ប្រទេសវៀតណាម ៖ រដ្ឋាភិបាលវៀតណាមប្រកាសនាថ្ងៃទី២៨កក្កដាថា ប្រទេសនេះផ្អាកការហោះហើរនៃយន្តហោះ ទៅមកក្រុងដាណាងក្រោយរកឃើញមនុស្សយ៉ាងតិច១៤នាក់ឆ្លងវីរុសCOVID-19នៅទីក្រុងនេះ ដែលទទួលអ្នកទេសចរជាង៨,៧លាននាក់ក្នុងឆ្នាំ២០១៩។ ការផ្អាកការហោះហើរនោះកំណត់១៥ថ្ងៃ។បណ្ដារថភ្លើងនិងរថយន្តបឺសក៏ផ្អាកទៅមកក្រុងនោដែរ។ រដ្ឋាភិបាលវៀតណាមបានជម្លៀសមនុស្សចេញពីទីនោះ ដល់ទៅ៨០.០០០នាក់ ក្រោយរកឃើញអ្នកឆ្លងវីរុសដំបូង៣នាក់នៅទីនោះមក។
តាមទូរទស្សន៍អាមេរិកCNNថា រដ្ឋាភិបាលបានប្រកាសនាថ្ងៃទី២៧កក្កដាថា ការជម្លៀសមនុស្សទាំង៨០.០០០នាក់នោះ ដែលភាគច្រើនជាអ្នកទេសចរគ្រោងធ្វើក្នុងពេល៤ថ្ងៃ ហើយជើងយន្តហោះ១០០ជើងក្នុង១ថ្ងៃត្រូវគ្រោង ដើម្បីជម្លៀសមនុស្សទាំងនោះចេញ មកកាន់ទីក្រុង១១ទៀតរបស់វៀតណាម។ ក្នុងចំណោមទីក្រុងទាំងនេះ មានតែទីក្រុង២ទេដែលទាមទារថាអ្នកទេសចរដែលមកពីដាណាង នឹងត្រូវអនុវត្តចត្តាឡីស័ក។
ទូរទស្សន៍អាមេរិកនោះបន្តថា អាជ្ញាធរវៀតណាមបានតាមដានម៉ឺងម៉ាត់បំផុត បណ្ដាអ្នកដែលប៉ះពាល់ជាមួយអ្នកឆ្លងវីរុស ហើយពួកគេត្រូវតម្រូវឲ្យស្ថិតក្នុងការបង្ខាំង២សប្ដាហ៍។ នៅវៀតណាមពុំមានមនុស្សណាម្នាក់ស្លាប់ដោយសារវីរុសនេះនៅឡើយ។ ក្នុងសេចក្ដីប្រកាសមួយនាយករដ្ឋមន្ត្រីវៀតណាមលោកង្វៀនស៊ន់ភុកគូសបញ្ជាក់ថា ការតាមរកបណ្ដាអ្នកដែលប៉ះពាល់ជាមួយអ្នកឆ្លង នឹងត្រូវធ្វើរូចការធ្វើតេស្តនឹងអនុវត្តដោយទ្រង់ទ្រាយធំ។
តាំងពីចាប់ផ្ដើមការឆ្លងមក វៀតណាមមានអ្នកឆ្លងវីរុស៤៣១នាក់និងពុំមានអ្នកស្លាប់។ ប្រទេសនៅអាសីុអាគ្នេយ៍នោះបានអនុវត្តវិធានការទប់ទល់វីរុសមឺុងម៉ាត់បំផុត ពិសេសការត្រួតពិនិត្យដ៏តឹងតែង តាំងពីដើមខែមីនាមក។ ប្រទេសនោះបានបិទព្រំដែនមិនឲ្យបណ្ដាជនបរទេសចូល ចាប់តាំងពីខែមីនាមក។
ក្រោយការរកឃើញអ្នកឆ្លង៣នាក់ វិធានការនៅឃ្លាតដាច់ពីគ្នាត្រូវអនុវត្តឡើងវិញនៅដាណាង ជាមួយការពាក់ម៉ាសជាកាតព្វកិច្ច។ ចាប់តាំងពីថ្ងៃទី២៨កក្កដាទៅ បណ្ដាបារនឹងនៅតែបិទប៉ុន្តែបណ្ដាសហគ្រាស ភោជនីយដ្ឋាននិងមជ្ឈមណ្ឌលកីឡានឹងនៅតែបើក ចំណែកបណ្ដាវិធានការបង្ការត្រូវគោរព៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ