ពេល​កូ​វី​ដ​១៩ អាច​ជា​ឱកាសល្អ​សម្រាប់​ការ​ជួញដូរ​ផ្សារ​ហ៊ុន


រាជធានី​ភ្នំពេញ ៖ ការ​ជួញដូរ​ផ្សារ​ហ៊ុន​នៅ​ក្នុង​ប្រទេស​កម្ពុជា​បាន​ដំណើរ​ជា​ធម្មតា ទោះបីជា​នៅ​ក្នុង​ពេល​ជំងឺ​កូ​វី​ដ​១៩ នេះ​ក្តី ។ ក្រុមហ៊ុន​ដែល​បាន​លក់​ហ៊ុន​លើ​ផ្សា​រមូល​ប​ត្រ​កម្ពុជា​ថា តម្លៃ​ហ៊ុន​របស់​គេ​បាន​ឡើងជា​បន្តបន្ទាប់ ទោះជា​មាន​ជំងឺ​កូ​វី​ដ​១៩​ក្តី ។

ការ​ឡើងថ្លៃ​ហ៊ុន ជា​ការ​បង្ហាញ​ពី​ជំនឿ​ទុកចិត្ត​របស់​អ្នក​វិ​និ​យោ​គិត ឬ​អ្នកលេង​ហ៊ុន ចំពោះ​ផ្សា​រមូល​ប​ត្រ​កម្ពុជា ។ គណៈកម្មការ​មូល​ប​ត្រ​កម្ពុជា​បាន​ឲ្យ​ដឹង​ថា ការ​ជួញដូរ​ជា​មធ្យម​ប្រចាំ​ថ្ងៃ​មាន​ប្រមាណ​ជា ១០​ម៉ឺន​ដុល្លារ​អា​មេ​រិ​ក ។

លោកស្រី ប៊ុត ប៊ុ​ន​សីហា អនុប្រធាន​នាយក​ប្រតិបត្ដិ និង​ជា​គណៈ​ប្រធាន​នាយិកា​ប្រតិបត្ដិ​នីតិកម្ម និង​លេខាធិការ​ក្រុមហ៊ុន របស់​ធនាគារ​អេ​ស៊ី​លី​ដា បាន​ឲ្យ​តម្លៃ​ថា តម្លៃ​ហ៊ុន​របស់​អេ​ស៊ី​លី​ដា បាន​កំពុង​ដំណើរ​ល្អ​លើ​ផ្សារ​ហ៊ុន ។

លោកស្រី​បញ្ជាក់​ថា ពេល​ផ្តើម​ដំណើ​ការ​លើ​ផ្សារ​ដំបូង​នៅ​ក្នុង​ខែឧសភា គឺ​មួយ​ហ៊ុន​ថ្លៃ ១៦ ២០០​រៀល ប៉ុន្តែ​មក​ដល់​ថ្ងៃ​ទី​៣០ កក្កដា មួយ​ហ៊ុន​បាន​ឡើង​ក្នុង​រង្វង់​១៧ ០០០ ឬ ១៨ ០០០​រៀល ។

បុគ្គលិក​ធនាគារ​អេ​ស៊ី​លី​ដា បាន​បញ្ជាក់​ថា «​ជា​ទូទៅ​កូ​វី​ដ​១៩​នេះ មិន​បាន​ប៉ះពាល់​ដល់​ផ្សារ​ហ៊ុន​អេ​ស៊ី​លី​ដា​ទេ ពីព្រោះ​ការ​ជួញដូរ​គេ​ធ្វើ​តាម​អន​ឡាញ ។ អ្នក​ជួញដូរ​មិនបាច់​ទៅ​ជួបជុំ​គ្នា​ឡើយ ពួក​គាត់​អាច​ជួញដូរ​តាម​ទូរស័ព្ទ​ដៃ​របស់​ពួក​គាត់​នៅ​គ្រប់កន្លែង​និង​គ្រប់ពេលវេលា​» ។ មាន​ក្រុមហ៊ុន​ឯកជន និង​ស្ថាប័នរដ្ឋ​ចំនួន​១២ កំពុង​ដំណើរការ​លក់​ហ៊ុន​របស់​ខ្លួន​នៅ​លើ​ផ្សា​រមូល​ប​ត្រ​កម្ពុជា ក្នុង​នោះ​៦​ស្ថាប័ន បាន​ធ្វើការ​លក់​មូល​ប​ត្រ​កម្ម​សិទ្ធ និង​៦​ស្ថាប័ន​លក់​មូល​ប​ត្រ​បំណុល ។ ក្រុមហ៊ុន​លក់​មូល​ប​ត្រ​កម្ម​សិទ្ធ​មាន ធនាគារ​អេ​ស៊ី​លី​ដា កំពង់​ផែ​ស្វយ័ត​ក្រុងព្រះសីហនុ រោងចក្រ​ភី​ភី​អេស​ភី កំពង់​ផែ​ស្វយ័ត​ភ្នំពេញ ក្រុមហ៊ុន​ហ្គ្រេ​ន​ធី​ន និង​រដ្ឋ​ករ​ទឹក​ស្វយ័ត​ភ្នំពេញ​។

ចំណែក​ស្ថាន​ប័ន​លក់​មូល​ប​ត្រ​បំណុល​មាន​គ្រឹះស្ថាន​មីក្រូហិរញ្ញវត្ថុ ហត្ថា​កសិករ លីមីត​ធី​ត អិ​ល​អូ​អិ​ល​ស៊ី (​ខេ​ម​បូ​ឌា​) ភី​អិ​ល​ស៊ី អិ​ល​អូ​អិ​ល​ស៊ី (​ខេ​ម​បូ​ឌា​) ភី​អិ​ល​ស៊ី សញ្ញា​បណ្ណ​សាជី​កម្ម អេ​ប៊ី​អេ ធនាគារ​ភ្នំពេញ​ពាណិជ្ជ «​ភី​ភី​ស៊ី​ប៊ែ​ង​» ម​.​ក អ អិ​ម អេ (​ខេ​ម​បូ​ឌា​)​ម​.​ក និង​គ្រឹះស្ថាន​មីក្រូហិរញ្ញវត្ថុ​ប្រា​សាក់ ម​.​ក ។

គេហទំព័រ​របស់​ធនាគារ​អេ​ស៊ី​លី​ដា បាន​បង្ហាញ​ឲ្យ​ដឹង​ថា គិត​ត្រឹម​ម៉ោង​១២​ថ្ងៃត្រង់​ថ្ងៃ​ទី​៣០ ខែកក្កដា​នេះ ទំហំ​ទឹកប្រាក់​ជួញដូរ​របស់​ធនាគារ​នេះ មាន​ប្រមាណ ១០​ពាន់​លាន​រៀល ។ ធនាគារ​អេ​ស៊ី​លី​ដា មាន​វិ​និ​យោ​គិត​ប្រមាណ​៣​ពាន់​នាក់​បាន​ចុះបញ្ជី​ជួញដូរ ។

លោកស្រី ប៊ុត ប៊ុ​ន​សីហា បាន​លើក​ឡើង​ថា ជា​ទ្រឹស្តី​អ្នក​សេដ្ឋកិច្ច​ខ្លះ​ថា នៅ​ពេល​មាន​ផល​លំបាក ឬ​ឧបសគ្គ ដូច​ជា ពេល​កូ​វី​ដ​១៩​នេះ ជា​ឱកាសល្អ​ទៅ​វិញ​នោះ​ទេ​សម្រាប់​ការ​វិនិយោគ ។ លោកស្រី​ហាក់​ចង់​សំដៅ​ដល់​ថា ពេល​កូ​វី​ដ​១៩​នេះ ជា​ឱកាសល្អ​សម្រាប់​ការ​ជួញដូរ​ផ្សារ​ហ៊ុន​ផង​ដែរ ។

មន្ត្រី​របស់​គណៈកម្មការ​មូល​ប​ត្រ​កម្ពុជា​បាន​ឲ្យ​ដឹង​ថា ការ​ជួញដូរ​ជា​មធ្យម ប្រចាំ​ថ្ងៃ​មាន​ប្រមាណ​ជា ១០​ម៉ឺន​ដុលារ​នៅ​ខែកក្កដា​នេះ គឺ​ប្រហាក់ប្រហែល​និង រយៈពេល​មុន​ពេល​កើត​មាន​កូ​វី​ដ​ដែរ ។

មន្ត្រី​បាន​បញ្ជាក់​តាម​ប្រព័ន្ធ​សង្គម​ថា «​ជា​ការ​ពិត​កូ​វី​ដ​បាន​ធ្វើ​ឲ្យ​ប៉ះពាល់​ដល់​ថ្លៃ ភាគហ៊ុន​នៅ​លើ​ផ្សារ​យើង​ខ្លាំង​នៅ អំឡុង​ខែមីនា និង​មេ​សា​ដោយ​កាលនោះ​ថ្លៃ​ជា​មធ្យម​ធ្លាក់​ចុះ​ប្រមាណ​២០% ។ បច្ចុប្បន្ន​ថ្លៃ​ភាគហ៊ុន​ជា​ទូទៅ​បាន ងើបឡើង​មក​វិញ​ទោះបី​មិន​ទាន់​ដល់​កម្រិត​ដូច​ដើម ប៉ុន្តែ​ខ្ញុំ​ជឿជាក់​ថា ថ្លៃ​នឹង​ប្រសើរ​ឡើង​វិញ​ស្រប​ពេល​ដែល​ក្រុមហ៊ុន ចុះបញ្ជី​កំពុង​ត្រៀម​នឹង​ប្រកាស​ពី​លទ្ធផល​ហិរញ្ញវត្ថុ ប្រចាំត្រីមាស​ទី​២ ក៏​ដូច​ជា​ចែក​ភាគលាភ​ប្រចាំឆ្នាំ​២០១៩​នា​ពេល​ឆាប់​ៗ​នេះ​»​។

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ