មហាសេដ្ឋី បាបារ៉ា ខូខូរ៉ាន (Barbara Corcoran) ជាសហគ្រិន និងនិយោគិនដ៏ជោគជ័យមួយរូបប្រចាំសហេដ្ឋអាមេរិក ប៉ុន្តែភាពជោគជ័យទាំងនេះមិនកើតមានឡើងក្នុងរយៈពេលខ្លីទេ ។ ផ្ទុយមកវិញ…
មហាសេដ្ឋី បាបារ៉ា ខូខូរ៉ាន (Barbara Corcoran) ជាសហគ្រិន និងនិយោគិនដ៏ជោគជ័យមួយរូបប្រចាំសហេដ្ឋអាមេរិក ប៉ុន្តែភាពជោគជ័យទាំងនេះមិនកើតមានឡើងក្នុងរយៈពេលខ្លីទេ ។ ផ្ទុយមកវិញ អ្នកស្រីបានចំណាយពេលជាច្រើនឆ្នាំដើម្បីកសាងទ្រព្យសម្បត្តិតាំងពីបាតដៃទទេ ។
អ្នកស្រីធ្លាប់មានជីវភាពក្រីក្រពេលដែលនៅវ័យក្មេង ។ ប៉ុន្តែអ្នកស្រីបន្តមានភាពស្រមើលស្រម៉ៃខ្ពស់ និងបង្ហាញពីទេពកោសល្យក្នុងផ្នែកអាជីវកម្មតាំងពីនៅវ័យក្មេងផងដែរ ។ នៅអាយុ ២៣ឆ្នាំ អ្នកស្រីរកចំណូលបានគ្រប់តែសម្រាប់ការចាយវាយប្រចាំថ្ងៃប៉ុណ្ណោះខណៈដែលធ្វើជាអ្នករត់តុមុននឹងជួបជាមួយនឹងស្វាមីរបស់អ្នកស្រីគឺលោក រ៉ាម៉ូន ស៊ីម៉ូន (Ramone Simone) ។
ស្វាមីអ្នកស្រីបានឲ្យអ្នកស្រីខ្ចីលុយ ១ពាន់ដុល្លារដើម្បីចាប់ផ្តើមអាជីវកម្មអចលនទ្រព្យមួយ មុននឹងចាកចេញពីភរិយាដើម្បីទៅរៀបអាពាហ៍ពិពាហ៍ជាមួយលេខារបស់ខ្លួន ។ រឿងដ៏ជូរចត់ទាំងនេះបានជំរុញទឹកចិត្តអ្នកស្រីរហូតអាចកសាងក្រុមហ៊ុន Corcoran Group ដ៏ធំមួយ ។ សម្រាប់មនុស្សទូទៅ ជាពិសេសសហគ្រិន អ្នកអាចរៀនសូត្របានជាច្រើនពីមហាសេដ្ឋីរូបនេះ ។
១. អតីតកាលរបស់អ្នកមិនមែនជាជីវិតរបស់អ្នកទាំងស្រុងទេ
អ្នកស្រីបានចែករំលែកម្តងហើយម្តងទៀតថា ការធំធាត់ឡើងក្នុងគ្រួសារដែលមានជីវភាពក្រីក្រជាកត្តាសំខាន់ដែលនាំយកភាពជោគជ័យមកឲ្យអ្នកស្រី ព្រោះក្មេងដែលក្រីក្រមិនខ្លាចបាត់បង់អ្វីទេព្រោះពួកគេគ្មានអ្វីឲ្យបាត់បង់ឡើយ ។
អ្នកស្រីមិនបានអនុញ្ញាតឲ្យស្ថានការគ្រួសារបង្កជាឧបសគ្គសម្រាប់អ្នកស្រីឡើយ ។ បន្ទាប់ពីស្វាមីបានចាកចេញទៅ អ្នកស្រីក៏មិនអនុញ្ញាតឲ្យការខកចិត្តនេះរារាំងអ្នកស្រីមិនឲ្យសម្រេចគោលដៅក្នុងជីវិតដែរ ។
២. ពិន្ទុមានសារៈសំខាន់ តែការមានទឹកចិត្តពុះពារក៏មានសារៈសំខាន់ដែរ
អ្នកស្រីមិនមែនជាសិស្សពូកែខ្លាំងឡើយពេលដែលសិក្សានៅវិទ្យាល័យ និងសាកលវិទ្យាល័យ ។ អ្នកស្រីថែមទាំងធ្លាក់មុខវិជ្ជាជាច្រើនទៀតផងពេលសិក្សារនៅវិទ្យាល័យ ។
អ្នកស្រីមិនមានសមត្ថភាពក្នុងការអានបានល្អដូចមិត្តដទៃទេ ។ ប៉ុន្តែអ្នកស្រីជាឧទាហរណ៍ជាក់ស្តែងបង្ហាញឲ្យឃើញថាទោះជាពិន្ទុក្នុងការសិក្សាមានសារៈសំខាន់ពិតមែន ការពុះពារក៏មានសារៈសំខាន់ដែរ ហើយអ្នកមិនចាំបាច់ត្រូវការពិន្ទុខ្ពស់ដើម្បីជោគជ័យក្នុងជីវិតទេ ។
៣. អ្នកមានសិទ្ធិក្នុងការបញ្ចេញសំឡេង
ទីផ្សារអចលនទ្រព្យក្នុងទីក្រុងញូយ៉កពោរពេញទៅដោយមនុស្សប្រុស ។ អ្នកស្រីធ្លាប់បានចែករំលែកមកថា ទោះជាស្ត្រីមានសមត្ថភាពខ្ពស់ពិតមែនក្តី ពួកគេភាគច្រើនធ្វើការឲ្យក្រុមហ៊ុនរបស់ ឬគ្រប់គ្រងដោយមនុស្សប្រុសទៅវិញ ។
អ្នកស្រីបានចែករំលែកដំបូន្មានសម្រាប់ស្ត្រីៗដទៃថា អ្នកមិនចាំបាច់ព្យាយាមធ្វើខ្លួនឲ្យដូចបុរសៗទាំងនោះទេ តែអ្នកត្រូវចេះប្រើភាពជានារីរបស់ខ្លួនដូចជាជំនាញមួយចំនួនដែលស្ត្រីភាគច្រើនពូកែជាងមនុស្សប្រុសដូចជាការសម្របសម្រួល ការចេះដាក់ខ្លួន និងការចែករំលែកគុណសម្បត្តិជាមួយអ្នកដទៃជាដើម ៕ (យោងតាមប្រភពពី www.entrepreneur.com)
ចែករំលែកព័តមាននេះ