ខេត្តកំពង់ចាម ៖ តូបលក់ទូរស័ព្ទដៃមួយកន្លែងនៅផ្លូវច្រកចូលផ្សារធំកំពង់ចាម ក្នុងសង្កាត់កំពង់ចាម ក្រុងកំពង់ចាម ត្រូវក្រុមជនសង្ស័យលួចកាត់សោទ្វារដែកគាស់ចូលលួចទូរស័ព្ទដៃជាច្រើនប្រភេទអស់ចំនួនជាង១០០គ្រឿង កាលពីវេលាម៉ោង១២និង១៥នាទីយប់រំលងអធ្រាត្រឈានចូលថ្ងៃទី៦ សីហា ឆ្នាំ២០២០ ខណៈកម្លាំងសមត្ថកិច្ចកំពុងតែតាមប្រមាញ់ក្រុមជនសង្ស័យទាំងនោះហើយ។
តាមប្រភពពីសមត្ថកិច្ចមូលដ្ឋានបានប្រាប់ឲ្យដឹងថា តូបលក់ទូរស័ព្ទមួយកន្លែងដែលត្រូវក្រុមជនសង្ស័យធ្វើសកម្មភាពគាស់ចូលលួចទូរស័ព្ទខាងលើនេះយីហោ ជា សុផល ស្ថិតក្នុងភូមិទី១២ សង្កាត់កំពង់ចាម មានម្ចាស់ឈ្មោះរិន សុកខី ភេទស្រី អាយុ៣៣ឆ្នាំ នៅភូមិទី១ សង្កាត់វាលវង់ ក្រុងកំពង់ចាម ខេត្តកំពង់ចាម ។
សមត្ថកិច្ចមូលដ្ឋានប្រាប់បន្តថា នៅពេលម្ចាស់តូបចេញពីផ្ទះមកដល់តូបរបស់ខ្លួននាព្រឹកថ្ងៃទី៦ សីហា នោះ ស្រាប់តែឃើញទ្វាររបើកសោរ និងបាត់ទូរស័ព្ទនៅក្នុងទូ ក៏ប្រញាប់រាយការណ៍មកសមត្ថកិច្ចជាបន្ទាន់ ដើម្បីឱ្យចុះមកពិនិត្យ ។
តាមប្រភពដដែលបានបន្តថា ក្រោយពីទទួលបានព័ត៌មានខាងលើនោះភ្លាម លោកអធិការនគរបាលក្រុងកំពង់ចាម បានចាត់ឲ្យកម្លាំងជំនាញព្រហ្មទណ្ឌសហការជាមួយកម្លជំនាញបច្ចេកទេសវិទ្យាសាស្ត្រនៃស្នងការដ្ឋាននគរបាលខេត្ត ចុះធ្វើការត្រួតពិនិត្យកន្លែងកើតហេតុ ឃើញស្នាមគាស់ទ្វារតូបជ្រុងខាងកើត ជាមួយនោះក៏មានសម្ភារៈបាត់បង់រួមមាន ទូរស័ព្ទជាច្រើនប្រភេទអស់ចំនួន១១០គ្រឿង ។
តាមប្រភពពីស្ត្រីជាម្ចាស់តូបបានបញ្ជាក់ថា គាត់បានលក់ទូរស័ព្ទដៃនៅតូបខាងលើនេះចាប់តាំងពីឆ្នាំ២០០៨ រហូតមកដល់២០២០ ជារៀងរាល់ថ្ងៃ ទូរស័ព្ទជាច្រើនប្រភេទនៅក្នុងតូប គាត់បានចាក់សោទ្វារដែករ៉ូតយ៉ាងត្រឹមត្រូវមិនដែលបាត់ម្ដងណាទេ។ លុះនៅព្រឹកថ្ងៃកើតហេតុ ពេលគាត់មកដល់តូបស្រាប់តែឃើញស្នាមគាស់ និងកាត់សោហើយទ្វារតូបត្រូវរបើក លុះពេលចូលមើលក្នុងតូបឃើញបាត់ទូរស័ព្ទ ទើបរាយការណ៍ជូនសមត្ថកិច្ចឱ្យចុះមកពិនិត្យតែម្តង ។
តាមប្រភពដដែលបានបន្តថា ជាមួយនោះ គាត់សំណូមពរដល់សមត្ថកិច្ចគ្រប់លំដាប់ថ្នាក់ ជួយស្រាវជ្រាវតាមវែកមុខចោរលួចទូរស័ព្ទដៃរបស់គាត់ឱ្យឃើញ និងប្រគល់ទូរស័ព្ទដែលបាត់បង់ត្រឡប់មកឱ្យគាត់វិញ ។
ម្ចាស់តូបមានជំនឿមុតមាំលើសមត្ថកិច្ចថា មិនយូរប៉ុន្មាននោះទេ អាចនឹងស្រាវជ្រាវរកឃើញក្រុមជនសង្ស័យគាស់តូបរបស់គាត់ជាក់ជាមិនខានឡើយ៕ (កែសម្រួលដោយ ៖ ធីតា)
ចែករំលែកព័តមាននេះ