្នាក់ដែលកំពុងជិះម៉ូតូតាមផ្លូវ ខណៈពេលចេញពីធ្វើការត្រឡប់ទៅផ្ទះ លុះក្រោយពេលឆក់បានសម្រេច ក៏ព្យាយាមជិះម៉ូតូគេចខ្លួន ប៉ុន្តែនារីរងគ្រោះជិះម៉ូតូដេញតាម និងស្រែកថា «ចោរៗ»…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យ២នាក់ធ្វើសកម្មភាពឆក់យកទូរស័ព្ទដៃពីនារីជាកម្មការិនីរោងចក្រម្នាក់ដែលកំពុងជិះម៉ូតូតាមផ្លូវ ខណៈពេលចេញពីធ្វើការត្រឡប់ទៅផ្ទះ លុះក្រោយពេលឆក់បានសម្រេច ក៏ព្យាយាមជិះម៉ូតូគេចខ្លួន ប៉ុន្តែនារីរងគ្រោះជិះម៉ូតូដេញតាម និងស្រែកថា «ចោរៗ» បង្កឲ្យមានការភ្ញាក់ផ្អើលតាមដងផ្លូវតែម្តង។
សេចក្តីរាយការណ៍បន្តថា ស្របពេលនោះនគរបាលប៉ុស្តិ៍ពងទឹក ខណ្ឌដង្កោ ក្រោមការដឹកនាំដោយលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ កំពុងល្បាតនៅជិតនោះ ក៏ដេញតាម ហើយដោយមានការសហការពីនគរបាលប៉ុស្តិ៍បឹងធំខណ្ឌកំបូលផងនោះ ទើបចាប់ខ្លួនជនសង្ស័យទាំង២នាក់នោះបាន។ ហេតុការណ៍នេះកើតឡើងកាលពីម៉ោង៦និង៣០នាទីល្ងាច ថ្ងៃទី៣១ ខែសីហា ឆ្នាំ២០២០ នៅត្រង់ចំណុចមុខវិទ្យាល័យពងទឹក តាមផ្លូវជាតិលេខ៣ ស្ថិតក្នុងភូមិវត្តស្លែង សង្កាត់ពងទឹក ខណ្ឌដង្កោ ។
សេចក្តីរាយការណ៍បន្តថា ជនសង្ស័យខាងលើម្នាក់ឈ្មោះ ផន ផល្លា ហៅពៅ អាយុ១៨ឆ្នាំ មុខរបរកម្មកររោងចក្រ និងម្នាក់ទៀតឈ្មោះ អាំង ថាណុច អាយុ១៩ឆ្នាំ មុខរបរកម្មកររោងចក្រ អ្នកទាំង២នេះ មានទីលំនៅក្នុងភូមិក្រាំងពង្រ សង្កាត់ក្រាំងពង្រ ខណ្ឌដង្កោ ។ ចំណែកនារីរងគ្រោះឈ្មោះ វ៉ាន់ ស្រីពេជ្រ អាយុ២៩ឆ្នាំ មុខរបរកម្មការិនីរោងចក្រ ស្នាក់នៅផ្ទះគ្មានលេខ ផ្លូវបេតុង ភូមិព្រៃរងៀង សង្កាត់ភ្លើងឆេះរទេះ ខណ្ឌកំបូល រីឯទូរស័ព្ទដៃដែលត្រូវជនសង្ស័យឆក់នោះម៉ាក OPPO ហើយនៅក្នុងស្រោមទូរស័ព្ទនោះមានលុយចំនួន៤០ដុល្លារផងដែរ ប៉ុន្តែក្រោយពេលចាប់ខ្លួនជនសង្ស័យបាន នគរបាលបានដកហូត រួចយកប្រគល់ជូននាងរងគ្រោះវិញហើយដែរ។
បើតាមសម្តរីនារីរងគ្រោះបានប្រាប់ឲ្យដឹងថា នៅមុនកើតហេតុ បន្ទាប់ពីចេញពីធ្វើការនាងបានជិះម៉ូតូម៉ាកហុងដាស្កូបពី១គ្រឿង ពណ៌ស ពាក់ស្លាកលេខ ភ្នំពេញ 1HH -8189 ចេញរោងចក្រក្នុងភូមិព្រៃសំព័រ សង្កាត់ក្រាំងពង្រ ត្រឡប់ទៅផ្ទះនៅភូមិព្រៃរងៀង សង្កាត់ភ្លើងឆេះរទេះ ខណ្ឌកំបូល ។ ដោយបានទុកទូរស័ព្ទ ម៉ាក oppo ពណ៌ខ្មៅលាយក្រហម ១គ្រឿង នៅក្នុងឃ្លុបម៉ូតូខាងមុខខាងឆ្វេង រួចដោតកាសជាប់នឹងត្រចៀកទាំងសងខាងស្ដាប់បទចម្រៀង និងនៅក្នុងស្រោមទូរស័ព្ទនោះមានលុយចំនួន៤០ដុល្លារ ថែមទៀតផង ។
ប្រភពដដែលបន្តទៀតថា ខណៈនោះនាងជិះម៉ូតូធ្វើដំណើរតាមផ្លូវជាតិលេខ៣ ពីត្បូងទៅជើង លុះទៅដល់ចំណុចត្រង់មុខវិទ្យាល័យពងទឹក ក្នុងភូមិវត្តស្លែង សង្កាត់ពងទឹក ស្រាប់តែជនសង្ស័យ២នាក់ជិះម៉ូតូ១គ្រឿងម៉ាកស៊ុយហ្ស៊ុយគីនិច ពណ៌សលាយទឹកក្រូច ពាក់ស្លាកលេខ ភ្នំពេញ 1HJ -7100 ក្នុងទិសដៅស្របទិសគ្នាតាមពីក្រោយ។ លុះពេលទៅដល់ទន្ទឹមគ្នា ជនសង្ស័យក៏ឆក់យកទូរស័ព្ទរបស់នាងបានសម្រេ ចរួចបានជិះគេចខ្លួនតែម្តង។ ភ្លាមៗនោះ នាងក៏ជិះម៉ូតូដេញតាម និងស្រែកថា «ចោរៗ» បង្កឲ្យមានការភ្ញាក់ដល់នគរបាលជួយដេញតាមចាប់ខ្លួនតែម្ដង។
បើតាមនគរបាលបាននិយាយថា នៅមុនពេលចាប់ខ្លួនជនសង្ស័យខាងលើនោះ កម្លាំងនគរបាលប៉ុស្តិ៍ពងទឹក ខណ្ឌដង្កោ ក្រោមការដឹកនាំបញ្ជាដោយលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានចេញល្បាតពួនស្ទាក់បទល្មើសនៅក្នុងមូលដ្ឋាន។ ខណៈនោះស្រាប់តែឮសម្រែកថា «ចោរៗ» ពីសំណាក់ស្ត្រីរងគ្រោះ ហើយក៏បានឃើញជនសង្ស័យជិះម៉ូតូយ៉ាងលឿន ទើបកម្លាំងដេញតាមចាប់ខ្លួន រហូតដល់ចំណុចស្ពានទួលស្វាយ ប្រឡាយតាហោ ស្ថិតក្នុងភូមិទួលស្វាយ សង្កាត់បឹងធំ ខណ្ឌកំបូល ទើបចាប់បានដោយមានការសហការពីសំណាក់នគរបាលប៉ុស្តិ៍បឹងធំ ខណ្ឌកំបូលផងដេរ។
បន្ទាប់មកកម្លាំងបាននាំយកជនសង្ស័យ រួមទាំងវត្ថុតាង ទៅកាន់អធិការដ្ឋាននគរបាលខណ្ឌដង្កោ ដើម្បីសាកសួរ និងចាត់ការតាមច្បាប់៕
ចែករំលែកព័តមាននេះ