រាជធានីភ្នំពេញ ៖ ក្នុងពិធីសម្ពោធដាក់ឲ្យដំណើរការស្ពានអាកាសថ្មើរជើងផ្សារដើមគរ នាព្រឹកថ្ងៃទី២៤ខែ កក្កដា ឆ្នាំ២០២០នេះ លោក ឃួង ស្រេង អភិបាលរាជធានីភ្នំពេញ…
រាជធានីភ្នំពេញ ៖ ក្នុងពិធីសម្ពោធដាក់ឲ្យដំណើរការស្ពានអាកាសថ្មើរជើងផ្សារដើមគរ នាព្រឹកថ្ងៃទី២៤ខែ កក្កដា ឆ្នាំ២០២០នេះ លោក ឃួង ស្រេង អភិបាលរាជធានីភ្នំពេញ បានធ្វើការព្រមាន និងដកប្រធានផ្សារដើមគរ និងប្រធានចំណតរថយន្តផ្សារដើមគរ ប្រសិនបើពួកគាត់នៅតែធ្វើការមិនចុះសម្រុងជាមួយគ្នា ដោយមិនសហការរៀបរយសណ្តាប់ធ្នាប់អោយបានល្អ ធ្វើអោយបាត់បង់សណ្តាប់ធ្នាប់ជាពិសេសផ្លូវចេញចូលតែម្តង ព្រមទាំងបង្កការថ្នាំងថ្នាក់ដល់អាជីវករទៀតនោះ ។
លោកឃួង ស្រេង មានប្រសាសន៍ថា ប្រធានចំណតរថយន្តផ្សារដើមគរ ត្រូវសណ្ដាប់ធ្នាប់របៀបរៀបរយឲ្យបានល្អ ចៀសវាងការថ្នាំងថ្នាក់ ពីសំណាក់ប្រជាពលរដ្ឋនិងអាជីវករ ដូច្នេះទេប្រធានផ្សារនិងអ្នកគ្រប់គ្រងបេនឡានផ្សារដើមគរត្រូវរួមគ្នាដើម្បីរៀបចំសណ្ដាប់ធ្នាប់នៅក្នុងពេលនេះឲ្យបានល្អសំខាន់ត្រូវអោយមានច្រកចេញចូលទៅក្នុងផ្សារឲ្យបានស្រួល ។ បើមិនដូច្នោះទេ អ្នកទាំងពីរប្រឈមនិងការដកតួនាទីចេញពីការងារនេះតែម្តង។
មុនចាប់ផ្ដើមពិធីសម្ពោធដាក់ឲ្យប្រើប្រាស់នូវស្ពានអាកាសថ្មើរជើងខាងលើនេះ លោកឃួង ស្រេ បានចូលទៅសំណេះសំណាលជាមួយបងប្អូនអាជីវករនៅក្នុងផ្សារដើមគរ ហើយ
ត្រូវបានបងប្អូនប្រជាពលរដ្ឋ និងអាជីវករក្នុងផ្សារ ស្នើសុំនិងសំណូមពរអោយលោកអភិបាលរាជធានីភ្នំពេញជួយអន្តរាគមន៍ បើកផ្លូវចេញចូលផ្សារ ខណៈដែរចំណតរថយន្តបានយករថយន្តមកចតបាំងផ្លូវមិនអាចឲ្យប្រជាពលរដ្ឋ ក៏ដូចជាអាជីវករ ចេញចូលបាន ។ ផ្ដើមចេញពីបញ្ហានេះទើបលោកអភិបាលរាជធានីភ្នំពេញធ្វើការព្រមានដកប្រធានផ្សារនិងប្រធានបេនផ្សារដើមគរ ដោយលោកបញ្ជាក់ថា បើធ្វើការងារមិនត្រូវគ្នាទេ បើដកគឺដកទាំងពីរនាក់តែម្តង ។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានអោយដឹងថា ស្ពានអាកាសថ្មើរជើងទល់មុខផ្សារដើមគរនេះ ជាគម្រោងមួយក្នុងចំណោមគម្រោងសាងសង់ស្ពាន អាកាសថ្មើរជើងចំនួន២៧ទីតាំង នៅក្នុងភូមិសាស្ត្ររាជធានីភ្នំពេញ ដែលរាជរដ្ឋាភិបាលអនុញ្ញាតអោយមានការសាងសង់តាមលិខិតលេខ ៨៩១ សជណ.មយ ចុះថ្ងៃទី ១៤ ខែមិថុនា ឆ្នាំ២០១៩ របស់ទីស្តីការគណៈ រដ្ឋមន្ត្រី ហើយស្ពានអាកាសថ្មើរជើងនេះ សាងសង់ឡើងដោយក្រុមហ៊ុនជំនាញ ដោយប្រើប្រាស់ ការសាងសង់រយៈពេល ៧ ខែ ដែលចាប់ផ្តើមសាងសង់នៅដើមខែធ្នូ ឆ្នាំ២០១៩ និង សាងសង់រួចរាល់ជាស្ថាពរ នៅដើមខែកក្កដា ឆ្នាំ២០២០ ។
លោកបន្តថា ស្ពានអាកាសនេះ បណ្ដោយស្ពានមាន ប្រវែង ២៨ ម៉ែត្រ ទទឹងស្ពានមានប្រវែង ៣.៤ ម៉ែត្រ ទទឹងផ្លូវដើរមានប្រវែង ២.៨ ម៉ែត្រ កំពស់ពីផ្លូវមកបាត់ស្ពាន ៥.៥០ ម៉ែត្រ កំពស់ពីកម្រាលដើរដល់ពិដានដំបូល ៣ កញ្ចក់ស្រោបម៉ីណុក .៥០ ម៉ែត្រ កំពស់បង្កាន់ដៃ ១.២០ ម៉ែត្រ ធ្វើអំពី ព្រមទាំងរៀបចំ និងបំពាក់កញ្ចក់ដាក់ ភ្លើងបំភ្លឺនៅលើស្ពាន និងក្រោមស្ពាន កម្រាលថ្មើរជើងធ្វើអំពីបេតុងគ្រោងដែកក្រាលដោយថ្មក្រានីត ។
លោក សាំ ពិសិដ្ឋ បានអោយដឹងទៀតថា ទន្ទឹមនឹងនេះ ការដ្ឋានថ្មីមួយទៀត និងកំពង់សាងសង់ គឺស្ពានអាកាសថ្មើរជើងនៅស្តុបសន្ធរម៉ុក ទល់មុខសាលាបឋមសិក្សាសន្ធរម៉ុក ស្ថិត ក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ដែលគិតមកដល់ពេលនេះសម្រេចបាន ២០% និងមានផែនការបន្តការសាងសង់ស្ពានអាកាសថ្មើរជើងបន្តបន្ទាប់ចំនួន ២៥ទីតាំងទៀត ដែលបាន កំណត់ក្នុងលិខិតលេខ ៨៤១ សជណ.មួយ ចុះថ្ងៃទី១៤ ខែមិថុនា ឆ្នាំ២០១៨ របស់ទីស្ដីការ គណៈរដ្ឋមន្ត្រី ។
មន្ត្រីរដ្ឋបាលរាជធានីភ្នំពេញ បានអោយដឹងថា ស្ពានអាកាសថ្មើរជើងផ្សារដើមគរនេះត្រូវបានសាងសង់ឡើងដោយក្រុមហ៊ុនមានបទពិសោធន៍ និងស្នាដៃស្ថាបនាស្ពានតែម្តង ហើយក្រុមហ៊ុននេះនឹងបន្តការសាងសង់ស្ពានអាកាសថ្មើររជើងនៅរាជធានីភ្នំពេញបន្តទៀត ។
គួរបញ្ជាក់ថា មកដល់ពេលនេះ រាជធានីភ្នំពេញមានស្ពានអាកាសថ្មើរជើង ចំនួន៦កន្លែងហើយ គឺស្ពានអាកាសថ្មើរជើងនៅតំបន់សាលាជម្ពូវន្ត័ចំនួន២ រង្វង់មូលនាងគង្ហីង១ ស្ពានអាកាសថ្មើរជើងនៅផ្សារដើមគរដែលដាក់អោយដំណើរការក្នុងពេលនេះ១ និង ស្ពានអាកាសថ្មើរជើងនៅស្តុបសន្ធរម៉ុក ទល់មុខសាលាបឋមសិក្សាសន្ធរម៉ុកដែលកំពុងដំណើរការផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ