សាក់លើក្រអូមមាត់ ក្លាយទៅជាកន្លែងដែលគេចូលចិត្តសាក់បែបអាថ៌កំបាំង
បែលហ្ស៊ិក ៖ តាមប្រភពព័ត៌មាន Oddity Central បានឱ្យដឹងថា វិចិត្រករសាក់ជនជាតិបែលហ្ស៊ិកម្នាក់ ឈ្មោះ Indy Voet…
បែលហ្ស៊ិក ៖ តាមប្រភពព័ត៌មាន Oddity Central បានឱ្យដឹងថា វិចិត្រករសាក់ជនជាតិបែលហ្ស៊ិកម្នាក់ ឈ្មោះ Indy Voet ទទួលបានកេរ្តិ៍ឈ្មោះសម្រាប់ការចាក់សាក់អចិន្ត្រៃយ៍ នៅលើកន្លែងដែលមិនធម្មតាបំផុត ចាប់តាំងពីក្រយ៉ៅដៃមនុស្ស រហូតដល់កន្លែងអាថ៌កំបាំងផ្សេងៗទៀតនៅពីក្រោយត្រចៀក។ ប៉ុន្តែជំនាញរបស់គាត់ គឺការចាក់សាក់នៅក្រអូមមាត់មនុស្ស។
Indy Voet បានចាក់សាក់ឱ្យមនុស្សនៅលើក្រអូមមាត់នេះអស់រយៈពេល៥ឆ្នាំហើយ។ មុននឹងធ្វើការចាក់សាក់នៅកន្លែងមិនធម្មតាបែបនេះ គេធ្លាប់បានប្រឡូកក្នុងការចាក់សាក់អស់រយៈពេលជាង១០ឆ្នាំមកហើយ។ ការចាក់សាក់លើក្រអូមមាត់ គឺពិតជាមិនងាយ និងមានមនុស្សណាឃើញនោះទេ ក្រៅពីពេទ្យធ្មេញ។ ហេតុដូចនេះហើយ មនុស្សក៏ចាប់ផ្តើមយល់ឃើញថា វាពិតជាឡូយមែនទែន ពេលមានស្នាមសាក់នៅកន្លែងអ៊ីចឹង។
លោក Indy Voet បានប្រាប់សារព័ត៌មាន Inked Mag ថា៖ «ខ្ញុំពិតជាមិនប្រើអ្វីក្រៅពីម្ជុល និងទឹកថ្នាំសាក់ បូកជាមួយនឹងជំនឿទុកចិត្តរបស់អតិថិជនខ្ញុំទេ»។
ប្រសិនបើយើងមិនធ្លាប់ចាក់សាក់លើក្រអូមមាត់បែបនេះទេ យើងប្រាកដណាស់នឹងគិតថា វាពិតជាឈឺចាប់មែនទែន។ តែលោក Voet ថា ៩០% នៃអតិថិជនរបស់លោក ប្រាប់ថា មិនមានការឈឺចាប់អ្វីនោះទេ ហើយ១០%ទៀត គ្រាន់តែត្អូញត្អែរភាគច្រើនអំពីការឈឺសាច់ដុំថ្គាម ព្រោះតែការបើកមាត់ចំហយូរពេក ពេលកំពុងចាក់សាក់។
ចំពោះរយៈពេលនៃការជាសះស្បើយ បន្ទាប់ពីទទួលបានស្នាមសាក់នៅលើក្រអូមមាត់វិញ សិល្បករជនជាតិបែលហ្ស៊ិករូបនេះ និយាយថា៖ «ការថែទាំក្រោយពេលចាក់សាក់ក្រអូមមាត់ គឺដូចទៅនឹងការចាក់សាក់មាត់ ឬ ចោះមាត់អ៊ីចឹងដែរ។ យើងមិនត្រូវញ៉ាំអ្វីហឹរពេក ជាតិស្រាខ្លាំងពេក ហើយត្រូវប្រយ័ត្នចំពោះអាហារ ដែលយើងដាក់ចូលក្នុងមាត់ ពី២ទៅ៣ថ្ងៃ»។
ប៉ុន្តែខណៈពេលកូវីដ១៩ កំពុងរាតត្បាតនេះ ការចាក់សាក់ចម្លែករបស់លោក Voet មិនសូវជាមានការពេញនិយមទេ ដោយសារតែមាត់ និងច្រមុះជាប្រភពឆ្លងមេរោគនេះ៕ ដកស្រង់ចេញពីវេបសាយ ៖ odditycentral (កែសម្រួលដោយ ៖ បុប្ផា)
ចែករំលែកព័តមាននេះ