លក់«គោបា»ជាវត្ថុស័ក្តិសិទ្ធិ អ្នកចាញ់បោកទឹកភ្នែក
- ភ្នំពេញ
រាជធានីភ្នំពេញ ៖ សេចក្តីរាយការណ៍ឲ្យដឹងថា កាលពីព្រឹកថ្ងៃទី៨ ខែសីហា ឆ្នាំ២០២០ លោក ពេជ្រ វិជ្ជាធរ អនុប្រធាន…
រាជធានីភ្នំពេញ ៖ សេចក្តីរាយការណ៍ឲ្យដឹងថា កាលពីព្រឹកថ្ងៃទី៨ ខែសីហា ឆ្នាំ២០២០ លោក ពេជ្រ វិជ្ជាធរ អនុប្រធាន…
រាជធានីភ្នំពេញ ៖ សេចក្តីរាយការណ៍ឲ្យដឹងថា កាលពីព្រឹកថ្ងៃទី៨ ខែសីហា ឆ្នាំ២០២០ លោក ពេជ្រ វិជ្ជាធរ អនុប្រធាន និងជាចៅក្រមស៊ើបសួរ សាលាដំបូងរាជធានីភ្នំពេញ បានសម្រេចចេញដីកាឃុំខ្លួនជនសង្ស័យម្នាក់ ពាក់ព័ន្ធករណីលក់គោបាវត្ថុអនុស្សាវរីយ៍ក្លែងក្លាយថា ជាវត្ថុស័ក្តិសិទ្ធិឆបោកប្រាក់អ្នកដទៃប្រមាណជាង២០ម៉ឺនដុល្លារអាមេរិក ។
សេចក្តីរាយការណ៍បន្តថា កាលពីថ្ងៃទី១ ខែសីហា ឆ្នាំ២០២០ ដោយមានការចង្អុល បង្ហាញពីលោកឧត្តមសេនីយ៍ឯក អុិន បូរ៉ា អគ្គស្នងការរងនគរបាលជាតិ ទទួលផែននាយកដ្ឋានកណ្តាលនគរបាលយុត្តិធម៌ និងលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ កម្លាំងនាយកដ្ឋាននគរបាលព្រហ្មទណ្ឌ ដឹកនាំដោយលោកវរសេនីយ៍ឯក ខេង ម៉េងឈាង នាយការិយាល័យព្រមហ្មទណ្ឌកម្រិតស្រាល សហការជាមួយកម្លាំងស្នងការដ្ឋាននគរបាលខេត្តកំពង់ស្ពឺ បានចុះបង្ក្រាបបទល្មើសជាក់ស្តែងមួយករណីបានសម្រេច។
គឺករណីឆបោក (លក់វត្ថុស័ក្តិសិទ្ធិគោបា) ត្រង់ចំណុចភូមិត្រពាំងជ្រៃ ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ ។ បានឃាត់ខ្លួនជនសង្ស័យម្នាក់ឈ្មោះ រិន សុភ័ក្ត្រ ហៅ រិន សារ៉េត ហៅរ៉ា ភេទប្រុស អាយុ៤១ឆ្នាំ ដើម្បីយកទៅសាកសួរនៅការិយាល័យព្រហ្ម ទណ្ឌ ។ តាមចម្លើយជនសង្ស័យឈ្មោះ រិន សុភ័ក្ត្រ ហៅ រិន សារ៉េត បានសារភាពថា ខ្លួនពិតជាបានធ្វើសកម្មភាពឆបោកប្រាក់ ជនរងគ្រោះ ភេទប្រុស អាយុ៦២ឆ្នាំ លើទឹកប្រាក់ចំនួន១០០.០០០ដុល្លារ(១០ម៉ឺនដុល្លារអាមេរិក) ប្រាកដមែន ។
នៅពេលចាប់ខ្លួនជនសង្ស័យបានហើយសមត្ថកិច្ចបានធ្វើការដកហូតសម្ភារ៖
១-រថយន្ត១គ្រឿង ម៉ាក Lexus RX 300 ផលិតឆ្នាំ១៩៩៨ ពណ៌ទឹកមាស ពាក់ស្លាកលេខ កំពង់ចាម 2C-2324 ។
២-ទូរស័ព្ទ៣គ្រឿង ម៉ាកណូគៀចុចពិលពណ៌ខ្មៅ មួយគ្រឿង ម៉ាកSAMSUNG NOTE9 ពណ៌ព្រីងទំ មួយគ្រឿង និងម៉ាកSAMSUNG ពណ៌ស ។
៣-លោហៈធាតុ ពណ៌ខ្មៅ (រូបកូនគោ) ដាក់ក្នុងប្រអប់ពណ៌ខ្មៅ១ឱ្យឈ្មោះថាគោបា ។
៤-គាថា រុំស្កុត១ ។
៥-ប្រេងសម្រាប់លាបវត្ថុ(កូនគោពណ៌ខ្មៅ) ។
៦-ក្រណាត់ស ។
៧-ឈេីគូសមួយចំនួនធំ ។
៨-គាថា ស្លឹករឹក១ ។
៩-ឯកសារពាក់ព័ន្ធ ក្នុងការទិញលក់វត្ថុបុរាណមួយចំនួនទៀត ។
ក្រោយពីការសាកសួរបានចម្លើយគ្រប់គ្រាន់ នឹងករណីបង្ក្រាបជាបទល្មើសជាក់ស្តែង សមត្ថកិច្ចបានកសាងសំណុំរឿងបញ្ជូនជនសង្ស័យទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី ។ លុះដល់ព្រឹកថ្ងៃទី៨ ខែសីហា ទើបចៅក្រមស៊ើប សួរសម្រេចឃុំខ្លួនជនសង្ស័យរូបនេះដាក់ពន្ធនាគារព្រៃសជាបណ្តោះអាសន្ន ។
សូមរំលឹកថា កាលពីថ្ងៃទី២១ ខែឧសភា ឆ្នាំ២០២០ លោកវរសេនីយ៍ឯក ព្រំ សារឿន នាយការិយាល័យអនុវត្តដីកា បានធ្វើការឃាត់ខ្លួនឈ្មោះ សៀវ សុខនឿន ភេទប្រុស អាយុ៤១ឆ្នាំ តាមពាក្យបណ្តឹងរបស់ជនរងគ្រោះចំនួន៥នាក់ ក្នុងករណីឆបោកប្រាក់ចំនួន១៥៩.៥០០ (ដប់ប្រាំម៉ឺនប្រាំបួនពាន់ប្រាំរយដុល្លារអាមេរិក) តាមរូបភាពឆបោកលក់សំរឹទ្ធិគោបានេះដែលក្នុងនោះជនសង្ស័យមានបក្ខពួកចំនួន២នាក់ ប៉ុន្តែចាប់បានម្នាក់ ។
ក្រោយពីចាប់ខ្លួនឈ្មោះ ស៊ីវ សុខនឿន បានសារភាពថា ខ្លួនរួមជាមួយបក្ខពួកឈ្មោះ រិន សុភ័ក្ត្រ ហៅ រិន សារ៉េត ពិតជាបានប្រព្រឹត្តករណីឆបោកប្រាក់ពីជនរងគ្រោះទាំង៥ នាក់នោះប្រាកដមែន ។
ពេលចាប់ខ្លួនឈ្មោះ ស៊ីវ សុខនឿន សមត្តកិច្ចបានធ្វើការដកហូតសម្ភាររួមមាន ៖
ក្រឡពណ៌ក្រហម២ ខ្សែ.កអំបោះ២ខ្សែ ទូដែក១ ក្រឡទឹក១ និងអំបោះឆៅ១ដុំ ។
ក្រោយពីសាកសួរយកចម្លើយជនសង្ស័យឈ្មោះ ស៊ីវ សុខនឿន បានសារភាពប្រព្រឹត្តបទល្មើសជាក់ស្តែង សមត្ថកិច្ចបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ រហូតដល់ថ្ងៃទី២៤ ខែឧសភា ឆ្នាំ២០២០ លោក ឡុង វណ្ណា ចៅក្រមស៊ើបសួរបានចេញដីកាបង្គាប់ឲ្យឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។
ថ្ងៃទី២ ខែសីហា ឆ្នាំ២០២០ នាយកដ្ឋាននគរបាលព្រហ្មទណ្ឌ បានទទួលដីកាចាត់ឲ្យស៊ើបសួរជំនួសលេខ៤៤១ ព្រទ ចុះថ្ងៃទី២ ខែកក្កដា ឆ្នាំ២០២០ របស់លោក ស៊ លីនណា ចៅក្រមស៊ើបសួរសាលាដំបូងរាជធានីភ្នំពេញឲ្យស្រាវជ្រាវរកសាវតាជាតិរបស់ឈ្មោះ រិន សារ៉េត ហៅ រិន សុភ័ក្ត្រ ភេទប្រុស អាយុ៤១ឆ្នាំ ដែលជាបក្ខពួកម្នាក់ទៀត រហូតឈានដល់ការចាប់ខ្លួននឹងឃុំខ្លួនជនសង្ស័យរូបនេះតែម្តងទៅ ។
ក៏សូមបញ្ជាក់ផងដែរថា ករណីខាងលើនេះជនសង្ស័យមានគ្នា២នាក់ បានធ្វើសកម្ម ភាពប្រព្រឹត្តបទល្មើសចំនួន២ករណី សរុបទឹកប្រាក់ប្រមាណជាង២៥ម៉ឺនដុល្លារអាមេរិក រឿង (លក់វត្ថុស័ក្តិសិទ្ធិគោបា) ការពិតវត្ថុគោបាក្លែងក្លាយសោះ ។ ចុងក្រោយជន ឆបោកជាប់គុកទាំង២នាក់ ចំណែកជនរងគ្រោះមានតែទឹកភ្នែកព្រោះអត់បានប្រាក់មកវិញទេសូម្បីមួយដុល្លារ ៕
ចែករំលែកព័តមាននេះ