ខេត្តរតនគិរី ៖ កម្មករចម្ការចេកក្រុមហ៊ុនហ័ងអាញម៉ាងយ៉ាង បានរាយការណ៍មកថា ពួកគេបានរកឃើញសពម្នាក់ទៀតហើយនៅថ្ងៃទី២៦ ខែកក្កដា បន្ទាប់ពីមានករណីសង្ស័យជាអំពើឃាតកម្មមួយកើតឡើង និងបង្កការភ្ញាក់ផ្អើល ដោយកម្មករបានប្រទះឃើញសពនៅក្នុងព្រៃចម្ការចេកក្រុមហ៊ុន កាលពីរសៀលថ្ងៃទី២៣ ខែកក្កដា ឆ្នាំ២០២០កន្លងមក ក្នុងឃុំស្រែអង្គ្រង ស្រុកកូនមុំ ។
សពម្នាក់ទៀតដែលបានប្រទះឃើញ៣ថ្ងៃក្រោយមកនៅក្នុងក្រុមហ៊ុនខាងលើនេះ គឺកាលពីវេលាម៉ោងប្រមាណ៧និង៣០នាទីព្រឹកថ្ងៃទី២៦ ខែកក្កដា ឆ្នាំ២០២០ ហើយនគរបាលស្រុកកូនមុំ និងមន្ត្រីជំនាញនៃស្នងការដ្ឋានខេត្តបានទៅត្រួតពិនិត្យនិងធ្វើកោសល្យវិច័យ ។ ក្រោយពីធ្វើកោសល្យវិច័យទើបដឹងថា សពកម្មករដែលប្រទះឃើញថ្ងៃនេះគឺឈ្មោះ បាក់ ណាន ភេទប្រុស អាយុ២៤ឆ្នាំ បានបាត់ខ្លួនកាលពីយប់ថ្ងៃទី២៣ ខែកក្កដាជាមួយគ្នា ក្នុងហេតុការណ៍តែមួយដែលពួកគេបានទៅឆ្លុះកង្កែប ហើយឃាតករបានរត់គេចខ្លួនបាត់ បន្ទាប់ពីធ្វើសកម្មភាព ។
សពម្នាក់ទៀតឈ្មោះ បាក់ ណាន នេះត្រូវបានកម្មករប្រទះឃើញនៅក្នុងព្រៃស្បូវខាងលិចផ្លូវចម្ការចេក ចម្ងាយពីកន្លែងប្រទះសពឈ្មោះ គឹម សារឿន ប្រហែល៣០០ម៉ែត្រ ហ៊ុមព័ទ្ធដោយព្រៃឫស្សីព្រេច និងស្បូវក្រាស់ៗ ។ក្រោយពីពិនិត្យនិងធ្វើកោសល្យវិច័យរួច សមត្ថកិច្ចនិយាយថា គេឃើញសពដេកផ្ងារ ជើងទាំងពីរបញ្ឈរជង្គង់ ដៃទាំងពីរបត់រាងជាអក្សរអិល(L) ។ បើតាមការពិនិត្យទៅលើស្ថានភាពរបស់សព គឺមន្ត្រីជំនាញសន្និដ្ឋានថា ជនរងគ្រោះត្រូវឃាតករសម្លាប់នៅកន្លែងផ្សេងហើយអូសយកសពមកទម្លាក់ចោលនៅក្នុងព្រៃស្បូវនេះតែម្ដង ។
សពមានសភាពហើមរលួយ ដង្កូវចោះមុខពិបាកសម្គាល់ស្លាកស្នាម នៅត្រង់បំពង់កមានស្នាមចាក់មួយកន្លែង នៅជុំវិញរង្វង់កមានស្នាមអាររយះសាច់ដាច់បំពង់ខ្យល់ នៅត្រង់ប្រអប់ដៃស្ដាំមានស្នាមរបួសរយះសាច់មួយកន្លែង ។ ផ្នែកខាងក្រោយនៅត្រង់ចុងស្លាបប្រចៀវឆ្វេងមានស្នាមចាក់មួយកន្លែង នៅត្រង់កំភួនជើងផ្នែកខាងក្រោយមានស្នាមរបួសរយះសាច់ទំហំ៥សង្ទីម៉ែត្រមួយកន្លែងទៀត ។
ក្រុមមន្ត្រីជំនាញបានបញ្ជាក់ថា រហូតមកដល់បច្ចុប្បន្នពុំទាន់រកឃើញអត្តសញ្ញាណឃាតករនៅឡើយទេ ។ បន្ទាប់ពីធ្វើការពិនិត្យរួចរាល់ នគរបាលស្រុកក៏បានប្រគល់សពឱ្យក្រុមគ្រួសារ សាច់ញាតិយកទៅចាត់ចែងធ្វើបុណ្យតាមប្រពៃណី ។ ចំណែកនគរបាលស្រុកកូនមុំ កំពុងធ្វើការស្រាវជ្រាវរកជនដៃដល់ ដើម្បីចាប់ឃាត់ខ្លួនយកមកផ្តន្ទាទោសតាមច្បាប់ ៕
ចែករំលែកព័តមាននេះ