ខេត្តកំពត ៖ ពិតជាអាណិតសង្វេគខ្លាំងណាស់ ដែលស្ត្រីម្នាក់ត្រឡប់ពីយកចង្ហាន់ទៅប្រគេនព្រះសង្ឃនៅវត្តជុំគ្រៀល ស្ថិតក្នុងស្រុកទឹកឈូរួចមក ជិះរថយន្តត្រឡប់មកផ្ទះវិញ តែមិនទាន់ដល់ផ្ទះផង បានឈប់រថយន្តហើយជនរងគ្រោះបានដើរឆ្លងផ្លូវជាតិលេខ33 ពីត្បូងទៅជើង-ដើរឆ្លងផុតផ្លូវទៅហើយ ស្រាប់តែត្រូវរថយន្តពោងដឹកស៊ីម៉ង់ត៍បើកមកពីកើតទៅលិចបុកអូសជាប់៥០ម៉ែត្រ បណ្ដាលអោយស្លាប់ភ្លាមៗនៅនិងកន្លែង។
ហេតុការណ៍រន្ធត់ បានកើតឡើងនៅវេលាម៉ោង3រសៀលថ្ងៃទី២៩ កក្កដា នៅលើកំណាត់ផ្លូវជាតិលេខ៣៣ នៅមុខរោងចក្រក្រុមហ៊ុនពូចិន ក្នុងភូមិកណ្ដាលទួលឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
យោងតាមការអោយដឹងពីលោកទំ ទិត្យ នគរបាលទទួលផ្នែកចរាចរស្រុកបានអោយដឹងថា ស្ត្រីជាជនរងគ្រោះឈ្មោះង៉ែត ម៉ូច អាយុ៥៤ឆាំ្ន នៅភូមិស្រូវលើឃុំដងទង់ស្រុកដងទង់ ខេត្តកំពត។ ពួកអ្នកឃើញហេតុការបាននិយាយទាំងក្ដីអាណិតអាសូរថា ស្ត្រីរងគ្រោះបានខំធ្វើនំចំណី រួមទាំងអ្នកភូមិជាច្រើននាក់ បានយកចង្ហាន់យកទៅប្រគេនព្រះសង្ឃនៅវត្តជុំគ្រៀល ប៉ុន្តែជាការអកុសលត្រឡប់មកវិញមិនទាន់ដល់ផ្ទះផងចុះពីលើរថយន្តហើយដើរឆ្លងផ្លូវត្រូវបានរថយន្តបុកស្លាប់ទាំងក្ដីស្រណោះ។
ចំណែករថយន្តជាអ្នកបង្ក ត្រូវបានឈប់មិនឆ្ងាយពីកន្លែងកើតហេតុ ហើយអ្នកបើកបរត្រូវបានរត់គេចខ្លួន ខណៈពេលកងនគរបាលបានមកដល់។បន្ទាប់នគរបាលបានពិនិត្យហើយរួចរាលនៅកន្លែងកើតហេតុនគរបាលបានអោយក្រុមសាច់ញាតិដឹកសពទៅធ្វើបុណ្យនៅឯភូមិកំណើតនិងរថយន្តជាអ្នកបង្កត្រូវបាននគរបាលយកមកដាក់នៅអធិការដ្ឋាននគរបាលស្រុកកំពង់ត្រាច។
ចែករំលែកព័តមាននេះ