សហរដ្ឋអាមេរិក ៖ បាតុកម្មតវ៉ាពោរពេញដោយកំហឹងផ្ទុះឡើងទៀតហើយ ចាប់ពីទីក្រុងកេណូសា ដល់ក្រុងមីននីប៉ូលីសឬក្រុងព័រឡែន ដោយពេលខ្លះផ្ទុះអំពើហិង្សាមានទាំងការដុតបំផ្លាញរថយន្តនានា និងដុតទង់ជាតិអាមេរិកទៀតផង ។
បាតុករច្រើនពាន់នាក់បានស្រែកទាមទាររកយុត្តិធម៌ ឲ្យលោក JACOB BLAKE ជាជនស្បែកខ្មៅអាមេរិក១រូបរងរបួសធ្ងន់បំផុត ដោយសារការបាញ់ជាច្រើនគ្រាប់របស់ប៉ូលិស ។ ពួកបាតុករបានប្រមូលផ្ដុំគ្នាក្នុងទីក្រុងទាំងនេះ តាំងពីយប់ថ្ងៃទី២៤ដល់យប់ថ្ងៃទី២៥ សីហា ដោយស្រែកពាក្យស្លោកដូចគ្នានឹងពាក្យស្លោកដែលគេស្រែក ក្រោយការស្លាប់របស់ជនស្បែកខ្មៅលោកGEORGE FLOYD កាលពី៣ខែមុន ដោយប៉ូលិសស្បែកសម្នាក់យកជង្គង់សង្កត់កគេដល់ដាច់ខ្យល់ ។ ពាក្យដែលគេស្រែកទាមទារគឺគ្មានយុត្តិធម៌គ្មានសន្តិភាព ។
ក្នុងការប៉ុនប៉ងឃាត់ខ្លួនលោក JACOB BLAKE អំពើឃោឃៅរបស់ប៉ូលិសដែលបាញ់លើគេច្រើនគ្រាប់ត្រូវបានថតតាមទូរស័ព្ទដៃដោយអ្នកដំណើរម្នាក់ ក្នុងទីក្រុងកេណូសារដ្ឋវីស្កុនសីុន ។ បណ្ដារូបភាពដែលថតបានបង្ហាញបុរសស្បែកខ្មៅវ័យ២៩ឆ្នាំរូបនោះដែលមានកូន៣នាក់ត្រូវបានតាមចាប់ដោយប៉ូលិស២នាក់ ដោយភ្ជង់កាំភ្លើងពេលបុរសនោះរត់ទៅរករថយន្តរបស់គេ ។ ពេលបើកទ្វាររថយន្តប៉ូលិសស្បែកសម្នាក់បានបាញ់សំដៅគេដល់ទៅ៧គ្រាប់ នាំឲ្យគេត្រូវគ្រាប់កាំភ្លើងច្រើនគ្រាប់ត្រង់ខ្នង ។
ការបាញ់ប្រហារនោះធ្វើឡើងនៅចំពោះភ្នែកកូន៣នាក់របស់គេដែលជិះនៅបាំងក្រោយនៃរថយន្ត ។ប៉ូលិស២នាក់ដែលដេញតាមចាប់បុរសនោះរហូតដល់បាញ់ប្រហារគេត្រូវបានព្យូរតំណែងហើយការសើុបអង្កេតមួយត្រូវបានបើកធ្វើ ។
បាតុករប្រមាណជា១.០០០នាក់ដែលប្រមូលផ្ដុំគ្នានៅមុខតុលាការក្រុងកេណូសា ដំបូង
បានលើកគ្នាដើរហែក្បួនដោយសន្តិវិធី ប៉ុន្តែ១ម៉ោងក្រោយមក ពេលបំរាមគោចរណ៍ចូលជាធរមាន ការប៉ះទង្គិចគ្នាក៏ផ្ទុះឡើងជាមួយកងកម្លាំងសន្តិសុខ ។ ពួកបាតុករបានគប់ដបនិងកាំជ្រួចភ្លើងសំដៅប៉ូលិស ដុតបណ្ដារថយន្តនិងដុតអគារមួយ ។ ពួកគេរងការបាញ់ឧស្ម័នបង្ហូរទឹកភ្នែកពីសំណាក់ប៉ូលិស ។
នៅទីក្រុងមីននីប៉ូលីសជាទីក្រុងដែលលោក GEORGE FLOYD ស្លាប់កាលពីថ្ងៃទី២៥ ឧសភា ហើយជាប្រភពនៃការកកើតចលនាប្រឆាំងការប្រកាន់ពូជសាសន៍ជាប្រវត្តិសាស្ត្រ ពួកបាតុករបានឈានដល់ដុតទង់ជាតិអាមេរិកមួយ ។ មនុស្សប្រមាណជា២០០នាក់បានហែក្បួននៅក្រុងញូវយ៉ក ។ ក្នុងទីក្រុងព័រឡែនជាកន្លែងមានបាតុកម្មប្រឆាំងការប្រកាន់ពូជសាសន៍ស្ទើររាល់ថ្ងៃ ពួកបាតុករបាននាំគ្នាស្រែកឈ្មោះរបស់JACOB BLAKE ។
មេធាវីរបស់គ្រួសារលោក JACOB BLAKE អះអាងថា កូនទាំង៣នាក់របស់គេស្ថិតក្នុងរថយន្ត ពេលបុរសនោះចុះទៅប៉ុនប៉ងឃាត់ការឈ្លោះគ្នារវាងនារី២នាក់ តែបែរជាត្រូវពួកប៉ូលិសភ្ជុងកាំភ្លើងប៉ងចាប់ខ្លួន និងឈានទៅបាញ់ប្រហារគេ ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ