ស្លា.ប់១ របួសធ្ងន់២ក្នុងគ្រោះថ្នាក់ចរាចរណ៍២ករណីផ្សេងគ្នានៅខេត្តបន្ទាយមានជ័យ
ខេត្តបន្ទាយមានជ័យ ៖ មនុស្សម្នាក់បានស្លា.ប់ដោយសាររថយន្តបុករថយន្ត និង២នាក់ទៀតបានរងរបួសធ្ងន់ដោយម៉ូតូបុកអ្នកថ្មើរជើង នៅខេត្តបន្ទាយមានជ័យ ។
ខេត្តបន្ទាយមានជ័យ ៖ មនុស្សម្នាក់បានស្លាប់ដោយសាររថយន្តបុករថយន្ត និង២នាក់ទៀតបានរងរបួសធ្ងន់ដោយម៉ូតូបុកអ្នកថ្មើរជើង នៅខេត្តបន្ទាយមានជ័យ ។
ប្រភពព័ត៌មានពីនគរបាលចរាចរណ៍ខេត្តបានឲ្យដឹងថា នៅវេលាម៉ោង៨យប់ ថ្ងៃទី១៤ ខែកុម្ភៈ ឆ្នាំ២០១៥ លើកំណាត់ផ្លូវជាតិលេខ៥ ក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ មានគ្រោះថ្នាក់ចរាចរណ៍កើតឡើងរវាងរថយន្តស្ទូច បើកបុករថយន្តដឹកទំនិញធុនធំ បណ្តាលឲ្យអ្នកបើកបររថយន្តស្ទូចគាបជាប់ស្លាប់ភ្លាមៗនៅនឹងកន្លែង ។ ជនរងគ្រោះដែលស្លាប់ឈ្មោះនូ សុខេង ភេទប្រុស អាយុ៣៨ឆ្នាំ រស់នៅភូមិដូង ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។ ចំណែកអ្នកបើករថយន្តដឹកទំនិញធុនធំត្រូវបានគេស្គាល់ឈ្មោះជិន ខា ភេទប្រុស អាយុ៤៤ឆ្នាំ រស់នៅភូមិ ឃុំជាខ្លាង ស្រុកស្វាយអន្ទរ ខេត្តព្រៃវែង ។ សមត្ថកិច្ចនគរបាលបានឱ្យដឹងទៀតថា មុនពេលកើតហេតុ រថយន្តស្ទូច ពាក់ស្លាកលេខ តាកែវ 3A 1716 បានបើកពីទិសខាងកើតទៅខាងលិច លុះដល់ចំណុចកើតហេតុបានជែងរថយន្ត១គ្រឿងក៏ជ្រុលចង្កូតទៅបុករថយន្តដឹកទំនិញធុនធំ ពាក់ស្លាកលេខ ព្រៃវែង 3A 0679 បើកបញ្ច្រាសទិសគ្នាពីលិចទៅកើតបណ្តាលឲ្យគាបអ្នកបើករថយន្តស្ទូចស្លាប់នៅនឹងកន្លែង ចំណែករថយន្តធំរងរបួសបន្តិចបន្តួច ឯរថយន្តទាំង២គ្រឿងខូចខាតធ្ងន់ធ្ងរ ។
រីឯករណីមួយផ្សេងទៀត កើតឡើងនៅវេលាម៉ោង១១ និង២០នាទីយប់ ថ្ងៃទី១៤ ខែកុម្ភៈ ឆ្នាំ២០១៥ នៅលើកំណាត់ផ្លូវជាតិលេខ៥ ក្នុងភូមិសាស្ត្រភូមិភ្នំធំត្បូង ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យដែរ គឺមានគ្រោះថ្នាក់ចរាចរណ៍ដោយម៉ូតូបុកអ្នកធ្វើដំណើរថ្មើរជើងបណ្តាលឲ្យរងរបួសធ្ងន់ទាំងអ្នកបើកម៉ូតូ និងអ្នកដើរ យកទៅព្យាបាលនៅមន្ទីរពេទ្យបង្អែកមិត្តភាពកម្ពុជា-ជប៉ុន ស្រុកមង្គលបូរី ។សមត្ថកិច្ចបានឱ្យដឹងថា អ្នកបើកម៉ូតូឈ្មោះហ៊ុន សម្បត្តិ ភេទប្រុស អាយុ៣២ឆ្នាំ នៅភូមិអូរជួប ឃុំរហាត់ទឹក ស្រុកមង្គលបូរី បើកម៉ូតូម៉ាកហុងដា សេ១២៥ សេរី២០១១ ពណ៌ខ្មៅ ពាក់ស្លាកលេខ ប.មានជ័យ 1E 4697 ពីត្បូងទៅជើង ចំណែកអ្នកដើរឈ្មោះប្រុក ប៉ោត ភេទប្រុស អាយុ៣៥ឆ្នាំ ជាមនុស្សវិកលចរិក នៅភូមិភ្នំតូចត្បូង ឃុំភ្នំតូច ស្រុកមង្គលបូរី ដើរតាមបណ្តោយផ្លូវជាតិលេខ៥ស្របទិសគ្នា ករណីនេះបណ្តាលអ្នកបើកម៉ូតូរបួសធ្ងន់ក្បាល និងមុខ ឯអ្នកដើរបាក់កជើងស្តាំ ចំណែកឯម៉ូតូខូចស្រាល ។ សមត្ថកិច្ចបន្តទៀតថា មូលហេតុដែលបណ្តាលឱ្យមានគ្រោះថ្នាក់ចរាចរណ៍នេះគឺមកពីអ្នកបើកម៉ូតូខ្វះការប្រុងប្រយ័ត្ន និងបើកលឿនពេក ៕
ចែករំលែកព័តមាននេះ