ទីក្រុងបូហ្គោតា៖ ប្រទេសកូឡុំប៊ីប្រកាសព្យួរទុកការសហការចែករំលែកព័ត៌មានសម្ងាត់ជាមួយអាមេរិកដោយសារខឹងសម្បារនឹងអាមេរិកបាញ់ប្រហារទូកដែលសង្ស័យដឹកគ្រឿងញៀននៅសមុទ្រការីប៊ីន។ ថ្មីៗនេះ ប្រធានាធិបតីកូឡុំប៊ី លោកប៉េត្រូ (Petro) បង្ហោះសារនៅលើបណ្ដាញអ៊ិចថារដ្ឋាភិបាលរបស់លោកសម្រេចផ្អាកប្រព័ន្ធទំនាក់ទំនង និងកិច្ចព្រមព្រៀងគ្រប់កម្រិតជាមួយស្ថាប័នសន្តិសុខរបស់អាមេរិក។ វិធានការនេះនឹងរក្សាទុករហូតដល់អាមេរិកឈប់បាញ់ទូកនៅសមុទ្រការីប៊ីន។
ចាប់តាំងពីខែសីហា អាមេរិកចាប់ផ្ដើមដាក់ពង្រាយកម្លាំងនៅសមុទ្រការីប៊ីនដើម្បីចាត់ការទូកដែលសង្ស័យដឹកគ្រឿងញៀន។ នេះមិនមែនជាប្រតិបត្តិការដែលសាមញ្ញពេកទេព្រោះអាមេរិកប្រើនាវាចម្បាំង៨គ្រឿង និងទាហាន១ម៉ឺននាក់។ រហូតមកដល់ពេលនេះ អាមេរិកបាញ់ទូក ឬអូប័រសង្ស័យដឹកគ្រឿងញៀនយ៉ាងតិច១៩ករណីនៅការីប៊ីន និងប៉ាស៊ីហ្វិចខាងកើតបណ្ដាលឱ្យស្លាប់មនុស្សយ៉ាងតិច៧៦នាក់។
ថ្មីៗនេះ អាមេរិកបញ្ជូននាវាចម្បាំង៤គ្រឿងថែមទៀតទៅឈរជើងនៅការីប៊ីន។ ក្នុងនោះក៏មាននាវាដឹកយន្តហោះ១គ្រឿងម៉ាកយូអែសអែស ជើរ៉លហ្វត (USS Gerald R Ford) ផងដែរ។ ដូច្នេះយុទ្ធនាការបង្ក្រាបគ្រឿងញៀនប្រហែលជាមិនបន្ធូរដៃទេ ប៉ុន្តែបង្កើនសកម្មភាពកាន់តែខ្លាំង។ កងទ័ពជើងទឹកអាមេរិកប្រកាសថាខ្លួនទើបតែបញ្ជូនក្រុមវាយប្រហារទៅដែនសមុទ្រក្បែរតំបន់អាមេរិកឡាទីនកាលពីយប់មិញ។
ការដាក់ពង្រាយកម្លាំងដ៏សម្បើមនេះធ្វើឱ្យមេដឹកនាំប្រទេសខ្លះដែលប្រឆាំងអាមេរិកនៅមិនស្រណុកខ្លួនប៉ុន្មានទេ។ ប្រធានាធិបតីវេណេហ្ស៊ូអេឡា លោកម៉ាឌូរ៉ូ អះអាងថាអាមេរិកដាក់ពង្រាយកម្លាំងដើម្បីចាត់ការគ្រឿងញៀននោះគ្រាន់តែជាលេសទេ។ តាមពិតកម្លាំងទាំងនេះសម្រាប់ត្រៀមវាយលុកចូលប្រទេសរបស់លោក។ កាលពីយប់មិញ រដ្ឋមន្ត្រីការពារជាតិវេណេហ្ស៊ូអេឡាប្រកាសតាមទូរទស្សន៍ថាលោកបានដាក់ពង្រាយទាហានជិត២សែននាក់ដើម្បីត្រៀមចេញប្រតិបត្តិការទប់ទល់។
ប្រធានាធិបតីកូឡុំប៊ី លោកប៉េត្រូ ធ្លាប់ចាត់ទុកការវាយប្រហាររបស់អាមេរិកទៅលើទូកសង្ស័យដឹកគ្រឿងញៀនជាអំពើមនុស្សឃាត។ កាលពីយប់មិញ លោកថ្លែងថារាល់យុទ្ធនាការប្រយុទ្ធប្រឆាំងគ្រឿងញៀនគួរណាស់ធ្វើឡើងដោយគិតអំពីបញ្ហាសិទ្ធិមនុស្សនៅសមុទ្រការីប៊ីន។ លោកបានចែករំលែកព័ត៌មានដែលផ្សាយតាមទូរទស្សន៍ស៊ីអឹនអឹន (CNN) ថាអង់គ្លេសក៏បានព្យួរទុកការចែករំលែកព័ត៌មានសម្ងាត់ជាមួយអាមេរិកផងដែរដោយសារការបង្ក្រាបគ្រឿងញៀននោះ។
តាមពិត អាមេរិក និងកូឡុំប៊ីកាលពីជំនាន់មេដឹកនាំមុនៗឃើញថាមានទំនាក់ទំនងល្អនឹងគ្នា។ ប៉ុន្តែក្រោយពេលលោកប៉េត្រូវឡើងកាន់អំណាចនៅកូឡុំប៊ី និងក្រោយពេលលោកត្រាំឡើងកាន់អំណាចនៅអាមេរិក ទំនាក់ទំនងនេះចាប់ផ្ដើមធ្លាក់ចុះ។ ចាប់តាំងពីឆ្នាំ២០០០ អាមេរិកផ្ដល់ថវិកាទៅឱ្យកូឡុំប៊ី១៤ពាន់លានដុល្លារដើម្បីប្រយុទ្ធប្រឆាំងគ្រឿងញៀន និងពួកឧទ្ទាម។
លោកស្រីអេលីហ្សាបែត ឌីកឃីនសុន (Elizabeth Dikinson) ជាអ្នកស្រាវជ្រាវជាន់ខ្ពស់ម្នាក់ថ្លែងថាអាមេរិកអាចចាត់ការបញ្ហាគ្រឿងញៀននៅការីប៊ីនដោយសារការចែករំលែកព័ត៌មានសម្ងាត់ពីប្រទេសកូឡុំប៊ីរហូតដល់៨០%។ ដូច្នេះ លោកស្រីយល់ថាបើសិនកូឡុំប៊ីលែងសហការនៅក្នុងរឿងនេះ អាមេរិកនឹងបាត់បង់ព័ត៌មានសំខាន់ និងជាការខាតបង់ដ៏ធំមួយសម្រាប់ទីក្រុងវ៉ាស៊ីនតោន។ នេះបើតាមការផ្សាយរបស់សារព័ត៌មានហ្វាយណាន់សល ថាមស៍ (Financial Times) និងប្រភពដទៃទៀត៕
ចែករំលែកព័តមាននេះ