ខេត្តបាត់ដំបង ៖ បុរសម្នាក់រងរបួសរលាកដៃស្តាំ ខណៈកំពុងបូមសាំងដាក់ដប នៅទីកន្លែងងងឹត បានយកដែកកេះ មកកេះបំភ្លឺហើយខិតជិតដបសាំង (ដើម្បីមើលពេញហើយឫនៅ?) ក៏ត្រូវភ្លើងឆាបនឹងចំហេះសាំង ឆេះរោងឈើកន្លែងលក់ប្រេងយ៉ាងសន្ធោសន្ធៅ…
ខេត្តបាត់ដំបង ៖ បុរសម្នាក់រងរបួសរលាកដៃស្តាំ ខណៈកំពុងបូមសាំងដាក់ដប នៅទីកន្លែងងងឹត បានយកដែកកេះ មកកេះបំភ្លឺហើយខិតជិតដបសាំង (ដើម្បីមើលពេញហើយឫនៅ?) ក៏ត្រូវភ្លើងឆាបនឹងចំហេះសាំង ឆេះរោងឈើកន្លែងលក់ប្រេងយ៉ាងសន្ធោសន្ធៅ ដោយសារតែកំហុសមិនគួរឲ្យនឹកស្មានដល់ ។
អគ្គិភ័យកើតឡើងដោយសារការធ្វេសប្រហែសនេះ បណ្ដាលឲ្យឆាបឆេះអស់ទាំងស្រុង នូវរោងឈើដ៏ធំមួយខ្នង កាលពីម៉ោង៧យប់ថ្ងៃទី២៥ កក្កដា ឆ្នាំ២០២០ នៅក្បែរភូមិគ្រឹះលោកអភិបាលខេត្ត ស្ថិតក្នុងភូមិរំចេក៥ សង្កាត់តេនះ ក្រុងបាត់ដំបង ។
សមត្ថកិច្ចបានឱ្យដឹងថា រោងឈើ ដែលត្រូវភ្លើងឆាបឆេះនោះ មានទំហំ១០ម៉ែត្រx១៥ម៉ែត្រ បានក្លាយជាផេះ ដោយសារតែអគ្គិភ័យដែលបង្កឡើងដោយម្ចាស់ផ្ទះខ្លួនឯង ស្ថិតនៅក្នុងបរិវេណផ្ទះរបស់ជនរងគ្រោះ មានឈ្មោះ អាន ចាន់រ័ត្ន ភេទប្រុស អាយុ៣៧ឆ្នាំ មុខរបរលក់សាំងដប នៅចំណុចកើតហេតុខាងលើ ។ បន្ទាប់ពីម្ចាស់ផ្ទះឈ្មោះ អាន ចាន់រ័ត្ន ត្រូវភ្លើងឆេះរលាកដៃខាងស្តាំ ត្រូវបានគេដឹកទៅសង្គ្រោះនៅមន្ទីរពេទ្យបង្អែកខេត្តភ្លាមៗផងដែរ ។
សមត្ថកិច្ចបានបញ្ជាក់ថា អគ្គិភ័យនេះបានកើតឡើងយ៉ាងសន្ធោសន្ធៅ នៅក្បែរភូមិគ្រឹះលោកអភិបាលខេត្ត ប៉ុន្តែសំណាងល្អ មិនបានឆ្លងរាលដាលដល់លំឋាន ដែលនៅក្បែររៗនោះឡើយ ដោយសារពេលកើតហេតុនោះ រថយន្តពន្លត់អគ្គិភ័យបានចេញអន្តរាគមន៍យ៉ាងព្រោងព្រាត រហូតដល់បង្ក្រាបឥទ្ធិពលភ្លើងបានទាំងស្រុង ឆេះតែរោងឈើដ៏ធំនោះតែប៉ុណ្ណោះ ។
មន្ត្រីជំនាញគួរតែមានវិធានការចំពោះអ្នកលក់ដូរសាំងតាមដងផ្លូវដែលគ្មានច្បាប់ទម្លាប់ ព្រោះអាចប្រឈមហានិភ័យខ្លាំងបំផុត ដែលអាចបង្កឱ្យមានគ្រោះថ្នាក់គ្រប់ពេលវេលា ជាក់ស្តែងអគ្គិភ័យខាងលើនេះ ជាការធ្វេសប្រហែសរបស់ម្ចាស់ផ្ទះ ដែលមានមុខរបរលក់ដូរសាំង ៕
ចែករំលែកព័តមាននេះ