ប៉ូលិសបាននិយាយថា ក្មេងស្រីអាយុ១៤ឆ្នាំម្នាក់អះអាងថា ត្រូវបានគេចាប់រំលោភនៅមជ្ឈមណ្ឌលព្យាបាលជំងឺកូវីដ១៩ ក្នុងប្រទេសឥណ្ឌា ។ លោក Parvinder Singh ស្នងការរងប៉ូលិសក្រុងដេលី បានប្រាប់សារព័ត៌មាន…
ប៉ូលិសបាននិយាយថា ក្មេងស្រីអាយុ១៤ឆ្នាំម្នាក់អះអាងថា ត្រូវបានគេចាប់រំលោភនៅមជ្ឈមណ្ឌលព្យាបាលជំងឺកូវីដ១៩ ក្នុងប្រទេសឥណ្ឌា ។ លោក Parvinder Singh ស្នងការរងប៉ូលិសក្រុងដេលី បានប្រាប់សារព័ត៌មាន CNN ថា ជនល្មើសដែលត្រូវបានគេចោទប្រកាន់ គឺជាអ្នកជំងឺដែលមានអាយុ១៩ឆ្នាំ នៅឯមជ្ឈមណ្ឌលព្យាបាលក្នុងរដ្ឋធានីញូវដេលី។
លោក Singh បាននិយាយថា៖ «អ្នកទាំងពីរមិនបានស្គាល់គ្នាជាមុនទេ ។ ការចាប់រំលោភបានកើតឡើងនៅក្នុងតំបន់ដាច់ស្រយាលមួយនៅឯមជ្ឈមណ្ឌល និងបុរសអាយុ ២០ឆ្នាំម្នាក់ ដែលជាមិត្តភក្តិរបស់ជនល្មើស បានជួយក្នុងបទឧក្រិដ្ឋនេះ» ។
ប៉ូលិសបានចុះបញ្ជីឧប្បត្តិហេតុដំបូងនៅថ្ងៃទី១៦ កក្កដា កន្លងមក នៅពេលក្រុមគ្រួសាររបស់ក្មេងស្រីរងគ្រោះបានរាយការណ៍ពីការចាប់រំលោភ ។ លោក Singh បានបន្ថែមថា៖«ក្មេងស្រីបានចោទប្រកាន់ថា បុរសអាយុ២០ឆ្នាំរូបនេះ ក៏បានថតសកម្មភាពរំលោភនេះ នៅលើទូរស័ព្ទរបស់គាត់ផងដែរ ។ យើងកំពុងស៊ើបអង្កេតរឿងនេះ ក៏ដូចជាការចោទប្រកាន់ពីបទរំលោភ» ។
លោក Singh បានប្រាប់ CNN ថា ជនសង្ស័យទាំងពីរនាក់ត្រូវបានចាប់ខ្លួន ហើយកំពុងសម្រាកព្យាបាលនៅមន្ទីរពេទ្យរដ្ឋាភិបាល ក្រោមការឃុំឃាំងរបស់តុលាការ ពីព្រោះពួកគេកំពុងទទួលការព្យាបាលកូវីដ ។
គួរបញ្ជាក់ផងដែរថា ឥណ្ឌាមានករណីឆ្លងជំងឺកូវីដ១៩ ខ្ពស់បំផុតមួយនៅលើពិភពលោក ដោយមានមនុស្សជាង១.២៨លាននាក់ឆ្លង។ នេះបើយោងតាមរបាយការណ៍សាកលវិទ្យាល័យ Johns Hopkins ។ ឥណ្ឌាស្ថិតនៅលំដាប់ទីបី បន្ទាប់ពីអាមេរិក (ទីមួយ) និង ប្រេស៊ីល (ទីពីរ) ។
ចែករំលែកព័តមាននេះ