លុយជាទ្រព្យសម្បត្តិ និងធនធានដែលមានតម្លៃជាងគេសម្រាប់មនុស្សជាច្រើន ប៉ុន្តែសម្រាប់លោកមហាសេដ្ឋីខេវីន អូលៀរី (Kevin O’Leary) និងលោកមហាសេដ្ឋី ម៉ាក ឃ្យូបេន (Mark…
លុយជាទ្រព្យសម្បត្តិ និងធនធានដែលមានតម្លៃជាងគេសម្រាប់មនុស្សជាច្រើន ប៉ុន្តែសម្រាប់លោកមហាសេដ្ឋីខេវីន អូលៀរី (Kevin O’Leary) និងលោកមហាសេដ្ឋី ម៉ាក ឃ្យូបេន (Mark Cuban) វិញ ពេលវេលាទើបជាអ្វីដែលមានតម្លៃជាងគេសម្រាប់មនុស្ស។
លោកអូលៀរីបានប្រាប់ដល់ CNBC Make It ថា ជាដំបូង ពេលវេលាជាអ្វីដែលអ្នកត្រូវប្រើ ដើម្បីរកលុយ។ ប៉ុន្តែអ្វីដែលសំខាន់ជាងនេះទៀត គឺលុយអនុញ្ញាតឲ្យអ្នកទទួលបានសេរីភាពផ្ទាល់ខ្លួន។ លោកបានចែករំលែកមកថាលោកបានខិតខំប្រឹងប្រែងខ្លាំងណាស់ ដើម្បីទទួលបានសេរីភាពនេះ។
លោកបានបកស្រាយថា «វាងាយស្រួលយល់ណាស់។ វាអនុញ្ញាតឲ្យខ្ញុំបែងចែកពេលវេលារបស់ខ្ញុំតាមចិត្តចង់។ ពេលដែលទូរស័ព្ទរោទិ៍ ខ្ញុំមិនចាំបាច់ទទួលវាទេ។ ពេលដែលមនុស្សម្នាក់ប្រាប់ខ្ញុំឲ្យទៅណាមួយ ខ្ញុំមិនចាំបាច់ស្តាប់តាមទេ។ ខ្ញុំមិនធ្វើការឲ្យនរណាឡើយ។ មនុស្សតែម្នាក់គិតដែលខ្ញុំរាយការណ៍ប្រាប់គឺខ្ញុំខ្លួនឯង»។
ជាមួយគ្នានេះដែរ លោកបានចែករំលែកថា គន្លឹះសំខាន់ក្នុងការប្រើប្រាស់ពេលវេលាឲ្យបានឆ្លាតវៃ គឺ ការកំណត់គោលដៅឲ្យបានច្បាស់លាស់។
លោកទូន្មានឲ្យអ្នកព្យាយាមបែងចែកថ្ងៃរបស់អ្នកទៅជាផ្នែកតូចៗ ដើម្បីបង្ខំឲ្យខ្លួនផ្តោតស្មារតីតែលើអ្វីដែលពិតជាសំខាន់សម្រាប់អ្នកទេ។
លោកបានបកស្រាយទៀតថា «មនុស្សដែលមានសុភមង្គល ជាមនុស្សដែលមានលំនឹងល្អក្នុងជីវិត។ ពួកគេបានប្រទះឃើញវិធីក្នុងការបែងចែកពេលវេលាសម្រាប់អ្វីដែលមានអត្ថន័យសម្រាប់ពួកគេ»។ សម្រាប់លោកអូលៀរី វាមានន័យថា លោកមានពេលចំណាយលើសកម្មភាពដែលលោកចូលចិត្តធ្វើដូចជាអំពើសប្បុរសធម៌ ការលេងតន្ត្រី និងការចំណាយពេលជាមួយក្រុមគ្រួសាររបស់លោកជាដើម។
លោកមហាសេដ្ឋីម៉ាក ឃ្យូបេន (Mark Cuban) ដែលជាវិនិយោគិន និងម្ចាស់អាជីវកម្មប្រចាំក្រុមហ៊ុនធំៗនៅសហរដ្ឋអាមេរិកក៏យល់ស្របនឹងទស្សនៈនេះដែរ។ លោកធ្លាប់បាននិយាយក្នុងបទសម្ភាសន៍មួយកាលពីឆ្នាំ ២០១៧ ថា «អ្នកមិនអាចទិញវាទេ។ អ្នកមិនអាចស្វែងរកវាឃើញទេ។ អ្នកមិនអាចយកអ្វីទៅប្តូរយកវាបានទេ»។
ជាលទ្ធផល លោកអូលៀរីជំរុញទឹកចិត្តឲ្យមនុស្សដែលនៅវ័យក្មេងផ្តោតស្មារតីលើការបង្កើតនូវជីវិតមួយដែលអនុញ្ញាតឲ្យពួកគេមានពេលវេលា និងសេរីភាពក្នុងការបង្កើតឲ្យបានសុភមង្គល។ លោកអូលៀរីគិតថា មនុស្សម្នាក់ជោគជ័យក្នុងជីវិតនៅពេលដែលទូរស័ព្ទរោទិ៍ហើយតែអ្នកមិនប្រញាប់ទទួលវាទេ។ ដកស្រង់ចេញពីវេបសាយ ៖ cnbc
ចែករំលែកព័តមាននេះ