ទីក្រុងរ៉ង់ហ្គូន៖ ក្រោយហេតុការណ៍លិចទូកដឹកជនភៀសខ្លួនរ៉ូហ៊ីងហ្កាកាលពីប៉ុន្មានថ្ងៃមុននោះ ក្រុមអ្នកជួយសង្គ្រោះបន្តរកឃើញសាកសពជនរងគ្រោះជាហូរហែដែលធ្វើឱ្យចំនួនអ្នកស្លាប់កើនឡើងដល់២៧នាក់។ ក្រៅពីនេះ មនុស្សជាច្រើននាក់ទៀតនៅបន្តបាត់ខ្លួន។ អ្នកដែលអាចរស់រានមានជីវិតពីហេតុការណ៍នេះបាននិយាយរៀបរាប់អំពីព្រឹត្តិការណ៍ដែលកើតឡើងស្ដាប់ទៅគួរឱ្យព្រឺសម្បុរ។ អ្នករស់ពីសេចក្ដីស្លាប់ម្នាក់និយាយរៀបរាប់អំពីជីវិតរសាត់អណ្ដែតតែម្នាក់ឯងនៅលើផ្ទៃសមុទ្រអាន់ដាម៉ាន់ (Andaman sea)។
លោកអ៊ីម៉ាន សារីហ្វ (Iman Sharif) ប្រាប់ថាគាត់មើលឃើញសាកសពមនុស្សអណ្ដែតនៅលើផ្ទៃទឹក។ មនុស្សលង់ទឹកស្លាប់ច្រើនណាស់។ គាត់ចេះតែហែលបណ្ដែតខ្លួនរហូតដល់មានគេមកជួយសង្គ្រោះទាន់ពេលវេលា។ លោកអ៊ីម៉ានប្រាប់ថាគាត់ឡើងជិះទូកខ្នាតធំមួយគ្រឿងរយៈពេល៨ថ្ងៃ។ បន្ទាប់មក គេផ្ទេគាត់ទៅជិះទូកខ្នាតតូចវិញម្ដងដែលដឹកមនុស្សប្រហែល៧០នាក់។
ទូកនោះបើកមិនបានប៉ុន្មានផងក៏ស្រាប់តែលិចភ្លឹបទៅក្នុងទឹកសមុទ្រតែម្ដង។ គាត់ស្រវាចាប់បានបំណែករបស់ទូកនោះ ហើយចេះតែហែលបណ្ដែតខ្លួនអស់ជាច្រើនថ្ងៃទម្រាំរសាត់អណ្ដែតទៅដល់ជិតកោះមួយនៃប្រទេសម៉ាឡេស៊ី។ ឥឡូវនេះ ថៃ និងម៉ាឡេស៊ីសហការគ្នាបន្តស្វែងរកមនុស្សរាប់សិបនាក់ទៀតដែលនៅបន្តបាត់ខ្លួនក្បែរព្រំដែនសមុទ្រប្រទេសទាំង២។
ថ្ងៃនេះ គេស្រង់បានសាកសពជនរងគ្រោះ៩នាក់ថែមទៀត។ ក្នុងនោះ សាកសពម្នាក់ស្រង់បាននៅលើផ្ទៃសមុទ្រប្រទេសថៃ។ អស់ជាច្រើនឆ្នាំមកហើយ ជនជាតិរ៉ូហ៊ីងហ្កានៅតែប្រើវិធីជម្លៀសខ្លួនតាមកូនទូកតូចៗដែលផ្ទុកលើសចំណុះដើម្បីព្យាយាមភៀសខ្លួនទៅប្រទេសដទៃដូចជាម៉ាឡេស៊ី ឥណ្ឌូណេស៊ី និងថៃជាដើម។ ពួកគេកំពុងជួបទ្វេគ្រោះ។ ពួកគេរស់នៅមីយ៉ាន់ម៉ាគ្មានសេចក្ដីសុខទេព្រោះក្រុមយោធាធ្វើទុក្ខបុកម្នេញ។
ចំណែករស់នៅជំរំខក់បាហ្សា និងជំរំដទៃទៀតនៅប្រទេសបង់ក្លាដែសក៏រស់នៅមិនបានសេចក្ដីសុខប៉ុន្មានដែរ ហើយរស់នៅគ្មានអនាគតទៀតផងព្រោះពួកគេមិនដឹងថាត្រូវបន្តរស់នៅទីនោះរហូតដល់ពេលណា។ ម៉្លោះហើយ ពួកគេសុខចិត្តជិះទូកកាត់ផ្ទៃសមុទ្រដ៏ធំល្វឹងល្វើយទាំងផ្សងព្រេងដោយសេចក្ដីសង្ឃឹមថានឹងរកឃើញឆាកជីវិតដែលប្រសើរជាងនេះ។
ចាប់តាំងពីថ្ងៃសៅរ៍សប្ដាហ៍មុន ម៉ាឡេស៊ីជួយសង្គ្រោះអ្នកនៅរស់បាន១៣នាក់ និងស្រង់បានសាកសពជនរងគ្រោះ១២នាក់។ នេះបើយោងតាមការបញ្ជាក់របស់លោករុំលី មូស្តាហ្វា (Romli Mustafa) ជាប្រធានទីភ្នាក់ងារលំហសមុទ្រនៃប្រទេសម៉ាឡេស៊ី។ កាលពីមុននេះ លោកថ្លែងថាអាជ្ញាធរថៃរកឃើញសាកសពជនរងគ្រោះ៩នាក់។ ប៉ុន្តែមន្ត្រីមូលដ្ឋានថៃនៅខេត្តសាទុន (Satun) ប្រាប់ទីភ្នាក់ងាររ៉យទ័រថាគេស្រង់បានសាកសពតែ៦នាក់ប៉ុណ្ណោះ៕
ចែករំលែកព័តមាននេះ