ប្រទេសថៃ ៖ សមាគមបាល់ទាត់ថៃ (FAT) បាននិយាយកាលពីថ្ងៃទី២៨ម្សិលមិញថា រដ្ឋាភិបាលថៃបានផ្តល់សិទ្ធិយ៉ាងពិសេសសម្រាប់គ្រូបង្វឹកជម្រើសជាតិថៃលោក Akira Nishino អាចត្រឡប់មកពីប្រទេសជប៉ុនវិញ នៅពាក់កណ្តាលខែក្រោយ។ ស្របពេលដែលថៃ កំពុងបិទមិនឱ្យមានការហោះហើរចូល អំឡុងពេលមានការរឹតត្បិតដោយសារកូវីដ១៩។
សូមរំលឹកថាលោក Akira Nishino បានស្នាក់នៅប្រទេសកំណើត អស់រយៈពេលជាច្រើនខែកន្លងមកហើយ ដោយសារតែលោកមិនអាចចូលក្នុងប្រទេសថៃបាន។ ប៉ុន្តែពេលនេះរដ្ឋាភិបាលថៃ បានផ្តល់សិទ្ធិពិសេសអនុញ្ញាតឱ្យលោកអាចត្រឡប់ចូលប្រទេសនេះវិញ នៅពាក់កណ្តាលខែក្រោយ ។
លោក Patit Supaphong អគ្គលេខាធិការ FAT បាននិយាយកាលពីម្សិលមិញថា ស្ថាប័ននេះកំពុងធ្វើការជាមួយអាជ្ញាធរថៃ ដើម្បីអនុញ្ញាតឱ្យកីឡាករ និងគ្រូបង្វឹកបរទេសប្រមាណ ៨០នាក់ក្នុងនោះរួមទាំងលោក Nishino ផងដែរ ដើម្បីអាចត្រឡប់ចូលប្រទេសថៃវិញ។ បច្ចុប្បន្ន FAT បានបញ្ជូនឯកសារចាំបាច់ទៅភាគីដែលពាក់ព័ន្ធរួចហើយ។ ហើយការត្រឡប់មកវិញរបស់លោក Nishino គួរតែត្រូវបានអនុម័តឆាប់ៗនេះ។
លោក Patit បានបន្ថែមថា បន្ទាប់ពីនោះលោក Nishino នឹងត្រូវដាក់ឱ្យនៅដាច់ដោយឡែក (ចត្តាឡីស័ក) រយៈពេល ១៤ថ្ងៃ មុនពេលអាចចាប់ផ្តើមរៀបចំក្រុមជម្រើសជាតិថៃ ត្រៀមសម្រាប់ការប្រកួតជម្រុះក្នុងពូលតំបន់អាស៊ីក្នុងពានរង្វាន់ World Cup 2022 នៅដើមខែតុលា។
សូមបញ្ជាក់ថាប្រទេសថៃ ដែលស្ថិតនៅក្នុងពូល G នឹងធ្វើជាម្ចាស់ផ្ទះទទួលប្រទេសឥណ្ឌូណេស៊ីនៅថ្ងៃទី៨ ខែតុលា មុនធ្វើដំណើរទៅប៉ះប្រទេសអារ៉ាប់រួមនៅថ្ងៃទី១២ ខែវិច្ឆិកា និងការប្រកួតបិទពូលត្រូវទទួលប្រទេសម៉ាឡេស៊ីនៅថ្ងៃទី១៧ ខែវិច្ឆិកា។ បន្ទាប់ពីឆ្លងកាត់ការប្រកួតចំនួន ៥លើកថៃស្ថិតនៅលេខរៀងទី៣ក្នុងពូលដោយឈ្នះ២ ស្មើ២ និងចាញ់១ មាន៨ពិន្ទុតាមពីក្រោយវៀតណាមនៅកំពូលតារាងមាន ១១ពិន្ទុ៕ (ដកស្រង់ចេញពី Bangkok Post)
ចែករំលែកព័តមាននេះ