អន្តរជាតិ ៖ នៅក្នុងសប្តាហ៍នេះ រដ្ឋបាលរបស់លោកប្រធានាធិបតីត្រាំ បានបង្កើនភាពប្រឈមមុខគ្នា ជាមួយក្រុងប៉េកាំង ដោយបញ្ជាឱ្យស្ថានកុងស៊ុលរបស់ចិននៅទីក្រុងហ៊ូស្តុន រដ្ឋតិចសាស់ បិទទ្វារ ដោយសារតែការបារម្ភអំពីចារកម្មសេដ្ឋកិច្ច។ វាជាជំហានថ្មីមួយនៅក្នុងដំណើរដាំក្បាលចុះក្នុងទំនាក់ទំនង រវាងមហាអំណាចសេដ្ឋកិច្ចទាំងពីរ ទៅដល់កម្រិតទាបបំផុតមិនធ្លាប់មានអស់ច្រើនទសវត្សរ៍មកហើយ។
តើការកើនឡើងភាពតានតឹងនេះមានភាពធ្ងន់ធ្ងរប៉ុនណា? វាមិនមែនជារឿងចម្លែកទេ ដែលសហរដ្ឋអាមេរិក បិទស្ថានបេសកកម្មរបស់បរទេសណាមួយ ប៉ុន្តែអ្វីដែលទើបនឹងកើតឡើង ជាវិធានាការដ៏កម្រ និងមានសភាពជ្រាលជ្រៅ ដែលពិបាកនឹងយល់ដែរ។ នេះគ្រាន់តែជាស្ថានកុងស៊ុលមួយប៉ុណ្ណោះ មិនមែនស្ថានទូតទេ បានន័យថា វាមិនមែនជាកន្លែងដែលមានការទទួលខុសត្រូវផ្នែកនយោបាយឡើយ ប៉ុន្តែ វាមានតួនាទីសំខាន់នៅក្នុងការសម្រួលពាណិជ្ជកម្ម និងកិច្ចការទំនាក់ទំនងផ្សេងទៀត។
ចំណាត់ការរបស់អាមេរិក ក៏ញ៉ាំងឱ្យមានការវាយបកពីក្រុងប៉េកាំងវិញដែរ។ ចិនបានបញ្ជាឱ្យអាមេរិកបិទស្ថានកុងស៊ុលរបស់ខ្លួននៅទីក្រុង ចេងឌូ ភាគខាងលិចប្រទេសចិន ដែលប្រៀបបានជាការសំពង យ៉ាងដំណំមួយទៅលើហេដ្ឋារចនាសម្ព័ន្ធ ការទូតដែលបម្រើឱ្យការប្រាស្រ័យទាក់ទងរវាងប្រទេសទាំងពីរ។
ចំណាត់ការទៅវិញទៅមកនេះ ជាការវិវឌ្ឍន៍ធ្លាក់ចុះដុនដាបនៃទំនាក់ទំនងនៅក្នុងរង្វង់តែប៉ុន្មានខែចុងក្រោយនេះសោះ ក្នុងនោះមានការរឹតដ្បិតទិដ្ឋាការ, វិធានថ្មីសម្រាប់ការធ្វើដំណើរការទូត, និងការបណ្តេញអ្នកសារព័ត៌មាន ចេញពីប្រទេសរៀងៗខ្លួន។ ភាគីទាំងសងខាងបានដាក់ចេញវិធានការមួយដៃទៅមួយដៃមក ប៉ុន្តែគឺសហរដ្ឋអាមេរិកដែលជាអ្នកនាំអាទិ៍មុនគេនៅក្នុងស្ថានការណ៍ប្រឈមមុខគ្នានេះ៕ ដោយ ៖ អ. សួស្តី
ចែករំលែកព័តមាននេះ