រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានមានប្រសាសន៍ថា សម្តេចមានថ្ងៃកំណើតដល់ទៅ២ ខណៈធ្វើជារដ្ឋមន្ត្រីតាំងពីអាយុជាង២០ ឆ្នាំ ។ នៅថ្ងៃទី៥សីហា ឆ្នាំ២០២០ គឺជាខួបឈានចូល៦៩ឆ្នាំ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានថ្លែងអំណរគុណចំពោះមន្ដ្រីរាជការ និងជនរួមជាតិទាំងអស់ ដែលបានជូនពរសម្ដេចក្នុងថ្ងៃកំណើតគម្រប់៦៨ ឈានចូល៦៩ឆ្នាំ ។
យោងតាមគេហទំព័រហ្វេសប៊ុករបស់សម្ដេចតេជោ ហ៊ុន សែន កាលពីថ្ងៃទី៤ ខែសីហា ឆ្នាំ២០២០ បានសរសេរថា «ថ្ងៃ៥ ខែសីហា ២០២០ ជាខួបកំណើតគម្រប់៦៨ឈានចូល ៦៩ឆ្នាំ របស់ខ្ញុំ (៥សីហា ១៩៥២-៥សីហា២០២០) ។
សូមអរគុណបងប្អូនដែលបានជូនពរខ្ញុំ ទោះបីខុសឆ្នាំក៏ដោយព្រោះ ខ្ញុំមានថ្ងៃកំណើតដល់ទៅពីរ» ។ សម្ដេចតេជោ ពន្យល់ថា ចំពោះថ្ងៃកំណើតរបស់សម្ដេចដល់ទៅពីរ រួមមាន៖ ទី១-ថ្ងៃ៤ មេសា ១៩៥១ ដែលសម្ដេចបានបកស្រាយម្តងរួចហើយ គឺថ្ងៃ៤ មេសា យកថ្ងៃចូលបម្រើកងទ័ពតាមការអំពាវនាវ របស់សម្តេចឪ សម្តេចព្រះនរោត្តមសីហនុ ឆ្នាំ១៩៧០។ រីឯឆ្នាំ១៩៥១ ដោយអ្នកវាយអង្គលីលេខវាយច្រឡំ និងយកទៅផ្សាយល្ងាចថ្ងៃ៨ មករា ១៩៧៩ ក្រោយពេលសម្ដេចត្រូវបាន ជ្រើសតាំងជារដ្ឋមន្ត្រីការបរទេស ។
សម្ដេចតេជោ បន្ដថា ពេលនោះសម្ដេចមិនបានកែតម្រូវទេ ព្រោះចង់ឲ្យខ្លួនមានអាយុច្រើនបន្តិចដោយ សារកាន់តំណែងជារដ្ឋមន្ត្រីការបរទេសអាយុមិនទាន់គ្រប់២៧ឆ្នាំផង ។ ទី២-ថ្ងៃកំណើតពិតប្រាកដរបស់សម្ដេច គឺថ្ងៃ ៥ សីហា ១៩៥២ ត្រូវនឹងថ្ងៃអង្គារ ១៥កើត ខែស្រាពណ៌ ឆ្នាំរោង ចត្វាស័ក ព.ស ២៤៩៦ ។ សម្ដេចថា ទោះជូនពរ៦៩ឆ្នាំ ឬ៧០ឆ្នាំ គឺទទួលបាន ទាំងអស់ និងសូមអរគុណសម្រាប់ការស្រឡាញ់រាប់អាន ។ សម្ដេចតេជោ ហ៊ុន សែន បានឲ្យដឹងថា ការបញ្ជាក់របស់សម្ដេចខាងលើសំដៅបញ្ជាក់ តើថ្ងៃកំណើតពិតប្រាកដមួយណា?
សូមជូនពរជនរួមជាតិជួបតែសេចក្តីសុខសេចក្តីចម្រើន ។ សូមជម្រាបថា ជូនរបស់សម្តេចតេជោ បន្ទាប់ពីមន្ត្រីរាជការបានជូនពរសម្តេច ក្នុងនោះក៏មានមូលនិធិខ្មែរចំណាកស្រុកសម្តេចតេជោផងដែរ ដោយមូលនិធិបានសរសេរជូនពរយ៉ាងដូច្នេះថា«សម្តេចអគ្គមហាសេនាបតីតេជោ ហ៊ុន សែន ជាទីគោរពដ៏ខ្ពង់ខ្ពស់បំផុត ! ក្នុងឱកាសខួបកំណើតគម្រប់ ៦៨ ឈានចូល ៦៩ ដែលនឹងចូលមកដល់នៅថ្ងៃទី៥ ខែសីហា ឆ្នាំ២០២០ ខាងមុខនេះ យើងខ្ញុំទាំងអស់គ្នាជាថ្នាក់ដឹកនាំ សមាជិក សមាជិកានៃ មូលនិធិខ្មែរចំណាកស្រុកសម្តេចតេជោ សែន សូមឧទ្ទិសបួងសួងដល់គុណព្រះរតនត្រ័យ ទេវតាឆ្នាំថ្មី សូមតាមជួយបីបាច់ថែរក្សា និងប្រោះព្រំសព្វសាធុការពរ បវរសួស្តី សិរីមង្គល វិបុលសុខគ្រប់ប្រការ ជូនចំពោះ សម្តេចតេជោនាយករដ្ឋមន្ត្រី សូមបានសមប្រកបនូវសុខភាពល្អបរិបូរណ៌ កាយពលរឹងមាំ បញ្ញាញាណភ្លឺថ្លា ជន្មាយុយឺនយូរ ដើម្បីបន្តដឹកនាំកម្ពុជាឆ្ពោះទៅរកសុខសន្តិភាព ស្ថិរភាព វិបុលភាព និងការអភិវឌ្ឍលើគ្រប់វិស័យ ព្រមទាំងទទួលបានជោគជ័យថ្មីៗបន្ថែមទៀត។
លិខិតសូម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មេត្តាទទួលនូវគារវកិច្ចដ៏ខ្ពង់ខ្ពស់ និងស្មោះត្រង់បំផុតអំពីយើងខ្ញុំទាំងអស់គ្នា ៕
ចែករំលែកព័តមាននេះ