ផ្អើល​ទាំង​ព្រឹក​! កម្មករ​ម្នាក់​ឡើង​រុះ​ស្បៃ​ចេញពីផ្ទះ​ល្វែង បែរជា​​ធ្លាក់​ចុះ​មក​ក្រោម


រាជធានី​ភ្នំពេញ ៖ សេចក្តីរាយការណ៍​បន្ត​ថា ក្រោយ​ពី​ការ​សាងសង់​ផ្ទះល្វែង​មួយ​កន្លែង​រួចរាល់​ជា​ស្ថាពរ​ហើយ មេការ​បាន​ប្រើ​ឲ្យ​កម្មករ​សំណង់​ម្នាក់​ឡើង​ទៅ​រុះរើ​ស្បៃ​ដែល​បាំង​ព័ទ្ធ​ការពារ​មិន​ឲ្យ​សម្ភារៈ​សំណង់​ផ្សេង​ៗ​នៅ​ទីនោះ​ធ្លាក់​ចុះ​មក​ក្រោម​បង្ក​គ្រោះថ្នាក់​ដល់​អ្នក​ដទៃ​ចេញ ។ ប៉ុន្តែ​ដោយសារ​តែ​ផ្ទះ​នោះ​សង់​កៀក​នឹង​ខ្សែភ្លើង ហើយ​ពេល​ដាក់​រន្ទា​ឡើង​ជាប់​នឹង​បង្គោល​ភ្លើង​ថែម​ទៀត​នោះ លុះ​ពេល​ឡើង​ទៅ​ក៏​បាន​ជាន់​លើ​ខ្សែភ្លើង បណ្ដាល​ឲ្យ​ឆ្លង​ចរន្ត​បែក​ជា​ផ្កាភ្លើង​ព្រាត​ៗ​ធ្វើ​ឱ្យ​ឆក់​បុរស​ជា​កម្មករ​រូប​នោះ​ធ្លាក់​ពី​កម្ពស់​៣​ជាន់​មក​ក្រោម​ធ្វើ​ឱ្យ​បាត់បង់​ជីវិត​ភ្លាម​ៗ​នៅ​នឹង​កន្លែង​តែ​ម្ដង​។

សេចក្តីរាយការណ៍​បន្ត​ថា ហេតុការណ៍​ខាងលើ​នេះ​បាន​កើតឡើង​កាលពី​ម៉ោង​៧​និង​៤៥​នាទី​ព្រឹក ថ្ងៃ​ទី​២០ ខែសីហា ឆ្នាំ​២០២០ នៅ​ត្រង់​ចំណុច​ខាងត្បូង​ភ្លើងស្តុប​ទួល​ពង្រ​ចម្ងាយ​ប្រមាណ​១០០​ម៉ែត្រ នៅ​តាម​បណ្ដោយ​ផ្លូវ​ទួល​ពង្រ ស្ថិត​ក្នុងភូមិ​ត្រពាំង​ថ្លឹង​១ សង្កាត់​ចោម​ចៅ​ទី​១ ខណ្ឌ​ពោធិ៍​សែន​ជ័យ ។

សេចក្តីរាយការណ៍​បន្ត​ថា បុរស​រង​គ្រោះ​ខាងលើ​មានឈ្មោះ សុខ ទិ​ត អាយុ​២៥​ឆ្នាំ មុខរបរ​កម្មករ​សំណង់ មាន​ទីលំនៅ​ក្នុងភូមិ​ព្រៃខ្លា ឃុំ​ប្រឡាយ ស្រុក​ស្ទោង ខេត្តកំពង់ធំ​។

តាម​ប្រភព​ពី​កម្មករ​សំណង់​រួមការ​ងារ​បាន​ឲ្យ​ដឹង​ថា ផ្ទះល្វែង​ខាងលើ មាន​ចំនួន​៦​ល្វែង​ជាប់​គ្នា ហើយ​បាន​សង់​ចម្ងាយ​ពី​បង្គោល​ភ្លើង​ប្រមាណ​១​ម៉ែត្រ​ប៉ុណ្ណោះ ដែល​ពេល​នេះ​បាន​សាងសង់​រួចរាល់​ជា​ស្ថាពរ​ហើយ​។ ដោយឡែក​នៅ​ព្រឹក​ថ្ងៃ​កើតហេតុ មេការ​សំណង់​បាន​ប្រើ​ឲ្យ​កម្មករ​ឡើង​ស្រាយ​រុះរើ​ស្បៃ​ដែល​បាន​ចង​បាំង​ព័ទ្ធ​ជុំវិញ​ផ្ទះ​នោះ អំឡុង​ពេល​សាងសង់​ដើម្បី​ការពារ​កុំ​ឲ្យ​សម្ភារៈ​សំណង់​ផ្សេង​ៗ​នៅ​ទីនោះ​ធ្លាក់​មក​ក្រោម​បង្ក​គ្រោះថ្នាក់​ដល់​អ្នក​ដទៃ ចេញ​។

កម្មករ​ខាងលើ​បន្ត​ថា ខណៈនោះ​ជន​រង​គ្រោះ​បាន​ឡើង​តាម​រន្ទា​ឈើ​ដែល​ដាក់​នៅ​ជាប់​នឹង​បង្គោល​ភ្លើង តែ​ជា​អកុសល​បាន​ជាន់​លើ​ខ្សែភ្លើង បណ្ដាល​ឲ្យ​ឆ្លង​ចរន្ត​ទុ​ស្សេ​បែក​ផ្កាភ្លើង​ព្រាត និង​ឆក់​បុរស​រង​គ្រោះ​ហុយផ្សែង​តាម​ខ្លួន រួច​ធ្លាក់​ពីលើ​រន្ទា​កម្ពស់​៣​ជាន់ របួស​ស​ធ្ងន់ធ្ងរ​តែ​ម្តង​។

ប្រភព​ដដែល​បន្ត​ទៀត​ថា ភ្លាម​ៗ​នោះ​មិត្តភក្ដិ​រួមការ​ងារ​បាន​នាំ​គ្នា​សែង​យក​ទៅ​កប់​ក្នុង​ដីខ្សាច់​ដែរ ដើម្បី​ជួយ​សង្គ្រោះ​បឋម​ក្រែង​អាច​ជួយ​បាន ព្រមទាំង​ហៅ​ក្រុម​សង្គ្រោះ​អង្គភាព​៧១១ ទៅ​ជួយ​ដឹក​យក​ទៅ​កាន់​មន្ទីរពេទ្យ​ដែរ ប៉ុន្តែ​ពេល​ក្រុម​សង្គ្រោះ​ទៅ​ដល់​ពិនិត្យ​ឃើញ​ថា ជន​រង​គ្រោះ​បាន​បាត់បង់​ជីវិត​ទៅ​ហើយ​។ ពេល​នោះ​បង្ក​ឲ្យ​មានការ​ភ្ញាក់ផ្អើល​យ៉ាង​ខ្លាំង បន្ទាប់​មក​ក្រុម​គ្រួសារ​សាច់ញាតិ និង​ប្រពន្ធ​បុរស​រង​គ្រោះ​រូប​នេះ​មក​ដល់ ក៏​មានការ​សោកសង្រេង​ខ្លាំង​ណាស់ ព្រមទាំង​លើកសព​ដាក់​លើ​ម៉ូតូ​សណ្ដោង​រ៉ឺ​ម៉ក បម្រុង​ដឹក​យក​ចេញពី​កន្លែង​កើតហេតុ តែ​ត្រូវ​នគរបាល​ប៉ុស្ដិ៍​ចោម​ចៅ​ទី​១ ឃាត់​មិន​ឲ្យ​ដឹក​ចេញ​ទេ គឺ​រង់ចាំ​ការ​ពិនិត្យ និង​ធ្វើ​កំណត់ហេតុ​តាម​ច្បាប់​សិន ទើប​ប្រគល់​សាកសព​ជូន​យក​ទៅ​ធ្វើបុណ្យ​តាម​ប្រពៃណី​។

មហាជន​នៅ​កន្លែង​កើតហេតុ​បាន​និយាយ​ថា ផ្ទះល្វែង​ខាងលើ សាងសង់​ឡើង​កៀក​នឹង​បង្គោល​ភ្លើង​បែប​នេះ​ពុំ​ដឹង​ថា តើ​អាជ្ញាធរ​ខណ្ឌ​ពោធិ៍​សែន​ជ័យ​បានដឹង និង​ចុះ​ធ្វើការ​ត្រួតពិនិត្យ​ដែរ​ឬ​អត់​នោះ​ទេ? ផ្ទះ​នេះ​មាន​គម្លាត​ពី​បង្គោល​ភ្លើង​ប្រហែល​១​ម៉ែត្រ​ប៉ុណ្ណោះ ។ ពេល​នេះ​បាន​បង្ក​ឲ្យ​មាន​គ្រោះថ្នាក់​ដល់​អាយុជីវិត​កម្មករ​សំណង់​ទៀត ហើយ​នៅ​ពេល​ក្រោយ​នឹង​អាច​ធ្វើ​ឲ្យ​អ្នក​ដែល​ចូល​ទៅ​រស់នៅ​ក្នុងផ្ទះ​នោះ​ប្រឈម​នឹង​គ្រោះថ្នាក់​មិន​ខាន​ឡើយ​៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




    សូម​អរគុណ