សហរដ្ឋអាមេរិក-អាល្លឺម៉ង់ ៖ ប្រមុខមន្ទីរប៉ង់តាហ្គោនលោក MARK ESPER ប្រកាសនាថ្ងៃទី២៩ កក្កដា ពីការដកកងទាហានអាមេរិក ប្រមាណជា១២.០០០នាក់ចេញពីអាល្លឺម៉ង់ដោយហៅគម្រោងនោះថា ជាការចាំបាច់ខាងយុទ្ធសាស្ត្រ ខណៈលោកដូណាល់ត្រាំអះអាងថា ត្រៀមរក្សាទុកទាហានទាំងនោះវិញ ប្រសិនបើអាល្លឺម៉ង់បង់ប្រាក់កាន់តែច្រើនថែមទៀតដល់អូតង់ ។
ក្នុងសន្និសីទសារព័ត៌មានមួយរដ្ឋមន្ត្រីការពារប្រទេសអាមេរិករូបនោះគូសបញ្ជាក់ថា ទាហាន
អាមេរិកប្រមាណជា៣៤.៥០០នាក់បច្ចុប្បន្នដាក់ពង្រាយនៅអាល្លឺម៉ង់ ក្នុងនោះប្រមាណជា៦.
៤០០នាក់ នឹងត្រូវធ្វើមាតុភូមិនិវត្តន៍ទៅកាន់សហរដ្ឋអាមេរិកវិញ ចំណែកទាហានប្រមាណជា៥.៦០០នាក់ទៀតនឹងត្រូវដាក់ពង្រាយជាថ្មី ក្នុងប្រទេសដទៃៗទៀតជាសមាជិកអូតង់ ពិសេសនៅបែលហ្ស៊ិក និងអ៊ីតាលី ។
លោក MARK ESPER អះអាងទៀតថា ទិសដៅនោះគឺជាយុទ្ធសាស្ត្រពិសេស ដើម្បីធានាភាពជឿជាក់ក្នុងការប្រឈមមុខជាមួយរុស្ស៊ី ។ តែប៉ុន្មាននាទីប៉ុណ្ណោះក្រោយសន្និសីទសារព័ត៌មាននេះរបស់លោក នៅមន្ទីរប៉ង់តាហ្គោន លោកដូណាល់ ត្រាំ ពន្យល់ថា ការដកទ័ពនេះជាការសម្រេចដ៏តឹងតែងមួយ ព្រោះតែអាលឺ្លម៉ង់បដិសេធមិនព្រមចំណាយប្រាក់ថែមច្រើនទៀត ។
លោកថាងាយយល់បំផុតការដកទ័ពនោះចេញពីអាល្លឺម៉ង់ ក៏ព្រោះតែប្រទេសនេះមិនព្រមបង់ប្រាក់ថែម ។ លោកថាផែនការនោះអាចសើរើឡើងវិញ ។ ប្រសិនបើអាល្លឺម៉ងចាប់ផ្ដើមបង់ប្រាក់ថែមនោះខ្ញុំនឹងពិចារណាឡើងវិញ ។
ចំពោះការប្រកាសនោះក្នុងសេចក្ដីប្រកាសរួមមួយ ក្រសួងការពារប្រទេសនិងក្រសួងការបរទេសអាល្លម៉ង់គូសបញ្ជាក់ថា រដ្ឋាភិបាលសហព័ន្ធបានដឹងពីការសម្រេចនោះ ហើយនឹងរួមសហការជិតដិតក្នុងការអនុវត្តជាមួយបណ្ដារដ្ឋក្នុងតំបន់រដ្ឋាភិបាលអាមេរិកនិងក្នុងផ្ទៃអូតង់ ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ