រាជធានីភ្នំពេញ ៖ គណៈកម្មការរៀបចំបុណ្យទន្លេបានអំពាវនាវដល់ភ្ញៀវជាតិ និងអន្តរជាតិចូលរួមទស្សនា និងកំសាន្តដោយរីករាយក្នុងពិធីបុណ្យទន្លេលើកទី១ដែលនឹងត្រូវរៀបចំពីថ្ងៃទី១៣ ដល់១៥ មីនា ២០១៥
រាជធានីភ្នំពេញ ៖ គណៈកម្មការរៀបចំបុណ្យទន្លេបានអំពាវនាវដល់ភ្ញៀវជាតិ និងអន្តរជាតិចូលរួមទស្សនា និងកំសាន្តដោយរីករាយក្នុងពិធីបុណ្យទន្លេលើកទី១ដែលនឹងត្រូវរៀបចំពីថ្ងៃទី១៣ ដល់១៥ មីនា ២០១៥ នៅខេត្តក្រចេះ ។ ការអំពាវនាវនោះត្រូវបានធ្វើឡើងនៅក្នុងកិច្ចប្រជុំរបស់គណកម្មការបុណ្យទន្លេកាលពីថ្ងៃទី២១ កុម្ភៈ ២០១៥ នៅសាលាខេត្តក្រចេះ ក្រោមវត្តមានលោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការរៀបចំបុណ្យទន្លេ រួមទាំងអភិបាលខេត្ត និងមន្ត្រីពាក់ព័ន្ធជាច្រើនរូបទៀត ។
លោក ថោង ខុន មានប្រសាសន៍ថា ពិធីបុណ្យទន្លេលើកទី១នេះរៀបចំឡើងក្រោមប្រធានបទ (ទេសចរណ៍តាមដងទន្លេសម្រាប់ការអភិវឌ្ឍន៍សហគមន៍) ។ លោកបញ្ជាក់ថា ពិធីបុណ្យទន្លេនេះមិនគ្រាន់តែប្រារព្ធឡើងដើម្បីអរគុណដល់ទន្លេដែលនាំមកនូវដីល្បាប់ដ៏មានជីជាតិ និងមច្ឆាដ៏សម្បូរបែបប៉ុណ្ណោះទេ ប៉ុន្តែវាថែមទាំងជម្រុញការផ្សព្វផ្សាយសក្ដានុពលទេសចរណ៍ខេត្តនានាតាមដងទន្លេ ជាពិសេសលើកទឹកចិត្តដល់ប្រជាពលរដ្ឋនៅតាមបណ្ដាខេត្តទាំងនោះឲ្យមានការចូលរួមយ៉ាងសកម្មក្នុងការងារទេសចរណ៍សហគមន៍ ។
លោក ថោង ខុន បានឲ្យដឹងថា ពិធិបុណ្យទន្លេលើកទី១នេះរួមមានសកម្មភាព៤សំខាន់ៗដូចជា ការផ្សាយផ្ទាល់នូវការសម្ដែងទស្សនីយភាពសិល្បៈ ការប្រគំតន្ត្រី និងការបាញ់កាំជ្រួចអបអរសាទរពិធីបុណ្យទន្លេលើកទី១ ។ ការរៀបចំមហោស្រពម្ហូបអាហារ និងភេស្ជជៈ, ពិព័រណ៌ផលិតផលក្នុងស្រុក និងផលិតផលអន្តរជាតិនានា រួមទាំងសកម្មភាពកីឡាផ្សេងៗថែមទៀត ។ ដោយឡែកកម្មពិធីសិល្បៈកីឡាក៏មានការចូលរួមសម្ដែងពីសំណាក់ក្រុមសិល្បករ សិល្បការនី តារាចម្រៀងជាតិ អន្តរជាតិ និងកីឡាករ កីឡាការនីជាតិ និងអន្តរជាតិជាច្រើនផងដែរ ។
លោក ថោង ខុន បានអំពាវនាវដល់ភ្ញៀវទេសចរជាតិ និងអន្តរជាតិឲ្យអញ្ជើញមកចូលរួមទស្សនា និងកំសាន្តឲ្យបានច្រើនកុះករក្នុងពិធីបុណ្យទន្លេលើកទី១នេះ ព្រោះពិធីនេះយើងប្រារព្ធឡើងមិនគ្រាន់តែដើម្បីអរគុណដល់ទន្លេប៉ុណ្ណោះទេ ប៉ុន្តែសក្ដានុពលទេសចរណ៍នៃបណ្ដាខេត្តតាមដងទន្លេនឹងត្រូវបានយកមកបង្ហាញក្នុងពិធីបុណ្យនេះដែរ ក្នុងនោះទស្សនីយភាពសិល្បៈ កីឡា រួមទាំងសកម្មភាពកំសាន្តប្លែកៗបង្កការសប្បាយរីករាយក៏ត្រូវបាននាំមកសម្ដែងដល់ភ្ញៀវជាតិ និងអន្តរជាតិនៅក្នុងពិធីបុណ្យទន្លេលើកទី១នេះ ។
លោករដ្ឋមន្ត្រីក៏បានអំពាវនាវចំពោះក្រុមហ៊ុន ធុរជន សិល្បករ សិល្បការនី កីឡាករ កីឡាការនី ដែលមានបំណងចូលរួមសកម្មភាពនានានៃពិធីបុណ្យនេះសូមទំនាក់ទំនងក្រុមការងាររបស់គណៈកម្មការបុណ្យទន្លេឲ្យបានរួសរាន់គ្រាដែលពិធីបុណ្យដែលមានអត្ថន័យនេះកាន់តែខិតជិតមកដល់ ។ លោកបង្ហាញនូវក្ដីរំពឹងថា បុណ្យទន្លេលើកទី១នេះនឹងមានភ្ញៀវទេសចរជាតិ អន្តរជាតិចូលរួមយ៉ាងច្រើនកុះករមិនខាន ព្រមទាំងទទួលបានជោគជ័យដូចពិធីបុណ្យសមុទ្រផងដែរ ៕
ចែករំលែកព័តមាននេះ