រាជធានីភ្នំពេញ ៖ កម្មករសំណង់២ក្រុមបានផឹកស៊ីក្បែរគ្នា ដោយភាគីម្ខាងផឹកស្រាថ្នាំចំណែកភាគីម្ខាងទៀតផឹកស្រាបៀរ លុះក្រោយមកស្រាប់តែមានទំនាស់ពាក្យសម្ដីគ្នា រហូតក្លាយទៅជាអំពើហឹង្សាវាយប្រយុទ្ធគ្នាទៅវិញទៅមក បណ្ដាលឲ្យបាត់បង់ជីវិតបុរសម្នាក់ ក្រោយពេលបញ្ជូនទៅសង្គ្រោះដល់មន្ទីរពទ្យព្រះកុសុម ចំណែកច្រើននាក់ទៀតរងរបួសធ្ងន់និងស្រាលហើយបានរត់គេចខ្លួនបាត់អស់។
ហេតុការណ៍ខាងលើនេះបានកើតឡើងកាលពីវេលាម៉ោង៧យប់ថ្ងៃទី១២ ខែសីហា ឆ្នាំ២០២០ នៅចំណុចរោងកម្មករស្នាក់នៅបុរីមួយកន្លែង មានទីតាំងស្ថិតនៅក្នុងក្រុមទី២ ភូមិព្រៃព្រីងត្បូង១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះដែលបាត់បង់ជីវិតឈ្មោះ មួន រើន ភេទប្រុស អាយុ៣៣ឆ្នាំ មុខរបរកម្មករសំណង់ស្នាក់នៅកន្លែងកើតហេតុខាងលើ និងមានស្រុកកំណើតនៅក្នុងខេត្តព្រៃវែង ។ ចំណែកជនដៃដល់ឈ្មោះ សុខា ភេទប្រុស អាយុ២០ឆ្នាំ មុខរបរ និងស្នាក់នៅរោងក្បែរគ្នា ហើយមានស្រុកកំណើត នៅខេត្តព្រៃវែងដែរ ។
តាមប្រភពព័ត៌មានបានឲ្យដឹងថា នៅវេលាយប់ថ្ងៃកើតហេតុខាងលើ ភាគីខាងជនរងគ្រោះមានគ្នាចំនួន៣នាក់បាននាំគ្នាផឹកស្រា.ស ចំណែកឯភាគីជនដៃដល់មានគ្នាចំនួន៥នាក់បានជុំគ្នាផឹកស្រាបៀរនៅជិតនោះដែរ ។ លុះក្រោយមក ស្រាប់តែមានទំនាស់ពាក្យសម្ដីគ្នាកើតឡើង ហើយជនរងគ្រោះបានយកញញួរស្ទុះទៅវាយក្បាលជនសង្ស័យ បណ្តាលឱ្យបែកក្បាលរងរបួសតយ៉ាងដំណំ ។
តាមប្រភពព័ត៌មានបានឱ្យដឹងបន្តថា ខណៈនោះជនសង្ស័យ និងបក្ខពួកបានទាញយកដំបងឈើលើកគ្នាចូលវាយតបតវិញ បណ្តាលឲ្យជនរងគ្រោះរងរបួសធ្ងន់ធ្ងរ និងត្រូវបានគេដឹកតាមម៉ូតូយកទៅមន្ទីរពេទ្យព្រះកុសុមៈដើម្បីសង្គ្រោះបន្ទាន់ ប៉ុន្តែដោយសារជនរងគ្រោះរងរបួសធ្ងន់ធ្ងរពេក ក៏បានបាត់បង់ជីវិតនៅវេលាម៉ោង៩យប់ថ្ងៃដដែលនោះ ហើយសពត្រូវបានតម្កល់ទុកនៅក្នុងមន្ទីរពេទ្យព្រះកុសុមៈនោះ ចំណែកអ្នករងរបួសដែលស្ថិតនៅក្នុងក្រុមភាគីទាំងសងខាងចំនួន៧នាក់ទៀតបានរត់គេចខ្លួនបាត់អស់។
តាមប្រភពព័ត៌មានបានបន្តទៀតថា នគរបាលបានចុះទៅអន្តរាគមន៍ដែរ ប៉ុន្តែនឹងធ្វើការស្រាវជ្រាវមួយជំហ៊ាន ហើយរហូតដល់វេលាព្រឹកថ្ងៃទី១៣ ខែសីហា កម្លាំងនគរបាលការិយាល័យបច្ចេកទេសនិងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញចុះទៅពិនិត្យកោសល្យវិច័យសពនៅឯមន្ទីរពេទ្យព្រះកុសុមៈ ព្រមទាំងចុះទៅពិនិត្យនៅកន្លែងកើតហេតុកាលពីយប់នោះផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ