ចុះណែនាំដល់មន្ត្រីពន្ធនាគារទាំងអស់ សូមកុំភ្លេចកូវីដ១៩
- មណ្ឌលគិរី
ខេត្តមណ្ឌលគិរី ៖ ខណៈជំងឺកូវីដ១៩ដ៏កាចសាហាវ កំពុងរាតត្បាតពាសពេញសាកលលោក ហើយនៅកម្ពុជាក៏មានការនាំចូលដែរនោះ រសៀលថ្ងៃទី០៧ សីហា លោក ញ៉ន…
ខេត្តមណ្ឌលគិរី ៖ ខណៈជំងឺកូវីដ១៩ដ៏កាចសាហាវ កំពុងរាតត្បាតពាសពេញសាកលលោក ហើយនៅកម្ពុជាក៏មានការនាំចូលដែរនោះ រសៀលថ្ងៃទី០៧ សីហា លោក ញ៉ន…
ខេត្តមណ្ឌលគិរី ៖ ខណៈជំងឺកូវីដ១៩ដ៏កាចសាហាវ កំពុងរាតត្បាតពាសពេញសាកលលោក ហើយនៅកម្ពុជាក៏មានការនាំចូលដែរនោះ រសៀលថ្ងៃទី០៧ សីហា លោក ញ៉ន សិទ្ធ អភិបាលខេត្តស្តីទីបានណែនាំដល់មន្ត្រីពន្ធនាគារទាំងអស់ សូមកុំភ្លេចកូវីដ១៩ ព្រោះកូវីដ១៩នេះ មិនអាចភ្លេចយើងបាននោះទេ ។
អភិបាលខេត្តស្តីទី លោក ញ៉ន សិទ្ធ បានថ្លែងនូវការកោតសរសើរដល់ថ្នាក់ដឹកនាំ និងមន្ត្រីពន្ធនាគារខេត្តទាំងអស់ ដែលបានខិតខំយកចិត្តទុកដាក់សហការគ្នា ក្នុងការអនុវត្តតួនាទីភារកិច្ច និងការទទួលខុសត្រូវការងាររបស់ខ្លួនបានល្អប្រសើរនាពេលកន្លងមក។ លោក ញ៉ន សិទ្ធ បានបញ្ជាក់ថា បច្ចុប្បន្ននេះ ជំងឺកូវីដ១៩ កំពុងរាតត្បាតពាសពេញសកលលោក ដែលធ្វើឱ្យប្រទេសកម្ពុជាមានបញ្ហាប្រឈមផងដែរ ដូច្នេះ ក៏សូមមន្ត្រីនៃពន្ធនាគារខេត្តទាំងអស់ ត្រូវរួមគ្នាអនុវត្តតាមការណែនាំរបស់រាជរដ្ឋាភិបាលកម្ពុជា ក៏ដូចជាក្រសួងសុខាភិបាល ក្នុងការទប់ស្កាត់ ការឆ្លងរីករាលដាលនៃជំងឺកូវីដ១៩ រលកទី២។
លោក ញ៉ន សិទ្ធ បានណែនាំដល់ថ្នាក់ដឹកនាំ និងមន្ត្រីពន្ធនាគារខេត្តមណ្ឌលគិរី ត្រូវបន្តយកចិត្តទុកដាក់អនុវត្តការងារស្របតាមគោលការណ៍ច្បាប់ និងនីតិវិធីដែលបានកំណត់ ត្រូវលើកកម្ពស់សមត្ថភាព តាមរយៈរៀនសូត្រដោយខ្លួនឯង ចែករំលែកចំណេះដឹង និងបទពិសោធន៍ពីគ្នាទៅវិញទៅមក ត្រូវបំពេញការងារប្រកបដោយចក្ខុវិស័យ មានផែនការការងារច្បាស់លាស់ រៀបចំកិច្ចការងារប្រចាំថ្ងៃឲ្យក្លាយជាការងារចរន្ត មានគណនេយ្យភាពចំពោះមុខងារតួនាទីភារកិច្ចរបស់ខ្លួន ជាពិសេស ត្រូវរក្សាសាមគ្កីភាពផ្ទៃក្នុងឱ្យបានល្អ។
តាមរបាយការណ៍របស់លោកឧត្តមសេនីយ៍ទោ អាន គីមឡេង ប្រធានពន្ធនាគារខេត្ត បានឱ្យដឹងថា ជនជាប់ឃុំកំពុងឃុំក្នុងពន្ធនាគារខេត្តសរុបចំនួន ១៨៣នាក់ ស្ត្រី ៧នាក់ អនីតិជនចំនួន ០២នាក់ បរទេសចំនួន ០៧នាក់ ក្នុងនោះ – ជនត្រូវចោទចំនួន ៣៧នាក់ ស្ត្រី ២នាក់ ជនបរទេស ០១នាក់ – ជនជាប់ចោទចំនួន ៣០នាក់ ស្ត្រី ២នាក់ – ពិរុទ្ធជនចំនួន ៦១នាក់ ស្ត្រី ១នាក់ – ទណ្ឌិតចំនួន ៥៥នាក់ ស្រី ២នាក់ ជនបរទេសចំនួន ៨នាក់។
លោក ញ៉ន សិទ្ធ អភិបាលខេត្តស្តីទី បានចុះពិនិត្យអគារ និងរបងពន្ធនាគារដែលកំពុងសាង់សង់ ថែមទាំង បានចុះសួរសុខទុក្ខដល់ជនជាប់ឃុំកំពុងឃុំក្នុងពន្ធនាគារខេត្ត និងបានលើកទឹកចិត្តដល់ជនជាប់ឃុំទាំងអស់ ត្រូវខិតខំធ្វើយ៉ាងណា កែប្រែខ្លួនធ្វើជាមនុស្ស ដើម្បីខ្លួនឯង គ្រួសារ និងសង្គមជាតិ ជាពិសេស ត្រូវចូលរួមបង្ការ ទប់ស្កាត់ ការឆ្លងរីករាលដាលនៃជំងឺកូវីដ-១៩៕
ចែករំលែកព័តមាននេះ