សំឡេងផ្ទុះឆេះដ៏ខ្លាំង២ ឆក់យកជីវិតមនុស្ស៧៣នាក់ របួសជាង៣.៧០០នាក់(វីដេអូ)
ប្រទេសលីបង់ ៖ ការផ្ទុះឆេះដ៏ខ្លាំង២ ត្រូវបានលាន់ឮ កាលពីថ្ងៃទី៤ ខែសីហា ឆ្នាំ ២០២០ នៅក្រុងបេរូត រដ្ឋធានីលីបង់។…
ប្រទេសលីបង់ ៖ ការផ្ទុះឆេះដ៏ខ្លាំង២ ត្រូវបានលាន់ឮ កាលពីថ្ងៃទី៤ ខែសីហា ឆ្នាំ ២០២០ នៅក្រុងបេរូត រដ្ឋធានីលីបង់។…
ប្រទេសលីបង់ ៖ ការផ្ទុះឆេះដ៏ខ្លាំង២ ត្រូវបានលាន់ឮ កាលពីថ្ងៃទី៤ ខែសីហា ឆ្នាំ ២០២០ នៅក្រុងបេរូត រដ្ឋធានីលីបង់។ តាមការវាយតម្លៃដំបូងថា ការផ្ទុះឆេះដ៏សាហាវ២ ដែលមិនទាន់ដឹងពីមូលហេតុច្បាស់ក្នុងពេលភ្លាមៗ ត្រូវបានស្ដាប់ឮក្នុងផ្នែកជាច្រើននៃក្រុងបេរូត។ វាកើតមានក្នុងតំបន់កំពង់ផែ ហើយបណ្ដាលឲ្យមនុស្សបាត់បង់ជីវិតយ៉ាងតិច៧៣នាក់ និងរបួសជាង៣.៧០០នាក់។
បណ្ដារូបភាពវីដេអូ និងរូបភាពបង្ហោះតាមបណ្ដាញសង្គម បង្ហាញពីភ្លើងកំពុងឆេះ និងផ្សែងខ្មួលខ្មាញ់ហុយទៅលើអាកាស ព្រមទាំងការបំផ្លាញដ៏ធំធេង។ បណ្ដាសារព័ត៌មានក្នុងស្រុកបានផ្សាយរូបភាពនានា នៃមនុស្សច្រើននាក់ជាប់ក្រោមគំនរបាក់បែក ហើយមនុស្សមួយចំនួនរងរបួសឈាមហូរដាបខ្លួន។ ប្រជាជនច្រើននាក់ដែលរងរបួស បាននាំគ្នាដើរតាមដងវិថីនានាឆ្ពោះទៅកាន់មន្ទីរពេទ្យ។
ប្រធានាធិបតីលីបង់លោក MICHEL AOUN នាយប់ថ្ងៃទី៤ ខែសីហា បានកោះកិច្ចប្រជុំបន្ទាន់មួយ របស់ក្រុមប្រឹក្សាការពារជាន់ខ្ពស់។ ចំណែកនាយករដ្ឋមន្ត្រីលោក HASSAN DIAB បានប្រកាសទិវាកាន់ទុក្ខជាតិមួយនាថ្ងៃទី៥ សីហា។
រដ្ឋមន្ត្រីសុខាភិបាលលីបង់លោកហាម៉ាដហាសាន់ អះអាងថា នោះជាគ្រោះមហន្តរាយដ៏សែនទារុណមួយ។ បណ្ដាសាកសពឃើញរាយប៉ាយនៅលីដី បណ្ដារថយន្តត្រូវភ្លើងឆេះ និងឃ្លាំងនានារងការបំផ្លាញអស់គ្មានសល់។ នៅកំពង់ផែក្រុងបេរូត គេស្ដាប់ឮការផ្ទុះដ៏ខ្លាំង២នាថ្ងៃទី៤សីហា បណ្ដាលឲ្យមានការបំផ្លាញធំធេង និងនាំឲ្យមានការជ្រួលច្របល់នៅក្នុងរដ្ឋធានី។
អ្នកទទួលខុសត្រូវជាន់ខ្ពស់ខាងផ្នែកសន្តិសុខលីបង់ម្នាក់និយាយថា ការផ្ទុះដ៏ខ្លាំងអាចបណ្ដាលមកពីបណ្ដាវត្ថុធាតុផ្ទុះ ដែលចាប់រិបអូសយកបានហើយយកទៅស្តុកទុកក្នុងឃ្លាំងមួយ ចាប់តាំងពីច្រើនឆ្នាំមកហើយ។
លោកអាប់បាស់ុអ៊ីប្រាហ៊ីមអគ្គនាយកផ្នែកសន្តិសុខដែលទៅកាន់កន្លែងផ្ទុះឆេះថ្លែងទៅកាន់ទូរទស្សន៍ថា ការផ្ទុះហាក់ដូចជាបណ្ដាលមកពីបណ្ដាវត្ថុធាតុផ្ទុះដែលចាប់រិបអូសយកបានតាំងពីច្រើនឆ្នាំមកហើយ និងយកទៅស្តុកទុក ក្នុងឃ្លាំងមួយនៃកំពង់ផែនោះ។ ប៉ូលិសកំពុងធ្វើការស៊ើបអង្កេតរកប្រភពពិតនៃការផ្ទុះឆេះទាំងនេះ។
តាមពិតទៅគ្រឿងផ្ទុះនីត្រាតអាម៉ូនីញ៉ូម ដល់ទៅប្រមាណជា២.៧៥០តោនត្រូវ បានស្តុកទុកក្នុងឃ្លាំងមួយនៃកំពង់ផែ។ នាយករដ្ឋមន្ត្រីលីបង់ថ្លែងថា វាជារឿងមិនអាចទទួលយកបាន ដែលគ្រឿងផ្ទុះនីត្រាតអាម៉ូនីញ៉ូមដល់ទៅ២.៧៥០តោនយកទៅស្តុកទុក ចាប់តាំងពី៦ឆ្នាំមកហើយក្នុងឃ្លាំងមួយ ដោយគ្មានវិធានការប្រុងប្រយ័ត្ន៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ