ខេត្តកំពង់ស្ពឺ ៖ បងប្អូនបង្កើត២នាក់ដែលរងនូវការវាយធ្វើបាបពីសំណាក់គូកនត្រូវជាមិត្តភក្តិរបស់លោកអធិការរងស្រុកសំរោងទងមួយរូប ដែលចូលទៅវាយបុរសរងគ្រោះទាំង២នាក់ដល់ក្នុងផ្ទះ រួចចាប់ខ្លួន និងកសាងសំណុំរឿងយកទៅដាក់ពន្ធនាគារនោះ ពេលនេះត្រូវបានថ្នាក់លើជ្រាប និងស្នើសុំឱ្យត្រឡប់ទៅគេហដ្ឋានវិញហើយ។
បើតាមប្រភពពីបងប្រុសរបស់បុរសរងគ្រោះទាំង២នាក់បានប្រាប់ឲ្យដឹងថា រូបគាត់ពិតជាអរគុណណាស់ចំពោះការផ្សាយរបស់កោះសន្តិភាព បើគ្មានកោះសន្តិភាពទេ ប្អូនប្រុសរបស់គាត់ទាំងពីរនាក់ច្បាស់ជាត្រូវគេបញ្ជូនយកទៅដាក់ពន្ធនាគារបាត់ទៅហើយ។ លើសពីនេះទៅទៀត រូបគាត់ក៏សូមថ្លែងអំណរគុណដល់ថ្នាក់ដឹកនាំខេត្ត លោកស្នងការមន្ត្រីការិយាល័យជំនាញ ជាពិសេសលោកស្រីព្រះរាជអាជ្ញា ដែលបានផ្ដល់យុត្តិធម៌ឲ្យប្អូនរបស់គាត់ និងបានអនុញ្ញាតិឱ្យត្រឡប់មកផ្ទះវិញប្រកបរបររកស៊ីចិញ្ចឹមជីវិតដោយសុចរិត។ ក្នុងនាមសាច់ញាតិជនរងគ្រោះ គាត់ក៏សូមសំណូមពរដល់ថ្នាក់ដឹកនាំ សូមមេត្តាត្រួតពិនិត្យមន្ត្រីថ្នាក់ក្រោម កុំឲ្យអាងខ្លួនមានអំណាចចេះតែដើរធ្វើបាបប្រជាពលរដ្ឋស្លូតត្រង់បែបនេះតទៅទៀត។
ប្រភពដដែលបន្តថា ចំពោះរឿងនេះ ក្រុមគ្រួសាររបស់គាត់ជាអ្នកក្រទាំងថវិកា និងធនធានមិនចង់ឈ្នះចាញ់ជាមួយអ្នកណានោះទេ សុំត្រឹមតែយុត្តិធម៌ត្រឹមត្រូវទៅ គឺក្រុមគ្រួសារគាត់សុខចិត្តទៅហើយ។ ទោះជាយ៉ាងណា គាត់ក៏សូមថ្លែងអំណរគុណជាថ្មីម្ដងទៀតដែលបានស្រាវជ្រាវពីដំណើរដើមទងតាំងពីដើមរហូតដល់ចប់ រួចលើកយកសាច់រឿងពិតប្រាកដមកធ្វើការផ្សាយ ។
ហើយគាត់ក៏មិនមានពាក្យអ្វីនិយាយច្រើនដែរ ដោយយុវជនរងគ្រោះទាំងពីរនាក់ រួមទាំងឪពុក និងម្ដាយ បានលើកដៃសំពះថ្លែងអំណរគុណដល់ថ្នាក់ដឹកនាំខេត្តលោកស្នងការ ជាពិសេសស្រីព្រះរាជអាជ្ញាតែម្ដង ដែលបានអនុញ្ញាតិឱ្យត្រឡប់មកកាន់លំនៅដ្ឋានជួបជុំក្រុមគ្រួសារវិញ។
សូមរំលឹកថា បុរសពីរនាក់ត្រូវបានសមត្ថកិច្ចធ្វើការឃាត់ខ្លួន បន្ទាប់ពីមានទំនាស់ជាមួយមិត្តភក្កិលោកអធិការរងស្រុកសំរោងទងមួយរូប ដែលបុរសទាំងពីរត្រូវបានមិត្តភក្តិរបស់លោកអធិការរង ដែលចូលទៅវាយដល់ក្នុងផ្ទះតែម្ដង ។
បើតាមសាច់ញាតិបុរសទាំងពីរអះអាងថា វាជារឿងអយុត្តិធម៌បំផុត ព្រោះបុរសទាំងពីរត្រូវខ្សែ និងបក្សពួករបស់លោកអធិការរងចូលមកគេដល់ក្នុងផ្ទះ ហេតុអីក៏ចាប់តែបុរសទាំងពីរនាក់នេះ? ឯបក្សពួករបស់លោកអធិការរង បែរជាមិនចាប់ខ្លួនទៅវិញ ។
សកម្មភាពរបស់សមត្ថកិច្ចដែលបានអះអាងថា សុទ្ធតែជាបញ្ជារបស់ថ្នាក់លើធ្វើឱ្យប្រជាពលរដ្ឋក្នុងមូលដ្ឋានមានការថ្នាំងថ្នាក់ និងនិយាយពីមាត់មួយទៅមាត់មួយថា ធ្វើការលម្អៀងទៅរកបក្សពួករបស់ខ្លួនដែលមានខ្សែអាងជាសមត្ថកិច្ចនគរបាលស្រុក ជាពិសេសគឺលោកអធិការរងស្រុកសំរោងទងគោរពតែម្ដង ដែលជាមិត្តភក្កិជិតស្និទ្ធជាមួយនឹងក្រុមជនបង្ក។
ការឃាត់ខ្លួនបុរសទាំងពីរនាក់នេះធ្វើឡើងនាល្ងាចថ្ងៃទី3 ខែសីហាឆ្នាំ 2020 នៅចំណុចភូមិត្រពាំងខ្យង ឃុំរលាំងគ្រើល ស្រុកសំរោងទង ខេត្តកំពង់ស្ពឺ ។ បុរសទាំងពីរត្រូវបានស្គាល់ទី1- ឈ្មោះ ហ៊ល រុំ អាយុ៣៥ឆ្នាំ និងឈ្មោះ ហ៊ល រ៉ូ អាយុ៣១ឆ្នាំ អ្នកទាំង២រស់នៅកន្លែងកើតហេតុដែលឃាត់ខ្លួនខាងលើ។
យោងតាមប្រភពពីសាច់ញាតិបុរសទាំងពីរបានរៀបរាប់ឲ្យដឹងថា កាលពីយប់ថ្ងៃទី1 សីហា២០២០ កាលពីម៉ោង១០យប់ ឈ្មោះ ហ៊លរ៉ូ បានទាស់សំដីជាមួយឪពុកខ្លួនឈ្មោះសួង ឆែម អាយុ62ឆ្នាំ ដែលស្នាក់នៅផ្ទះជាមួយគ្នា ។ ពេលនោះឪពុកបានលើកដៃរកវាឈ្មោះហ៊លរ៉ូ (កូន) ស្រាប់តែឈ្មោះហ៊លរ៉ូ លើកដៃគ្រវាសកក៏ត្រូវឪពុករបស់ខ្លួនរកចង់ដួល តែត្រូវបានកូនចាប់ជាប់ហើយក៏ស្ងប់ស្ងាត់ទៅ។
សាច់ញាតិបន្តថា លុះមួយសន្ទុះក្រោយមក ក៏ស្រាប់តែគេឃើញឈ្មោះយ័ន្ត ភ័ក្រ ភេទប្រុស អាយុ40ឆ្នាំ នៅផ្ទះក្បែរគ្នា (ភាគីបង្ក) ជាមួយបក្សពួក២នាក់ទៀតក៏ចូលមកវាយឈ្មោះហ៊លរ៉ូ និងឈ្មោះរិន ជាប្អូនដល់ក្នុងផ្ទះតែម្ដង បណ្ដាលឱ្យមានរបួសជាទម្ងន់។ បក្សពួករបស់ យ័ន្តភក្ត្រ ដែលព្រួតគ្នាចូលមកវាយភាគី ហ៊លរ៉ូ និងហ៊លរិន រហូតដល់ក្នុងផ្ទះនោះត្រូវបានស្គាល់ ទី1-ឈ្មោះ សេត រុំ អាយុ38ឆ្នាំ រស់នៅភូមិចំការបុស្ស ឃុំរលាំងគ្រើល ស្រុកសំរោងទង និងម្នាក់ទៀតមានឈ្មោះតាត់ គឹមឈិន ភេទប្រុស អាយុ35ឆ្នាំ រស់នៅភូមិស្រូល ឃុំរលាំងគ្រើល ស្រុកសំរោងទង ។
ប្រភពដដែលបន្តថា ក្រោយពីចូលមកវាយគេដល់ក្នុងផ្ទះហើយនោះ ទាំងសងខាងមានរបួសដូចគ្នា ពេលនោះស្រាប់តែភាគីរបស់ យ័ន្តភ័ក្ត្រ និងសេតរុំ ព្រមតាត់ គឹមឈិន ដែលគេដឹងថា គឺជាមិត្តភក្តិជិតសិទ្ធិជាមួយអធិការរងនគរបាលស្រុកសំរោងទងមួយរូបបានតេទូរស័ព្ទហៅលោកអធិការរងរូបនោះឲ្យមកជួយអន្តរាគមន៍។
ដូចអ្វីដែលមើលឃើញមែន គឺប្រជាពលរដ្ឋនៅភូមិកើតហេតុដែលដឹងរឿងនឹងបានឃើញហេតុការណ៍នោះបាននិយាយប្រាប់ថា ពេលដែលលោកអធិការរងរូបនោះមកដល់បានដោះអាវ ហើយស្រែកឡូឡាហៅឈ្មោះហ៊ល រ៉ូ និងហ៊លរិន ឲ្យចេញមកក្រៅផ្ទះវាយជាមួយខ្លួនទៀតផង ។ អធិការរងនគរបាលស្រុកសំរោងទងរូបនោះត្រូវបានស្គាល់ថា មានឈ្មោះ ប៉ែន ចំរើន ជាអធិការរងទទួលបន្ទុកព្រហ្មទណ្ឌទៀតផង។
អ្នកដែលឃើញហេតុការណ៍នោះបាននិយាយលាន់មាត់ថា ខ្លួនគឺជាសមត្ថកិច្ចដែលមានតួនាទីបុណ្យសក្តិ និងទទួលផ្នែកព្រហ្មទណ្ឌ មិនគួរណាបញ្ចេញចរិតកាន់ជើងមិត្តភក្កិខ្លួនដែលចូលទៅវាយគេដល់ក្នុងផ្ទះបែបនេះនោះទេ។ បើទោះជាមានការអន្ទងមកវាយគ្នាពីសំណាក់លោកអធិការងទទួលបន្ទុកព្រហ្មទណ្ឌ ប៉ែនចំរើន រូបនេះក្តី ក៏ភាគីរងគ្រោះ (ហ៊លរ៉ូ និងហ៊លរិន) មិនបានចេញមកតាមការអន្ទងរបស់លោកអធិការងរូបនេះដែរ។
តាមប្រភពបានបន្តទៀតថា លុះព្រឹកឡើងថ្ងៃទី2 សីហា ភាគីរងគ្រោះរវល់តែទៅពេទ្យមិនបានទៅដាក់ពាក្យបណ្ដឹងនោះទេ ស្រាប់តែភាគី យ័ន្ត ភ័ក្ត្រ, សេតរុំ និងតាត់ គឹមឈិនដែលជាភាគីបង្កចូលមកវាយគេដល់ក្នុងផ្ទះ បែរជាទៅដាក់ពាក្យបណ្ដឹង ដោយអាងអំណាចមិត្តភក្តិខ្លួនជាអធិការរងនគរបាលស្រុកសំរោងទងតែម្ដង ទើបគេហ៊ានប្ដឹងបែបនេះ។
បើតាមប្រភពពីមន្ត្រីនគរបាលស្រុកបានឲ្យដឹងថា ករណីនេះ បើទោះជា យ័ន្ត ភ័ក្ត្រ, សេតរុំ និងតាត់ គឹមឈិន ចូលទៅវាយគេដល់ក្នុងផ្ទះបែបនេះក្តី សមត្ថកិច្ចបានត្រឹមធ្វើរបាយការណ៍ និងរាយការណ៍ទៅថ្នាក់លើថា ជារឿងវាយគ្នាទៅវិញទៅមក។ តែនេះដោយសំអាងថា ភាគីបង្កគឺជាមិត្តភក្កិជិតស្និទ្ធជាមួយលោកអធិការរងនគរបាលស្រុកព្រហ្មទណ្ឌបែបនេះ គេក៏ចេះតែរុញបន្ដឹងទៅលើរហូតដល់មានស្នងការរងមួយរូបក៏ចេញមុខជួយអន្តរាគមន៍ភាគីបង្កទៀតផង។
នៅពេលដែលភាគីបង្កមានខ្នងបង្អែកជាអធិការរង និងស្នងការរងបែបនេះហើយ ទើបភាគីរងគ្រោះត្រូវបានឃាត់ខ្លួនកសាងសំណុំរឿងបញ្ជូនទៅថ្នាក់លើចាត់ការតាមនីតិវិធីច្បាប់ដោយថ្នាក់ក្រោមមិនហ៊ានប្រកែកតវ៉ាជាមួយនឹងបញ្ជារបស់ថ្នាក់លើបានឡើយ។
ចែករំលែកព័តមាននេះ