ទីក្រុងអាប៊ូដាប៊ី៖ ប្រទេសអ៊ីរ៉ង់ចង់ចរចាជាមួយអាមេរិកដើម្បីឱ្យមានកិច្ចព្រមព្រៀងនុយក្លេអ៊ែរដោយសន្តិវិធី។ ប៉ុន្តែអ៊ីរ៉ង់មិនអាចបន្ទន់ជំហររបស់ខ្លួនដែលអាចធ្វើឱ្យប៉ះពាល់សន្តិសុខជាតិរបស់ខ្លួនជាដាច់ខាត។ ខាងលើនេះជាការថ្លែងរបស់អនុរដ្ឋមន្ត្រីការបរទេសអ៊ីរ៉ង់ លោកសាអ៊ីត ខាទីហ្សាដេ (Saeed Khatizadeh)។ អាមេរិក អឺរ៉ុប…
ទីក្រុងអាប៊ូដាប៊ី៖ ប្រទេសអ៊ីរ៉ង់ចង់ចរចាជាមួយអាមេរិកដើម្បីឱ្យមានកិច្ចព្រមព្រៀងនុយក្លេអ៊ែរដោយសន្តិវិធី។ ប៉ុន្តែអ៊ីរ៉ង់មិនអាចបន្ទន់ជំហររបស់ខ្លួនដែលអាចធ្វើឱ្យប៉ះពាល់សន្តិសុខជាតិរបស់ខ្លួនជាដាច់ខាត។ ខាងលើនេះជាការថ្លែងរបស់អនុរដ្ឋមន្ត្រីការបរទេសអ៊ីរ៉ង់ លោកសាអ៊ីត ខាទីហ្សាដេ (Saeed Khatizadeh)។ អាមេរិក អឺរ៉ុប និងអ៊ីស្រាអែលចោទប្រកាន់ថាអ៊ីរ៉ង់ប្រើប្រាស់កម្មវិធីនុយក្លេអ៊ែរគ្រាន់តែជាការបិទបាំងតែប៉ុណ្ណោះ។ ប៉ុន្តែធាតុពិតអ៊ីរ៉ង់ចង់ផលិតអាវុធនុយក្លេអ៊ែរ។
អ៊ីរ៉ង់អះអាងថាកម្មវិធីនុយក្លេអ៊ែររបស់ខ្លួនបង្កើតឡើងសម្រាប់បម្រើឱ្យវិស័យស៊ីវិល មានន័យថាសម្រាប់ផលិតថាមពលអគ្គិសនី។ កាលពីខែតុលា លោកដូណាល់ត្រាំប្រកាសថាអាមេរិកត្រៀមចុះកិច្ចព្រមព្រៀងជាមួយអ៊ីរ៉ង់ជានិច្ចឱ្យតែអ៊ីរ៉ង់ត្រៀមខ្លួនរួចរាល់នៅពេលណាមួយ។ លោកថាលោកកំពុងលាដៃដ៏ធំដើម្បីត្រៀមស្វាគមន៍មិត្តភាព-សហការជាមួយអ៊ីរ៉ង់។
អ៊ីរ៉ង់ចោទប្រកាន់ថាអាមេរិកនិយាយត្រឡប់ត្រឡិនបាតដៃជាខ្នងដៃ
អនុរដ្ឋមន្ត្រីអ៊ីរ៉ង់ខាងលើនេះថ្លែងថាទីក្រុងវ៉ាស៊ីនតោននិយាយម្ដងបែបនេះ ម្ដងបែបនោះផ្ដាំតាមប្រទេសអន្តរការីពាក់ព័ន្ធនឹងការចរចានុយក្លេអ៊ែរ។ មុនពេលផ្ទុះសង្គ្រាមរយៈពេល១២ថ្ងៃរវាងអ៊ីរ៉ង់ និងអ៊ីស្រាអែលកាលពីខែមិថុនា អ៊ីរ៉ង់ និងអាមេរិកធ្លាប់ជួបគ្នាចំនួន៥ដងដើម្បីដោះស្រាយបញ្ហានុយក្លេអ៊ែរ។ ថ្ងៃនេះ អនុរដ្ឋមន្ត្រីអ៊ីរ៉ង់សូមបញ្ជាក់ជាថ្មីថាទីក្រុងវ៉ាស៊ីនតោននិយាយក្រឡិចក្រឡុចនៅក្នុងភាសាការទូត។ ការចរចានុយក្លេអ៊ែរត្រូវជាប់គាំងចាប់តាំងពីសង្គ្រាមខែមិថុនា។
តាមមើលទៅ ប្រទេសទាំង២និយាយមិនទាន់ត្រូវគ្នាទេព្រោះមានចំណុចខ្វែងគំនិតគ្នាជាច្រើនដែលមិនទាន់ដោះស្រាយឱ្យបានរួចរាល់។ អ៊ីរ៉ង់អះអាងថានុយក្លេអ៊ែររបស់ខ្លួនសម្រាប់បម្រើឱ្យវិស័យស៊ីវិល។ ហេតុនេះអាមេរិកទាមទារឱ្យអ៊ីរ៉ង់បញ្ជូនប្រដាប់ប្រដារសម្រាប់ចម្រាញ់នុយក្លេអ៊ែរទៅចម្រាញ់នៅប្រទេសដទៃក្រោមការឃ្លាំមើលពីក្រុមអ្នកសង្កេតការណ៍។ អាមេរិកអះអាងថាធ្វើដូច្នេះដើម្បីធានាថាអ៊ីរ៉ង់មិនអាចផលិតអាវុធនុយក្លេអ៊ែរ។ ការទាមទារនេះត្រូវអ៊ីរ៉ង់បដិសេធជាដាច់ខាត។
អគ្គមគ្គុទ្ទេសក៍អ៊ីរ៉ង់ច្រានចោលការចរចាគ្នាជាថ្មី
កាលពីសប្ដាហ៍មុន អគ្គមគ្គុទ្ទេសក៍អ៊ីរ៉ង់ លោកអាយ៉ាតូឡា អាលី ខាមេនី (Ayatollah Ali Khamenei) ដែលជាអ្នកមានសិទ្ធិសម្រេច ឬអារកាត់លើបញ្ហាគ្រប់យ៉ាងនៅអ៊ីរ៉ង់រួមទាំងនយោបាយការបរទេស និងកម្មវិធីនុយក្លេអ៊ែរផងដែរនោះបានបដិសេធមិនចរចាជាមួយអាមេរិកជាដាច់ខាតបើចរចាក្រោមរូបភាពជាការគំរាមកំហែង។ អនុរដ្ឋមន្ត្រីអ៊ីរ៉ង់ថ្លែងថារដ្ឋាភិបាលរបស់លោកគ្មានផែនការផលិតគ្រាប់បែកនុយក្លេអ៊ែរទេ។ អ៊ីរ៉ង់ត្រៀមខ្លួនធានាអះអាងប្រាប់ពិភពលោកអំពីជំហររបស់ខ្លួន៕
ចែករំលែកព័តមាននេះ