ឥណ្ឌូណេស៊ី ចំនួនអ្នកឆ្លងកូវីដ-១៩ កើនលើសពី ១០០.០០០ករណី
ទីក្រុងចាការតា ៖ ប្រទេសឥណ្ឌូណេស៊ី បានបញ្ជាក់នៅថ្ងៃចន្ទ ទី២៧ កក្កដានេះថា មានអ្នកឆ្លងកូវីដ-១៩ កើនឡើងហួសចំនួន ១០០.០០០ នាក់ហើយ…
ទីក្រុងចាការតា ៖ ប្រទេសឥណ្ឌូណេស៊ី បានបញ្ជាក់នៅថ្ងៃចន្ទ ទី២៧ កក្កដានេះថា មានអ្នកឆ្លងកូវីដ-១៩ កើនឡើងហួសចំនួន ១០០.០០០ នាក់ហើយ រហូតមកដល់ពេលនេះ គេពិបាកទស្សទាយថា តើពេលណានឹងឡើងដល់កម្រិតកំពូល ។
ឥណ្ឌូណេស៊ី បានកត់ត្រាចំនួនឆ្លងថ្មី ១.៥២៥ករណី នៅចន្លោះ ថ្ងៃអាទិត្យ និងចន្ទ នាំឲ្យចំនួនសរុបឡើងដល់ ១០០.៣០៣ ករណី ។ ហើយចំនួនអ្នកស្លាប់នៅឥណ្ឌូណេស៊ី មានចំនួន ៤,៨៣៨នាក់ ខណៈដែលចំនួនអ្នកជាសះស្បើយមាន ៥៨.១៧៣ នាក់ ។
៤០ភាគរយ នៃការឆ្លងនៅក្នុងប្រទេសឥណ្ឌូណេស៊ី គឺមកពីខេត្តចាវ៉ាខាងកើត និងរដ្ឋធានីចាការតា ដែលត្រូវគេចាត់ទុកថា ជាចំណុចកណ្តាល នៃការរីករាលដាល នៃជំងឺកូវីដ-១៩ ។
ក្រុមការងារ(កូវីដ-១៩) របស់រដ្ឋាភិបាលឥណ្ឌូណេស៊ី ធ្លាប់បានព្យាករណ៍កាលពីដើមខែមេសាថា ប្រទេសនេះនឹងកើនលើស ១០០.០០០ ករណី នៅក្នុងខែកក្កដានេះ ។ ការព្យាករណ៍កម្រិតខ្ពស់បំផុត គឺនៅមិនទាន់ទស្សទាយនៅឡើយ ។
សាស្ត្រាចារ្យផ្នែករោគរាតត្បាតលោក Pandu Riono បានប្រាប់អ្នកសារព័ត៌មានថា “នៅដំណាក់កាលនេះ វាពិបាកក្នុងការព្យាករណ៍ថា តើពេលណាការឆ្លងនឹងឡើងដល់កម្រិតកំពូលនោះ” ។
អ្នកជំនាញរោគរាតត្បាត និងបុគ្គលិកពេទ្យ បានស្តីបន្ទោស ការកើនឡើងយ៉ាងឆាប់រហ័សនេះ គឺបណ្តាលមកពីការបន្ធូរបន្ថយ នៃអ្វីដែលគេហៅថា “ការរឹតបន្តឹងក្នុងសង្គមជាទ្រង់ទ្រាយធំ” ដើម្បីទប់ស្កាត់ការរាតត្បាតរាលដាល ។
ទីក្រុងចាការតា បានបន្ធូរបន្ថយការរឹតត្បិតសង្គមរបស់ខ្លួន នៅថ្ងៃទី៥ មិថុនា ខណៈរដ្ឋធានីស៊ូរ៉ាបាយ៉ាខាងកើត បានដកបម្រាមរបស់ខ្លួនទាំងស្រុងតែម្តង នៅថ្ងៃទី៩ មិថុនា ។
ក្រុមជំនាញរោគឆ្លង បាននិយាយថា រដ្ឋាភិបាលគួរតែបានកំណត់ឡើងវិញ នូវការរឹតត្បិតជាថ្មីនៅពេលដែលកម្រិតនៃការឆ្លងខ្ពស់ទើបតែចាប់ផ្តើម ។ ការិយាល័យ, ផ្សារ និងកន្លែងសាធារណៈ គួរតែត្រូវបានបិទ ខណៈពេលដែលប្រជាជនគួរតែត្រូវបានហាមឃាត់មិនឲ្យធ្វើដំណើរ ។
គិតត្រឹមថ្ងៃចន្ទនេះ ប្រទេសឥណ្ឌូណេស៊ី បានធ្វើតេស្តប្រជាជន ៨០០.០០០នាក់ ឬស្មើនឹង ០,២៩ភាគរយ ក្នុងចំណោមប្រជាជនចំនួន ២៧៣ លាននាក់ប៉ុណ្ណោះ ។
សូមជម្រាបដែរថា កាលពីថ្ងៃទី២៥ ខែកក្កដា ឆ្នាំ២០២០ សម្តេចតេជោ ហ៊ុន សែន នៃព្រះរាជាណាចក្រកម្ពុជាបានយល់ព្រមតាមសំណើរបស់រដ្ឋមន្ត្រីក្រសួងសុខាភិបាល ដែលសុំអោយផ្អាកជាបណ្ដោះអាសន្ននូវជើងហោះហើរពីប្រទេសឥណ្ឌូណេស៊ី និងម៉ាឡេស៊ី មួយរយៈ ចាប់ពីថ្ងៃទី០១ ខែសីហា ឆ្នាំ២០២០ នេះតទៅ រហូតដល់កម្មការក្រសួងដើម្បីប្រយុទ្ធនឹងកូវីដ១៩ ពិនិត្យនឹងវាយតម្លៃ ទៅលើហានិភ័យនៃការចម្លងកូវីដ១៩ និងសុំគោលការណ៍ពីសម្តេចតេជោ បើកជើងយន្តហោះហើរជាថ្មីឡើងវិញ ៕
ចែករំលែកព័តមាននេះ