ខេត្តសៀមរាប ៖ ពិធីតាំងបង្ហាញផលិតផលបន្លែសុវត្ថិភាព ក្នុងខេត្តនេះបានធ្វើឲ្យកាន់តែមានចំណាប់អារម្មណ៍ខ្លាំងបន្ថែមទៀត ពីសំណាក់បងប្អូនប្រជាពលរដ្ឋ ដែលនេះជាការជំរុញ និងក្នុងគាំទ្រផលិតផលបន្លែរបស់កសិករខ្មែរ មានទីផ្សារ បង្កើនប្រាក់ចំណូលរបស់សហគមន៍ និងប្រជាពលរដ្ឋនៅមូលដ្ឋានផ្ទាល់។
នៅថ្ងៃទី២៥ ខែកក្កដា ឆ្នាំ២០២០ ក្នុងពិធីតាំងបង្ហាញលក់ផលិតផលបន្លែ របស់បណ្តាសហគមន៍ នៅផ្សារសុវត្ថិភាពចុងសប្តាហ៍ ខេត្តសៀមរាប ក្នុងគោលបំណងដើម្បីជួយជម្រុញទីផ្សារបន្លែសុវត្ថិភាពរបស់សហគមន៍នៅតាមបណ្តាស្រុក-ក្រុង ក្នុងខេត្តសៀមរាបនេះឲ្យកាន់តែមានភាពល្អប្រសើរថែមទៀត និងជំរុញការគាំទ្រផលិតផលបន្លែរបស់កសិករខ្មែរ ឲ្យមានទីផ្សារ និងបង្កើនប្រាក់ចំណូលរបស់សហគមន៍ និងប្រជាពលរដ្ឋនៅមូលដ្ឋានផ្ទាល់ ហើយជាពិសេសមានការពេញចិត្តពីប្រជាពលរដ្ឋក្នុងការប្រើប្រាស់ និងបរិភោគ ដែលអាចកាត់បន្ថយការនាំចូលបន្លែផងដែរ។
លោក នាក់ ណេរ៉ុន អភិបាលរងខេត្តសៀរាបបាន ឱ្យដឹងថា បច្ចុប្បន្នមន្ទីរពាណិជ្ជកម្មខេត្តសៀមរាប ជាខេត្តតភ្ជាប់នៃមណ្ឌលភូមិភាគពាយព្យ នៃគម្រោងអេមស៍ (AIMS) កំពុងជំរុញការផ្សារភ្ជាប់ក្រុមកសិករទៅនឹងទីផ្សារ ដែលបានអនុវត្តន៍លើផលិតផលមាន់ស្រែ និងបន្លែ ដែលមានសហគមន៍បន្លែសុវត្ថិភាពចូលរួមមកពីស្រុកចំនួន៧ គឺស្រុកជីក្រែង ស្រុកស្វាយលើ ស្រុកបន្ទាយស្រី ស្រុកសូទ្រនិគម ស្រុកប្រាសាទបាគង ស្រុកពួក និងក្រុងសៀមរាប ដោយបានសហការជាមួយមន្ទីរកសិកម្មខេត្ត សភាពាណិជ្ជកម្ម គម្រោងលាភ គម្រោង ASPIRE និងដៃគូរផ្សេងៗទៀត។
ជាមួយគ្នានេះ ប្រជាកសិករ បានលើកឡើងអំពីការដាំបន្លែធម្មជាតិនេះ ដោយគ្រាន់តែប្រើជីធ្វើពីធម្មជាតិ ដែលគេហៅថា ជីកំប៉ុស្តិ៍ធ្វើពីរុក្ខជាតិតូចៗ និងអាចម៌គោ អាចម៏មាន់ ដោយពួកគាត់មិនបានប្រើប្រាស់ជីសារធាតុគីមីឡើយ។ ហើយការលក់បន្លែសុវត្ថិភាពរបស់សគមន៍នេះ បើកលក់បាន២ថ្ងៃក្នុងមួយសប្តាហ៍ គឺយើងលក់នៅថ្ងៃសៅរិ៍ និងថ្ងៃអាទិត្យ ដោយលក់ចាប់ពីម៉ោង ៧:០០នាទី រហូតដល់ម៉ោង ១១:០០នាទីថ្ងៃត្រង់ ក្រៅពីនោះគឺពួកគាត់លក់នៅតាមផ្សារនានាក្នុងខេត្តសៀមរាបផងដែរ។
គួរបញ្ជាក់ផងដែរថា គម្រោងជំរុញទីផ្សារសម្រាប់កសិកម្មខ្នាតតូច (AIMS) គឺជាគម្រោងរួមគ្នារវាង រាជរដ្ឋាភិបាលកម្ពុជា និងមូលនិធិអន្តរជាតិសម្រាប់អភិវឌ្ឍន៍កសិកម្ម ដែលហៅថា (IFAD)។ គម្រោងនេះមានរយៈពេលប្រាំមួយឆ្នាំ និងមានប្រសិទ្ធភាពអនុវត្តចាប់ពី ឆ្នាំ២០១៧ ហើយរំពឹងថានឹងបញ្ចប់គម្រោងនៅឆ្នាំ២០២៣។ គម្រោងនេះសហការអនុវត្តដោយ ក្រសួងពាណិជ្ជកម្ម និង ក្រសួងសេដ្ឋកិច្ច និងហិរញ្ញវត្ថុ រួមជាមួយនឹងដៃគូអនុវត្តន៍ផ្សេងទៀត។
ក្នុងពិធីតាំងបង្ហាញលក់ផលិតផលបន្លែ ក៏មានការអញ្ជើញចូលរួមពី លោកប្រធានមន្ទីរពាណិជ្ជកម្មខេត្ត លោកប្រធានមន្ទីរកសិកម្មខេត្ត លោកឧកញ្ញាបណ្ឌិតប្រធានសភាពាណិជ្ជកម្មខេត្ត គម្រោងអេមស៍ គម្រោងលាភ គម្រោង ASPIRE លោក លោកស្រី មន្ទីរអង្គភាពពាក់ព័ន្ធនិងអង្គការដៃគូរនានាផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ